ރާއްޖޭގައި ހިންގަމުންދާ ބަރަހަނާ ވެބްސައިޓްތައް ބްލޮކްކޮށް، ސްޕާގެ ނަމުގައި ހިންގަމުންދާ މަސާޖު ޕާލަރުތައް ބަންދު ކުރަން މި އަހަރުގެ ރިޔާސީ އިންތިހާބުގައި އަމިއްލަ ގޮތުން ވާދަކުރައްވާ ފާރިސް މައުމޫން ވައުދުވެއްޖެއެވެ.

ރޭ ފާރިސްގެ ކެމްޕެއިން ރަސްމީކޮށް ލޯންޗުކުރުމަށް ބޭއްވި ޖަލްސާގައި ވަނީ އޭނާގެ ރިޔާސީ ބައެއް ވައުދުތައް ހާމަކުރައްވާފައެވެ.  

އެގޮތުން އިސްލާމް ދީނުގެ ރިވެތި އަޚްލާގު ދިވެހިންގެ ކިބައިގައި އަށަގެންނެވުމަށް ކުރައްވާނެ ކަންކަމަށް ވައުދުވެވަޑައިގެންނެވި ކަންކަމުގެ ތެރޭގައި އިސްލާމްދީނުގެ ރިވެތި އުސޫލުތައް ދަމަހައްޓާ ފަތުވާ މަޖިލިސް ބާރުވެރި ކުރުވުން ހިމެނެއެވެ. 

އަދި ސްޕާގެ ނަމުގައި ހިންގާ ނުރަނގަޅު ތަންތަން ބަންދުކޮށް ރެގިއުލޭޓް ކުރުމާއި ބަރަހަނާ ވެބްސައިޓުތައް ރާއްޖޭގައި ބްލޮކް ކުރުމަށްވެސް ވަނީ ވައުދުވެވަޑައިގެންފައެވެ.

ބައިނަލްއަޤްވާމީ އުސޫލުތަކާއި އެއްގޮތަށް ހެޔޮ ވެރިކަމެއް ކުރުމަށް ފަންނީ ޤާބިލް މީހުން އައްޔަން ކުރުމާއި، އެންމެންގެ ބައިވެރިވުމާއެކު ދެފުށް ފެންނަ އުސޫލެއްގެ ތެރެއިން ވެރިކަން ކުރުމަށް ވަޢުދުވެވަޑައިގެންފައިވެއެވެ. 

މީގެ އިތުރުން، ރައްޔިތުންގެ މަޖިލީސް މެންބަރެއްގެ ހިދުމަތް ރައްޔިތުން އެދޭ ފެންވަރެއްގައި ނުކުރެވޭނަމަ، އެ މެންބަރެއްގެ އިތުބާރު ނެތް ކަމުގެ ވޯޓު ނަގަން ޕެޓިޝަނެއް ހުށަހަޅާ، އޭނާ މަގާމުން ދުރުކުރެވޭނެ އިންތިޒާމް ގާއިމް ކުރުމާއި، މެންބަރުންގެ ހުންނަން ޖެހޭ ޝަރުތު މުރާޖައާކޮށް، ހުންނަން ޖެހޭ ތައުލީމީ ފެންވަރު މަތި ކުރުންވެސް ފާރިސްގެ ރިޔާސީ ވަޢުދުތަކުގެ ތެރޭގައި ހިމެނެއެވެ. 

އަދި ރާއްޖެ ސިޔާސަތު ކަނޑައަޅާ ތަންފީޒުކުރުމާއި، ބޭކާރު ޚަރަދު ކުޑަކުރުމާއި، އާސަންދަ އާއި އެންސްޕާގެ ދަށުން އެހީދޭ އުސޫލު ދެފުށް ފެންނަ ގޮތަށް އެކުލަވާ އާންމު ކުރަންވެސް މެނިފެސްޓޯ ވަޢުދެއްގެ ގޮތުގައި ހިމަނާފައިވެއެވެ.