އިދިކޮޅު ޕީއެންސީ/ޕީޕީއެމްގެ ރިޔާސީ ކެންޑިޑޭޓު ޑރ މުޙައްމަދު މުޢިއްޒު ހދ މަކުނުދޫއަށް ވަޑައިގަތުމުން އެރަށު ރައްޔިތުން މުޢިއްޒު އަށާއި އޭނަގެ ޓީމަށް ހޫނު މަރުޙަބާއެއް ކިޔައިފިއެވެ.

ޑރ މުޢިއްޒާއި ރަނިންގމޭޓު ފަރެސްމާތޮޑާ ދާއިރާގެ މެންބަރު ހުސައިން މުޙައްމަދު ލަތީފު އަދި އެކޯލިޝަންގެ ލީޑަރޝިޕްގެ ބޭފުޅުން ޑރ.މުޢިއްޒުގެ ކެމްޕެއިނަށް ކުރައްވަމުންގެންދަވާ ދަތުރުފުޅުގައި  މިއަދު މަކުނުދޫގެ އިތުރުން ހޯރަފުއްޓާއި އިހަވަންދޫއަށް ވަޑައިގަންނަވާނެއެވެ.

އިއްޔެ ބޮޑުތިލަދުން މައްޗަށް ފެއްޓެވި ދަތުރުފުޅުގައި ހަނިމާދޫއާއި ނޮޅިވަރަމާއި ކުޅުދުއްފުއްޓަށް ވަޑައިގެންފައިވާއިރު، އެ ރަށްރަށުގެ ރައްޔިތުންނާއި ބައްދަލުކުރައްވައި އެރަށްރަށުގައި ފަށައި، ނުނިމިހުރި ތަރައްޤީގެ މަޝްރޫޢުތައް ކުރިއަށް ގެންދަވައި އެ މަޝްރޫޢުތައް ނިންމަވާނެ ކަމުގެ ޔަޤީންކަން ޑރ.މުޢިއްޒު ދެއްވާފައިވެއެވެ.

Advertisement

މިއަދު ހެނދުނު މަކުނުދޫއަށް ޑރ.މުޢިއްޒުއާއި ކެމްޕެއިން ޓީމު ވަޑައިގެންނެވުމުން އެ ބޭފުޅުންނަށް މަރުހަބާ ވިދާޅުވުމަށް ގިނަ ޢަދަދެއްގެ އާންމުން ބަނދަރުމައްޗަށް އެއްވެ ތިއްބެވެ. އެ ބޭފުޅުންނާއި ސަލާންކުރެއްވުމަށްފަހު، އެބޭފުޅުންނާއެކު ބައްދަލުވުމެއް ބާއްވަވައި އެ ރައްޔިތުންގެ ކަންބޮޑުވުންތައް އަޑުއައްސަވައި މަޝްވަރާކުރެއްވުމެއް ވަނީ ކުރިއަށް ގެންގޮސްފައެވެ. 

މާދަމާވެސް ބޮޑުތިލަދުންމަތީގެ ބައެއް ރަށްރަށަށް ޑރ މުޢިއްަޒާއި ޓީމުން ޒިޔާރަތް ކުރުމަށް ވަނީ ހަމަޖެހިފައެެވެ.