ރިޔާސީ އިންތިޚާބުގެ ވާދަވެރިންގެ ތެރެއިން އެއްބަޔަކު ބުނަމުންދަނީ މިހާރުވެސް މިސަރުކާރުން ކުރަމުންދާ ކަންކަން ކޮށްދޭނެ ވާހަކަކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް ޞާލިޙް މިހެން ވިދާޅުވީ ނ. އަތޮޅަށް ކުރައްވަމުން ގެންދަވާ ކެމްޕޭނު ދަތުރުފުޅުގައި ނ. މަނަދޫ ގައި ރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ރައީސް ޞާލިޙް ވިދާޅުވީ ވާދަވެރިންގެ ތެރެއިން އެއްބަޔަކު ކުރަމުންދާ ކަމަކީ ޒާތީ ގޮތުން ވާހަކަ ދެއްކުން ކަމަށާއި އެނޫން އެއްވެސް ކަމެއް ނުކުރާކަމަށެވެ.

Advertisement

"ދެން އަނެއްބަޔަކު ދައްކާ ވާހަކައަކީ މިހާރުވެސް މިސަރުކާރުން ކުރަމުންދާ ކަންކަމުގެ ވާހަކަ، ތިމަންނަމެންގެ ސަރުކާރުގަ އެސްއެމްއީ ލޯނު މޯގޭޖެއް ނެތި، ރަހުނެއް ނެތި ދޫކުރާނަމޭ، ބަލަ މިހާރުވެސް އެކަން ކުރަމުންދާގޮތޭ އެ، އެސްއެމްއީ ލޯނު މިހާރުވެސް ދެނީ އެގޮތަށޭ، ރަނގަޅު ޕްރޮޕޯސަލްއެއް ހުށައެޅީމަ އެއްވެސް ރަހުނެއް ނެތި އެދަނީ ލޯނު ދޫކުރަމުން" ރައީސް ޞާލިޙް ވިދާޅުވިއެވެ.

މީގެއިތުރުން ރައީސް ޞާލިޙް ވިދާޅުވީ އަނެއްބޭފުޅަކު ދައްކަވާ ވާހަކައަކީ މިރަށުގައި 12،000 މީޓަރުގެ އެއަޕޯޓެއް އަޅުއްވާނެ ވާހަކަކަމަށާއި، އެހެން އެވިދާޅުވި ރަށުގައި މިހާރު 15،000 މީޓަރުގެ އެއަރޕޯޓެއް އަޅަމުންދާ ކަމަށެވެ.

ކެންޑިޑޭޓުގެ ނަން ހާމަނުކުރައްވާ ރައީސް ވިދާޅުވީ އާބާދީ ބޮޑު ރަށްރަށަށް ތަރައްޤީ ގެންނަވާ ވާހަކަފުޅު ކެންޑިޑޭޓަކު ވިދާޅުވިކަމަށާއި އެމަނިކުފާނުގެ ސިޔާސަތުތަކާއި އެހެން ބޭފުޅުންގެ ސިޔާސަތުތަކާއި ހުރި ތަފާތަކީ އެއީ ކަމަށެވެ.

"އަޅުގަނޑުމެން އިސްކަންދެނީ ދިވެހި ފަރުދުންނަށް، ވަކި ވަކި ފަރުދުންނަށް، ކޮންމެ ތާކު ކޮންމެ ރަށެއްގައި އުޅުނު ކަމަށްވިޔަސް ދިވެހިންނަށް ހައްޤުވާކަންތައް ތަކެއް އެބަހުރި، ސަރުކާރުން ކޮށްދޭން ޖެހޭ ކަންތައްތަކެއް އެބަހުރި، އެއިޔަކީ އެއް އާބާދީ ބޮޑުވެގެން، ބޮޑު ރަށެއްގައި އުޅޭތީ ނޫނީ ސިޓީއެއްގައި އުޅޭތީ ކޮންމެހެން ކޮށްދޭން ޖެހޭ ކަންތައްތަކެއް ނޫން" ރައީސް ޞާލިޙް ވިދާޅުވިއެވެ.

ރިޔާސީ އިންތިޚާބު ގާތްވަމުން އަންނައިރު އިންތިޚާބަށް ކުރިމަތިލައިފައިވާ 8 ކެންޑިޑޭޓުންވެސް ދަނީ ފޯރިއާއި އެކު ކެމްޕޭނު ކުރައްވަމުންނެވެ.