ރައީސް އިބްރާހިމް މުޙައްމަދު ޞާލިޙް ދެވަނަ ދައުރަކަށް ނުހޮވިއްޖެނަމަ ދިވެހި ރައްޔިތުން ކަރުނައަޅައި ރޯނެ ކަމަށް އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ވިދާޅުވެއްޖެއެވެ.

ރޮޒެއިނާ މިހެން ވިދާޅުވީ މާލޭގައި ދިރިއުޅޭ އައްޑޫ ރައްޔިތުންނާއި ބައްދަލު ކުރެއްވުމަށް ރައީސް ޞާލިޙްގެ ރަނިންމޭޓު އަދި ހިތަދޫ އުތުރު ދާއިރާގެ މެމްބަރު މުޙައްމަދު އަސްލަމް ބޭއްވެވި ބައްދަލުވުމެއްގައި ވާހަކަދައްކަވަމުންނެވެ.

ރޮޒެއިނާ ވިދާޅުވީ ރިޔާސީ އިންތިޚާބުގައި އާ މީހަކަށް، ޒުވާނަކަށް އަދި ދެމަފިރިންނަށް ވޯޓުލުމުން ވާގޮތެއް ބަލަންވެސް ވޯޓު ލެވިދާނެ ކަމަށެވެ. ނަމަވެސް އެގޮތަށް ލާ ވޯޓެއްގެ ސަބަބުން އެއްވެސް ސަބަބަކާއި ހުރެ ރައީސް ޞާލިޙް ނުހޮވިއްޖެނަމަ ރައްޔިތުން ކަރުނައަޅާ ރޯނެ ކަމަށެވެ.

Advertisement

"އަޅުގަނޑު ހަމަ މިތާހުރެ މި ދަންނަވަނީ ދިވެހި ރައްޔިތުން ކަރުނައަޅާ ރޯނެ،" ރޮޒެއިނާ ވިދާޅުވި އެވެ.

ރޮޒައިނާ ވިދާޅުވީ ރައީސް ޞާލިޙުހާ ކެތްތެރި މަޑުމައިތިރި އެހެން ބޭފުޅަކު ނުހުންނާނެ ކަމަށެވެ.

ރޮޒެއިނާ ވިދާޅުވީ މިއީ ސަމާސާއަކަށް ނޫނީ އިންތިޚާބެއްގެ ތެރޭގައި ވީމާ ދައްކާ ވާހަކައެއް ނޫން ކަމަށާއި، އެންމެންނާއި އެކު މަސައްކަތް ކުރިއިރުވެސް ރައީސް ޞާލިޙުހާ ކެތްތެރި މަޑުމައިތިރި އިޚްލާސްތެރި، ރައްޔިތުންނާއި މެދުގައި ވިސްނާ އަދި ސްޓްރެޓެޖިކްކޮށް ވިސްންވައިގެން ކަންކަން ނިންމަވާ ބޭފުޅަކާއި ދިމާނުވާ ކަމަށެވެ.

ރޮޒެއިނާ ވިދާޅުވީ ރާއްޖޭގެ އެކި ކަންކޮޅުތަކުން ތަރައްގީ މިއަދު ފެންނަން އޮތީ ފައިސާ ރަނގަޅު ގޮތުގައި ބޭނުން ކުރުމުން ކަމަށެވެ. އަދި ލޯނުތައް ވެސް ނެގީ ކޮވިޑްތެރޭ ރައްޔިތުން ބަނޑަށް ނުޖައްސާ ގެންގުޅެން ވެގެން ކަމަށާއި ބްރިޖު އަޅަން ނަގާ ލޯނަށް ވުރެ ރައްޔިތުން ބަނޑަށް ޖެހޭ ވަގުތު ކާއެތިކޮޅު ހޯދަން ނަގާ ލޯނު މާ މުހިއްމުވާ ކަމަށްވެސް އޭނާ ވިދާޅުވި އެވެ.

ރިޔާސީ އިންތިޚާބުގެ ދުވަސް ކައިރިވަމުން އަންނައިރު އިންތިޚާބުގައި ވާދަކުރައްވާ 8 ކެންޑިޑޭޓުންވެސް ދަނީ ކެމްޕޭނުގެ އެކި ހަރަކާތްތައް ހިންގަވަމުންނެވެ.