މާލޭ ރައްޔިތުންނަށް ގޯތި ދިނުމަށް ޚާއްސަ  ކޮށްގެން ހިންގި ބިންވެރިޔާ ސްކީމްގެ ދަށުން ނެރުނު ގޯތި ލިބޭ މީހުންގެ ލިސްޓު ފައިނަލް ކޮށް ރޭ އެލިސްޓު ނެރެ، މާދަމާ ގޯތިތައް ދޫކުރަން ފަށާނެ ކަމަށް މިނިސްޓްރީ އޮފް ނޭޝަނަލް ޕްލޭނިންގ ހައުސިންގެ އެންޑް އިންފްރާންސްޓްރަކްޗަރ އިން ބުނެފިއެވެ.

ރޭ އެމިނިސްޓްރީ އިން ބޭއްވި ނޫސްވެރިންގެ ބައްދަލުވުމެއްގައި އެމިނިސްޓްރީ އިން ބުނެފައިވަނީ މާދަމާ ހުޅުމާލެއިން ނެގޭ ގޯތިތަކުގެ އިން ވަކި ކޮށްދިނުމުގެ މަސައްކަތް ކުރިއަށް ގެންދާނެ ކަމަށެވެ.

ރޭ އެ މިނިސްޓްރީން ކުރިއަށްގެންދިޔަ ނޫސްވެރިންގެ ބައްދަލުވުމުގައި އެ މިނިސްޓްރީގެ ސްޓޭޓް މިނިސްޓަރު އަދި ފްލެޓް ކޮމިޓީގެ ޗެއާމަން އަކްރަމް ކަމާލުއްދީން ވިދާޅުވީ، ގޯތި ލިބޭ ފަރާތްތަކުގެ ގުރުއަތުލުން ބާއްވަން ހަމަޖެހިފައި ވަނީ އަންގާރަ ދުވަހު ކަމަށެވެ.

Advertisement

ބިންވެރިޔާ ސްކީމްގެ ދަށުން ގޯއްޗަށް އެދުނު މީހުންގެ ތެރެއިން ޝަރުތު ހަމަވާ އެންމެންނަށް ގޯތި ދޭން ނިންމާ ލިސްޓު އާންމުކުރީ ޖޫން 26 ވަނަ ދުވަހުއެވެ. އަންގާރަ ދުވަހު ގޯތި ދޫކުރަން ފެށި ނަމަވެސް ހުޅުމާލެ ފިޔަވައި ދެން ގޯތި ދޭން ބިން ކަނޑައަޅާފައިވާ ގުޅިފަޅާއި ގިރާވަރުފަޅު އަދި ހިއްކައި ނުނިމެއެވެ.

ބިންވެރިޔާ ސްކީމްގެ ދަށުން ގޯއްޗަށް އެދި ހުށައެޅުމަށް ހުޅުވާލުމުން 15،164 ފޯމު ހުށަހަޅާފައިވާއިރު އޭގެ ތެރޭގައި ވަކި ފަރުދުން އަދި އެކަކަށް ވުރެ ގިނަމީހުން ބައިވެރިވެރިވާ  ގޮތުގައި ޖުމްލަ 23،088 މީހުން ހިމެނެއެވެ. މީގެ ތެރެއިން 19،858 މީހުން ގޯއްޗަށް ޝަރުތު ހަމަވެއެވެ. ގޯތި ލިބޭ މީހުންގެ ވަގުތީ ލިސްޓުގައި 10،314 މީހުން ހިމެނެއެވެ.

ރޭ ގޯތި ލިބޭ މީހުންގެ ދާއީމީ  ލިސްޓް އާއްމު ކޮށްފައިވަނީ އެކަކަށްވުރެ ގިނަ މީހުން ބައިވެރިވާ ގޮތައް ހުށައަޅަން ބޭނުންވާ ފަރާތްތަކަށް އެ ފުރުސަތު ހުޅުވާލުމަށް ފަހުގައެވެ. އޭގެ ތެރޭގައި ވަކި ފަރުދުން އަދި އެކަކަށް ވުރެ ގިނަމީހުން ބައިވެރިވެރިވާގޮތުގައި ޖުމްލަ 23،088 މީހުން ހިމެނެއެވެ. މީގެ ތެރެއިން 19،639 މީހުން ޝަރުތު ހަމަވެއެވެ. .

ގޯތި ލިބޭ މީހުންގެ ދާއިމީ ލިސްޓުގައި 18,955 މީހުން ހިމެނޭއިރު ގޯތި ނުލިބޭ ލިސްޓުގައި 684 ފަރާތެއް ހިމެނެއެވެ. މީގެ ތެރޭގައި ހިމެނެނީ 18 އަހަރާއި 25 އަހަރާއި ދެމެދުގެ ކައިވެނި ނުކޮށް ތިބި ދަރިންވެސް ނެތް މީހުންކަން ފާހަގަކޮށްލަން ޖެހެވެ.

ޕްލޭނިން މިނިސްޓްރީގެ ޑިރެކްޓަރު މުހައްމަދު އާރިފް ވިދާޅުވީ، ގޯތި ލިބޭ ތަންތަނަށް ކަނޑައަޅަނީ ބަކެޓަކަށް ކަރުދާސްކޮޅު އަޅާ އޭގެ ތެރެއިން ނެގޭ ތަނަކުން ކަމަށެވެ. މީގެ ތެރޭގައި ހުޅުމާލެ އާއި ގުޅިފަޅުން އަދި ގިރާވަރު ފަޅުން ނެގޭ ގޯތިތައް ހިމެނޭ ކަމަށްވެސް އޭނާ ވިދާޅުވިއެވެ.

އަދި ގުރުއަތު ކަރުދާސް ކޮޅާއެކު، ގޯތި ހުންނާނެ ތަންވެސް ހާމަ ކުރައްވާނެ ކަމަށް އާރިފް ވިދާޅުވިއެވެ. އަދި ގުޅީފަޅުން ގޮތި ލިބޭ މީހުންގެެވެސް ގޯތި ކަނޑާ ދިނުމުގެ މަސައްކަތް ކުރިއަށް ގެންދާނެ ކަމަށްވެސް އާރިފް ވިދާޅުވިއެވެ.

އަކްރަމް ވިދާޅުވީ، ގޯތިތައް ދެނީ ރެޖިސްޓަރ ކުރުމަށްފަހު، އިންވެސް ވަކިކޮށްފައި ކަމުން، ސަރުކާރު ބަދަލުވި ކަމުގައިވިޔަސް، ޤާނޫނީ ހުރަހެއް ނޯންނާނެ ކަމަށެވެ.

ހުޅުމާލެ އިން 1،351 ގޯތި ދޫކުރަން ނިންމާފައިވާއިރު، ގުޅީފަޅުން 2،218 ގޯތި އަދި ގިރާވަރުފަޅުން 5،432 ގޯތި ދޫކުރަން ނިންމާފައި ވެއެވެ. މީގެ ތެރެއިން ހުޅުމާލެ އިން ދޫކުރާ ގޯތިތައް ދޫކުރާނީ ހުޅުމާލޭ ދެވަނަ ފިޔަވަހިންނެވެ.