ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި ރައީސް އަބްދުﷲ ޔާމީން އަބްދުލްގައްޔޫމު ގެނެސްދެއްވި ތަރައްގީ މުޅި ޤައުމަށް ގެނެސްދެއްވާނެކަމަށް ޕީއެންސީގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ވިދާޅުވެއްޖެ އެވެ.
ޑރ މުއިއްޒު މިފަދައިން ވިދާޅުވެފައި ވަނީ އެމަނިކުފާނު ތިލަދުންމައްޗަށް ކުރައްވާ ކެމްޕޭނު ދަތުރުފުޅުގައި ހއ އިހަވަންދޫއަށް ވަޑައިގެން ރައްޔިތުންނާއި މުޚާބަތުކުރައްވާ ވާހަކަދައްކަވަމުން ނެވެ.
ޑރ މުއިއްޒު ވިދާޅުވީ ޕީޕީއެމް-ޕީއެންސީއަކީ ތަރައްގީގެ ފިކުރުގެ މީހުން ކަމަށެވެ. އެއީ ރައީސް ޔާމީންގެ ވެރިކަމުގައި ޤައުމަށް ގެނެސްދެއްވި އަގުނުކުރެވޭ ތަރައްގީގެ ހިއްސާދާރުން ކަމަށެވެ.
އަދި މިހާރު ވެސް މަސައްކަތްޕުޅު ކުރައްވަނީ އެ ފިކުރުގައި، އެމަނިކުފާނުގެ ވިސްނުންފުޅާއި އެއްގޮތަށް ކަމަށާއި، ރައްޔިތުންގެ ވޯޓުލިބި ރިޔާސީ އިންތިޚާބު ކާމިޔާބުވެއްޖެ ނަމަ ރައީސް ޔާމިނުގެ ތަރައްގީގެ ރަން ޒަމާން އަނބުރާ ގެނެސްދެއްވާނެކަމަށް ޑރ މުއިއްޒު ވިދާޅުވި އެވެ.
"ރައީސް ޔާމިނަކީ ތަރައްގީ މި ގައުމަށް މީގެކުރިން ދުވަހަކުވެސް ނުފެންނަވަރަށް ގެނެސްދެއްވި ތަރައްގީގެ ބާނީ. އެމަނިކުފާނުގެ ފަރާތުން އަޅުގަނޑުމެންނަށް މި ކަންކަން ދަސްވެފައި ވަނީ. އެހެންވީމާ ޔަގީންކުރައްވަންވީ ކަމަކީ އަޅުގަނޑުމެންނަށް ރައްޔިތުން އިތުބާރުކޮށް މިކަން ހަވާލުކޮށްފި ނަމަ މި ޤައުމުން ފެނިގެން ދާނީ ތަރައްގީގެ ރަން ޒަމާނެއް، އެމަނިކުފާނުގެ ލަފަޔާއި އިރުޝާދާއި އެކީގައި އަޅުގަނޑުމެން ގެންނަތަނޭ"
ޑރ މުޙައްމަދު މުއިއްޒު
ޑރ މުއިއްޒު ވިދާޅުވީ އެމަނިކުފާނު ގެންގުޅުއްވަނީ ދިވެހިރާއްޖޭގެ ކުރިމަގަށް ރައީސް ޔާމީން އެކުލަވާލި މެނިފެސްޓޯކަމަށެވެ. އެއީ ރައްޔިތުންގެ ގިނަ މައްސަލަތަކުގެ ޙައްލުކަމަށާއި، ތަރައްގީގެ މަސައްކަތްތައް ކުރައްވަމުން ގެންދަވާނީ ރައީސް ޔާމީންގެ ލަފާފުޅާއި އިރުޝާދާއި އެކުގައި ކަމަށް ޑރ މުއިއްޒު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
