ކޯލިޝަން އަކީ ގާނޫނު ދަންނަ ކަމެއް ނޫން ކަމަށާ، އެހެންނަމަވެސް، އެއީ މަނާ ކަމެއް ނޫން ކަމަށް އިލެކްޝަންސް ކޮމިޝަންގެ ނާއިބު ރައީސް އިސްމާއީލް ހަބީބު ވިދާޅުވެއްޖެއެވެ.
އިލެކްޝަން ކޮމިޝަނުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ނޫސްވެރިއެއް ކުރެއްވި ސުވާލަށް ޖަވާބު ދެއްވަމުން ހަބީބު ވިދާޅުވީ، ޕީޕީއެމް/ޕީއެންސީގެ ފަރާތުން، އެ ކޯލިޝަންގެ ރިޔާސީ ކެންޑިޑޭޓް ޑރ. މުހައްމަދު މުޢިއްޒުގެ ކެންޕެއިން ޕޯސްޓަރ ތަކެއް ފާސްކޮށްދެއްވުމަށް އެދި އިލެކްޝަންސް ކޮމިޝަނަށް ފޮނުއްވާފައިވާ ކަމަށެވެ.
އަދި އެގޮތުން ފޮނުވާ ތަކެތީގެ ތެރޭއިން އީސީން ބަލަނީ ކެންޑިޑޭޓާއި ރަނިންމޭޓާއި ގުޅޭ މައުލޫމާތު ތައް ކަމަށާާ، ކެންޕެއިން ކުރަމުންދާ ގޮތް އެއީ އެ ބައެއްގެ ކަމެއް ކަމަށެވެ.
އެގޮތުން ވެރިކަންކުރާ މައި ޕާޓީ، އެމްޑީޕީން އަދާލަތު ޕާޓީ އާއި އެމްޑީއޭ އާއި އެކު ކޯލިޝަން ހަދާފައިވާއިރު، އަދި ޕީއެންސީން ޕީޕީއެމާއި އެކު ކޯލިޝަން ހަދާފައިވާކަން ފާހަގަކުރައްވައި ހަބީބު ވަނީ އެޕާޓީތަކުން އެފަދައިން ކަން ކުރައްވައިގެން ކެންޕެއިން ކުރައްވަމުން ގެންދެވި ނަމަވެސް، ކޯލިޝަން އަކީ ގާނޫނު ދަންނަ ކަމެއް ނޫން ކަމަށެވެ.
އެހެންނަމަވެސް އިލެކްޝަންސް ކޮމިޝަނުން އާއްމު ގޮތެއްގައި މި ބަލަނީ ކެންޑިޑޭޓާއި ރަނިންމޭޓާއި ދެ ބޭފުޅުންގެ މައުލޫމާތު މިބަލަނީ. ތިންވަނަ ފަރާތެއްގެ މައުލޫމާތު... އަނެންހެން އެމްޑީޕީން ކޯލިޝަން ހަދައިގެން އިތުރު ދެ ޕާޓީ އަކާއި އެކު މިދަނީ. ޕީއެންސީން ޕީޕީއެމާއި އެކުގައި މި ކޯލިޝަން ހަދަނީ. އެހެންވީމާ އަޅުގަނޑުމެން ގާނޫނުގައި ދަންނަ ކަމެއް ނޫން އަނެންހެން ކޯލިޝަން ހަދައިގެން އެކަންކަން ކުރުމަކީ. އެހެންނަމަވެސް އެ ބޭފުޅުންގެ އަމިއްލަ ބޭނުމަށް އެކަންކަން ކުރެވިދާނެ. އެއީކީ އަނެންހެން މައްސަލަ އެއް ނޫން.
އީސީގެ ނާއިބު ރައީސް އިސްމާއީލް ހަބީބު
ހަބީބު ވިދާޅުވީ ރާއްޖޭގެ ގަނޫނު އަސާސީގައި ވާގޮތުން ކޮންމެ މީހަކަށްވެސް ކެންޕެއިން ކުރުމުގެ ފުރުސަތު އޮންނަ ކަމަށެވެ. އަދި ކެންޕެއިންގެ ތެރެއިން އެކި މީހުން ވިއްކާނީ އެކި ސިޔާސަތު ކަން ފާހަގަކުރައްވައި ހަބީބު ވިދާޅުވީ، އެމީހެއްގެ ނަޒަރުގައި އެންމެ ރަނގަޅަށް ވިއްކިދާނެ އެއްޗެއް ވިއްކައިގެން ވެރިކަމަށް ވަޑައިގެންނެވުމަކީ އެ މީހުންގެ ހައްގެއް ކަމަށް އީސީން ދެކޭ ކަަމަށެވެ.
Advertisement
This content is created and paid for by advertisers and does not involve Voice Journalists
