ރާއްޖޭގެ ދީނީ ޢިލްމުވެރިޔެއް ކަމަށްވާ ޝެއިޚް ޝަފީޢު ޢަބްދުالله ކުރިއަށް އޮތް ރިޔާސީ އިންތިޚާބުގައި ޕީޕީއެމް ޕީއެންސީގެ ކެންޑިޑޭޓް ޑރ މުޙައްމަދު މުޢިއްޒަށް ތާއީދު ކުރުމަށް ނިންމާފައިވާ ކަމަށް ވިދާޅުވެއްޖެއެވެ.

ޝެއިޚް ޝަފީޢު ކުރައްވާފައިވާ ޓްވީޓެއްގައި ވިދާޅުވެފައިވަނީ 2023 ގެ ރިޔާސީ އިންތިޚާބު ގައި ކުރިމަތިލައްވައިފައިވާ ބޭފުޅުންނާ މެދު ނަޒަރު ހިންގައި ވިސްނައިލި އިރު، ޑރ. މުޢިއްޒަށް ވުރެ ތަޢުލީމީ ގޮތުންނާއި، ތަޖުރިބާގެ ގޮތުންނާއި، ހިންގުމުގެ ގޮތުންނާއި، އަޚްލާޤީ ގޮތުންނާއި، ފިކުރީ ގޮތުންނާއި، ދީނީ ޢިލްމުވެރީންނާ އޮންނަ ގުޅުމުގެ ގޮތުން ކައިރި ކުރާ އެހެން ކެންޑިޑޭޓަކު ނެތް ކަމަށް ޤަބޫލުކުރެއްވޭ ކަމަށެވެ.

"އެހެންކަމުން، ކުރިމަތިލައްވައިފައިވާ ކެންޑިޑޭޓުންގެ ތެރެއިން، މި ވަގުތަށް ރާއްޖޭގެ ދީނީ މަޞްލަޙަތާއި ޤައުމީ މަޞްލަޙަތު އެންމެ ބޮޑަށް ހިމާޔަތްކުރެވޭނީ، ޑރ. މުޢިއްޒަށް ކަމަށް ހިތުގެ އަޑީން ޤަބޫލުކުރެވޭ" ޝެއިޚް ޝަފީޢު ވިދާޅުވެފައިވެއެވެ.

ޝެއިޚް ޝަފީޢު ވަނީ ޑރ މުޢިއްޒަށް ކާމިޔާބު ދެއްވައި މާތް الله ރުއްސަވާ ފަދަ ގޮތަކަށް ޤައުމާއި ރައްޔިތުންގެ ކަންކަން ކުރިޔަށް ގެންދިޔުމުގެ ތައުފީޤު މިންވަރުކުރެއްވުމަށް އެދި ދުޢާ ކުރައްވައިފައެވެ.

ޝެއިޚް ޝަފީޢުގެ އިތުރުންވެސް ރާއްޖޭގެ މަޝްހޫރު ބައެއް ދީނީ ޢިލްމުވެރިން ވަނީ ޑރ މުޢިއްޒަށް ތާއީދު ކުރައްވާ ކަން ހާމަ ކުރައްވާފައެވެ.