އެމްޑީޕީގެ ސިޔާސަތުތަކައި ވާދަކުރެވޭ ވަރުގެ ސިޔާސަތުތަކެއް އެހެން އެއްވެސް ކެންޑިޑޭޓަކަށް ހުށަނޭޅޭ ކަމަށް ރައީސް ޞާލިޙް ވިދާޅުވެއްޖެއެވެ.

ރައީސް މިހެންވިދާޅުވީ ނ.އަތޮޅަށް ކުރައްވަމުން ގެންދަވާ ރިޔާސީ ކެމްޕޭނުގެ ދަތުރުފުޅުގައި "އާ ޒުވާނުންގެ ޖީލު" ސިޔާސަތު ތަޢާރަފްކުރުމަށް ނ.ވެލިދޫ ގައި ބޭއްވި ޖަލްސާގައި ވާހަކަދައްކަވަމުންނެވެ.

"އަޅުގަނޑުމެންނަށް ޒުވާނުން ބަލައިގަންނާނެ ފަދަ ރަނގަޅު މަސައްކަތްތަކެއް އަޅުގަނޑު ޤަބޫލު ކުރާގޮތުގައި ހުރީ ކުރެވިފައި، ނަމަވެސް އަދި ކުރާންހުރި ބައިވަރު ކަންތައް އެބަހުރި، އެގޮތުން ޒުވާނުންގެ އާ ޖީލުގެ ދަށުން އެސިޔާސަތުތައް އެ ތަޢާރަފް ކުރެވުނީ" ރައީސް ޞާލިޙް ވިދާޅުވިއެވެ.  

Advertisement

ރައީސް ވިދާޅުވީ އޭގެ ތެރޭގައި 8 ސިޔާސަތެއް ވާކަމަށެވެ. އެއީ، ބާރުވެރި ޒުވާނުން، ޒުވާނުންގެ ބޯހިޔާވަހިކަން، ޒުވާނުންގެ ސިއްޙަތާއި ދުޅަހެޔޮކަން، ޒުވާނުންނާއި ޓެކްނޮލޮޖީ ، ހުނަރުވެރި ޒުވާނުން، ޒުވާން އެންޓަޕްރޮނިއާ، ޒުވާނުންގެ ބޭނުންތެރި ހުސްވަގުތު ހޭދަކުރާނެގޮތް އަދި އެއްވެސް ޒުވާނަކު ބާކީނުކުރުން ހިމެނެއެވެ.

"ކުރިއަށް އޮތް ރިޔާސީ އިންތިޚާބުގައި ތިޔަބޭފުޅުން ވޯޓު ދެއްވާއިރު އަޅުގަނޑުމެންގެ މި ސިޔާސަތުތަކާއި ދެން ތިޔަބޭފުޅުންގެ ކައިރިއަށް ވަޑައިގަންނަވާ ކެންޑިޑޭޓުން ހުށައަޅުއްވާ ސިޔާސަތުތައް އަޅައިކިޔާލަން ޖެހޭނެ، މިނެ ކިރާލަން ޖެހޭނެ، އެއަށް ފަހުގައި ތިޔަބޭފުޅުން ގޮތެއް ނިންމަވަން ވާނީ، އަޅުގަނޑު ދެކޭގޮތުގައި އަޅުގަނޑުމެންގެ މި ސިޔާސަތުތަކާއި ހަމަހަމަކުރެވޭ ވަރުގެ ސިޔާސަތުތަކެއް އަޅުގަނޑުމެންނާއި މިއަދު ވާދަކުރައްވަން ނުކުމެ ތިއްބެވި އެއްވެސް ބޭފުޅަކަށް  ހުށައެޅިގެނެއް ނުދާނެ" ރައީސް ޞާލިޙް ވިދާޅުވިއެވެ.

ރައީސް ވިދާޅުވީ އެހެން ކެންޑިޑޭޓުންގެ ސިޔާސަތުތައް އެނގިވަޑައިގަންނަވާނެ ކަމަށާއި، އެއްބޭފުޅަކު ނުކުމެ ވަޑައިގެން ހުންނެވީ ހަތިޔާރު ހިއްޕަވައިގެން ކަމަށާއި، އަނެއް ބޭފުޅަކީ ހެނދުނު ވިދާޅުވާ ސިޔާސަތު މެންދުރަށް ބަދަލުކުރައްވާ ބޭފުޅެއް ކަމަށެވެ.

ރައީސް ޞާލިޙްގެ ޒުވާނުންނާއި ގުޅޭ ސިޔާސަތުތައް ތަޢާރަފްކުރުމަށް ބޭއްވުނު މި ޖަލްސާގައި  އެސިޔާސަތުތައް ތަޢާރަފް ކޮށްދެއްވާފައިވަނީ ޒުވާނުންގެ ޓީމަކުންނެވެ.