ޝަރުއީ ކޯޓުތަކަށް ސަރުކާރުގެ ނުފޫޒު އިންތިހާއަށް އޮތް ކަމަށް ބުނެ، ސަރުކާރު ހިންގާ މައި ޕާޓީ، އެންޑީޕީގެ ޗެއާޕާސަން ފައްޔާޟް އިސްމާއިލްގެ ބޭބެ އަދި އެ ޕާޓީގެ ކުރީގެ ރައީސް، އިބްރާހިމް އިސްމާއިލް (އިބުރާ) އެމްޑީޕީން އިސްތިއުފާ ދެއްވައިފިއެވެ.
އެމްޑީޕީން އިސްތިއުފާ ދެއްވިކަން ހާމަކުރައްވައި ފައްޔާޟުއަށް ފޮނުވި ސިޓީގައި އިބުރާ ވިދާޅުވީ އެމްޑީޕީ އުފެދުނީ، އަދުލު އިންސާފާއި، އިންސާނީ ކަރާމަތާއި، ރައްޔިތުންގެ މެދުގައި ހަމަހަމަކަން ގާއިމުކުރުމަށް އެތައް ބަޔަކު ގުރުބާން ވެގެން ކަމަށެވެ.
އަދި 2018 ވަނަ އަހަރު އެމްޑީޕީއާއި ވެރިކަން ހަވާލުކޮށް އަދި ޖެހިގެން އައި ރައްޔިތުންގެ މަޖިލީހުގެ އިންތިހާބުގައި ގާނޫނު އަސާސީ އިސްލާހު ކުރެވޭވަރަށް ގޮނޑިތައް ރައްޔިތުން ދިނީ ވަރަށް ފޮނި އުއްމީދުތަކެއް ކޮށްގެން ކަމަށްވެސް އޭނާ ވިދާޅުވި އެވެ.
"އަދުލުއިންސާފަށް ހުރި ހުރަސްތައް ނައްތާލައި ރައްޔިތުންގެ ހައްގުތައް ރައްކާ ކޮށްދޭނެ ސަރުކާރެއް ގެނައުމުގެ ބޭނުމުގައެވެ." އިބުރާގެ އިސްތިއުފާ ސިޓީގައި ބުނެފައިވެއެވެ.
ނަމަވެސް ފާއިތުވެގެން މިދިޔަ ފަސް އަހަރު ފެނިގެން ދިޔައީ އެކަންކަން އިހުނަށްވުރެ ގޯސްވެގެން ދިޔަތަން ކަމަށް އިބުރާ ވިދާޅުވިއެވެ.
"މިއަދު ސިވިލް ކޯޓަކީ ބަންޑާރަނައިބު އޮފީހުގެ ސެކްޝަނަކަށް ޕާޓީން ބަދަލުކޮށްފިއެވެ. މިއަދު ހައިކޯޓު ހިނގަމުން ދަނީ ރައީސުލްޖުމްހޫރިއްޔާ އޮފީހުގެ ލީގަލް ސެކްޝަންގެ ބެލުމުގެ ދަށުންނެވެ. ދައުލަތުގެ ވަޒީރުން ތަކުރާރުކޮށް ރައްޔިތުންގެ ހައްގުތައް ހިފަހައްޓަމުން ދާއިރު އެކަންކަން ދިފާއު ކުރައްވަނީ ބަންޑާރަނައިބެވެ. ޝަރުއީ ނިޒާމުގެ ތެރޭގައި ރައްޔިތުންގެ ހައްގުތައް ތާށިކޮށް ޖެއްސުންކުރުމުގެ އަމަލުތައް ހިންގަމުން ގެންދަނީ ދައުލަތުގެ ވަކީލުންނެވެ. އާދެ! ޕާޓީގެ ސަރުކާރު ތަމްސީލްކުރާ ވަކީލުންނެވެ. "ޝަރުއީ ނިޒާމަށް މިސަރުކާރުން ނުފޫޒު ފޯރުވަމުންދާ މިންވަރު ހާމަކުރައްވައި އިބުރާ ވިދާޅުވިއެވެ.
އިބުރާ ވިދާޅުވީ އެމްޑީޕީގެ ސަރުކާރު މިއަދު ހިނގަމުން ދަނީ އެގޮތްކަކާއި ދެކޮޅު ހަދައި ޖިސްމު ގުރުބާންކުރާން ނުކުތް ގޮތްތަކަށެވެ. އަދި އެމްޑީޕީގެ ސަރުކާރު މިއަދު ހިންގަނީ ދައުލަތުގެ މުދަލާއި ފައިސާއަކީ ރައީސުލްޖުމްހޫރިއްޔާގެ ވެރިކަން ދެމެހެއްޓުމަށް ހޭދަކުރާން ހުރި އެއްޗެހިކަމުގައި ދެކިގެން ހުޝާމަދު ކުރާ މުނާފިގުންނަށް ކަންކަން ފަހިކުރުމާއި ހެޔޮނިޔަތުގައި ކަމެއް ރަނގަޅުކުރާން ބަސް ބުނާ މީހުންގެ މައްޗަށް އަނިޔާވެރިވެގެން ކަމަށް ވެސް އޭނާ ވިދާޅުވިއެވެ.
އިބުރާ ވިދާޅުވި ގޮތުގައި ސިޔާސީ ޕާޓީއެއްގައި އޭނާ ބައިވެރިވީ އަމިއްލަ ޒާތީ ކަންތައްތަކެއް ފުއްދާކަށް ނޫނެވެ. އޭނާ ޕާޓީއެއްގައި ބައިވެރިވީ ހަމަތަކަކާއި އުސޫލުތަކެއް ގައުމުގައި ހިންގުމަށް ބަސްބުނެ މަގުފަހި ކުރުމަށް ކަމުގައި އިބުރާ ވިދާޅުވިއެވެ.
އަމިއްލަ ނަފްސު ގަބޫލު ނުކުރާ އުސޫލުތަކެއް ހިންގާ ބަސްނުވިކޭ، އަގުވަޒަން ނުކުރެވޭ ތަނެއްގައި އަނިޔާވެރިކަމަށް ނަސްރުދޭން ހުރުމަކީ ޟަމީރަށް އުނދަގޫވާ ކަމެއް ކަމަށާއި މިއަދު އެމްޑީޕީން ކަންކުރަމުން ގެންދަވާ ގޮތާއި ދެކޮޅަށް ކުރެވެން އޮތް ކަމަކީ އެކަންކަމާއި ބައިވެރި ނުވުން ކަމަށް އިބުރާ ވިދާޅުވިއެވެ.
"އަޅުގަނޑުމެންގެ މުނި ދަރީން މިކަންކަމާއި އަޑުއުފުލާއިރު އަޅުގަނޑަކީ ތިޔަ ހިޔާނާތުގައި ބައިވެރިވި މީހެއް ނޫންކަން ފަތްފުށްތަކުގައި ލިޔެފައި ބޭއްވުމެވެ." އިބުރާ ވިދާޅުވިއެވެ.
އެހެން ކަމުން، ވަރަށް ހިތާމަޔާއި އެކު، އެމްޑީޕީން ވަކިވިކަން އިބުރާ ވަނީ ވަނީ އަންގަވާފައެވެ.
Advertisement
This content is created and paid for by advertisers and does not involve Voice Journalists
