ދިވެހި ތާރީޚުގައި މިފަހުން އެންމެ އަނިޔާ ލިބުނު ވެރިޔަކީ ރައީސް ޢަބްދުﷲ ޔާމީން ޢަބްދުލްޤައްޔޫމް ކަމަށް ކުރީގެ ނައިބު ރައީސް ޑރ މުޙައްމަދު ޖަމީލް އަޙްމަދު ވިދާޅުވެއްޖެއެވެ.
ޑރ ޖަމީލް މިހެން ވިދާޅުވީ އޭނާ ކުރެއްވި ޓްވީޓެއްގައެވެ. ޑރ ޖަމީލްގެ ޓްވީޓުގައި ވިދާޅުވެފައިވަނީ ރައީސް އިބްރާހިމް މުޙައްމަދު ޞާލިޙުގެ 5 އަހަރުގެ ވެރިކަމުގެ ގާތްގަޑަކަށް 3 އަހަރު ރައީސް ޔާމީނު މިހުންނެވީ ޖަލުގައި ކަމަށެވެ.
މަންމާފުޅުގެ މޫނު ދެކިލުމުންވެސް މަޙްރޫމު ކުރެއްވި ކަމަށާއި، ރައީސް ޔާމިންގެ ސިއްޙީ ޙާލުކޮޅު ދަނީ ދުވަހެއް ދުވަހަކަށް ގޯސްވަމުން ކަމަށް ޑރ ޖަމީލް ވިދާޅުވެފައިވެއެވެ.
"ދިވެހި ތާރީޚުގައި މިފަހުން އެންމެ އަނިޔާ ލިބުނު ވެރިޔަކީ މިއީ(ރައީސް ޔާމީން)، ރައީސް އިބްރާހީމަށް މިއަނިޔާއަށް އިންކާރު ނުކުރެވޭނެ"
ޖަމީލް ވިދާޅުވެފައިވެއެވެ.
ހުއްޓުމެއް ނެތި މުޅި ރާއްޖެއިން ރައީސް ޞާލިޙާއި ދެކޮޅަށް ފާޅުކުރާ ޝުޢޫރު ރައީސް ޔާމީން މިނިވަން ކުރަންދެން ވަރުގަދަ ކުރުމަށް ޑރ ޖަމީލް ގޮވާލައްވައިފައިވެއެވެ.
ޑރ ޖަމީލް މިހެން ވިދާޅުވެފައިވާއިރު އެންމެ ފަހުން ބޭއްވުނު ރައީސް ޔާމިންގެ ޝަރީއަތުގެ މަޖިލީހުގައި އެމަނިކުފާނު ވިދާޅުވީ އެމަނިކުފާނަކީ އުނަގަނޑުގެ އާލާސްކަންފުޅެއް ހުންނަ ފަރާތެއް ކަމަށެވެ.
އެ އާލާސްކަންފުޅާއި ގުޅިގެން މޫދަށް ގޮސް ކުރަންޖެހޭ ކަސްރަތުތަކެއް ޤަވައިދުން ކުރުމަށް ޑޮކްޓަރު އިރުޝާދުދެއްވާފައި ވީ ނަމަވެސް މާފުށީގައި ބިން ހިއްކުމުގެ މަސައްކަތް ކުރިއަށް ދާތީ އެ ފުރުސަތު މިހާރު ލިބިވަޑައިނުގަންނަވާކަމަށް ރައީސް ޔާމީން ވިދާޅުވިއެވެ.
އެއާއެކު އެމަނިކުފާނު ވިދާޅުވީ މިހާރު އެމަނިކުފާނުގެ ސިއްޙީ ހާލުކޮޅު ހުރިގޮތުން ހަގީގަތުގައި ހޮސްޕިޓަލަށް ވަޑައިގެން ފަރުވާ ހޯއްދަވަން ޖެހިވަޑައިގަންނަވާ ކަމަށެވެ.
އެހެން ނަމަވެސް އެކަން ނުކުރައްވަނީ، ހޮސްޕިޓަލުގައި އެޑްމިޓުކޮށްގެން ފަރުވާ ހޯއްދަވާނަމަ، އެމަނިކުފާނުގެ އާއިލާ ހިތްދަތިވާނެވަރު އިހުސާސްކުރެވޭތީ، އެ ހިތްދަތިކަން އާއިލާއަށް ނުދިނުމަށްކަމަށް އެމަނިކުފާނު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
