ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމް އަކީ ރަށެއް ޓްރާންސްފޯމް ކުރައްވާފައިވާ ބޭފުޅެއް ކަމަށާ، އެހެންކަމުން، އެމަނިކުފާނަށް ގައުމުވެސް ޓްރާންސްފޯމް ކުރެއްވޭނެކަމަށް ކެންދޫ ދާއިރާގެ މެންބަރު ޢަލީ ހުސައިން ވިދާޅުވެއްޖެއެވެ. 

ރޭ ޖޭޕީން ބޭއްވި ކަށަވަރު ބޯހިޔާވެހިކަން ޕެނަލް ޑިސްކަޝަންގައި ވާހަކަފުޅުދައްކަވަމުން އަލީ ހުސެއިން ވިދާޅުވީ މި ވޭތުވެދިޔަ 60 އަހަރުގެ ތެރޭގައިވެސް، ބޯހިޔާވަހިކަން ހޯދަން މާލެއައި މީހަކު ނޫޅޭނެ ކަމަށެވެ. އެގޮތުން މިއަހަރު އެކަނިވެސް މާލެއަށް ތައުލީމް ހާސިލްކުރުމަށް އައި ކުދިންގެ އަދަދު 3000 އަށް އަރާކަން އޭނާ ފާހަގަކުރެއްވިއެވެ. 

ކަންމިހެން ހުރިނަމަވެސް، ފާއިތުވެދިޔަ އެއްވެސް ސަރުކާރަކުން ހަގީގީ މައްސަލައަށް އެޑްރެސް ނުކުރާ ކަމަށް އަލީ ހުސެއިން ވިދާޅުވިއެވެ. އެގޮތުން ވޭތުވެދިޔަ 30 އަހަރަށް ބަލާލިނަމަވެސް ފެންނަނީ މާލެ ބަރުމަރުކާގެ އަޑީގައި އޮތްތަން ކަމަށް އޭނާ ވިދާޅުވިއެވެ. އެކަން ހައްލު ކުރުމަށް ކަމަށް ބުނެ ވިލިނގިލިން ގޯތި ދިން ކަމަށާއި ނަމަވެސް ހައްލެއް ނުލިބުނު ކަމަށާ، އެއަށްްފަހު، ހުޅުމާލެ ފުރަތަމަ ފިޔަވައްސާއި ދެވަނަ ފިޔަވަހި ހިއްކައި ގޯއްޗާއި ފްލެޓް ދިން ކަމަށާއި ނަމަވެސް އެވަރުންވެސް މައްސަލަ ހައްލުވެފައިނުވާ ކަމަށް އޭނާ ވިދާޅުވިއެވެ. 

މިއާއެކު އަލީ ވިދާޅުވީ މާލޭގައި ދިމާވެފައިވާ ގިނަ އިޖްތިމާއީ މައްސަލަތައްވެސް ގުޅިފައިވަނީ ބޯހިޔާވެހިކަމާ ކަމަށާއި އެކަށީގެންދާ ބޯހިޔާވެހިކަން ނުލިބުނީމަ، ދެމަފިރިންނާއި ދަރިން އެއް ކޮޓަރިއެއްގައި ނިދުމާއި، ވަރިތައް ގިނަވުމާއި އާއިލާތައް ރޫޅުން ގިނަވުމާއި ނުނިކުމެ ނުދާނެ ގިނަ މައްސަލަތަކެއް ނިކުމެގެންދާ ކަމަށް އޭނާ ވިދާޅުވިއެވެ.

‏"އަޅުގަނޑު ގަބޫލުކުރާ ގޮތުގައި ޖުމްހޫރީ ޕާޓީގެ ވެރިކަމެއްގައި އަދި އަޅުގަޑުމެންގެ ގައުމީ ކެންޑިޑޭޓްގެ ތަސައްވުރަކީ މައްސަލައިގެ މުލަށް ފައިބައި މައްސަލަ ހައްލުކުރަން މަސައްކަތްކުރުން. އެއީ ދިވެހިރާއްޖެއަށް ސަރަހަށްދީ ތަރައްގީ ގެނައުން. ސަރަހަށްދީ ތަރައްގީ ގެނައުމަށްޓަކައި ކުރަންޖެހޭ މަސައްކަތް، އިގްތިސޯދު ފުޅާކުރުމާއި، އެހެންތަންތާ އިގްތިސޯދީ ހަރަކާތް އުފެއްދުމާއި، ވަޒީފާތައް އުފެއްދުމާއި، މާލެ ނޫން ސަރަހަށްދުތަކުގައި ބޭސްފަރުވާ ލިބޭނެ ގޮތް ކަނޑައެޅުމާއި، މިހުރިހާކަމެއް މިއީ ހަގީގަތުގައި އަޅުގަނޑުމެން ބޭނުންވާ ކަމަކީ. އަޅުގަނޑު ގަބޫލުކުރާ ގޮތުގައި އަޅުގަނޑުމެންގެ ގައުމީ ކެންޑިިޑޭޓަކީ މިކަން ކޮށްދެވޭނެ ބޭފުޅެއް." އަލީ ހުސެއިން ވިދާޅުވިއެވެ.

ބޯހިޔާވަހިކަމުގެ މައްސަލައާއި އެނޫން މައްސަލަ ތައް ގާސިމަށް ހައްލު ކުރެވޭނެ ކަމަށް އަލީ ހުސެއިން ވިދާޅުވާ ސަބަބެއް ކަމުގައި އޭނާ ވިދާޅުވީ، ގާސިމް އަކީ ރަށެއް ޓްރާންސްފޯމްކޮށްފައި ހުރި ބޭފުޅެއް ކަމަށެވެ. ރަށެ ޓްރާންސްފޯމްކޮށްފައި ހުންނެވި ބޭފުޅަކަށް، ގައުމުވެސް ޓްރާންސްފޯމް ކުރެވޭނެ ކަމަށް އޭނާ ވިދާޅުވި އެވެ. 

"އެބޭފުޅާ (ގާސިމް)އަކީ ރަށެއް ޓްރާންސްފޯމްކޮށްފައި ހުރި ބޭފުޅެއް. ރަށެއް ޓްރާންސްފޯމްކޮށްފައި ހުންނެވި ބޭފުޅަކަށް، ގައުމުވެސް ޓްރާންސްފޯމް ކުރެވޭނެ. ކެންޑިޑޭޓުންތައް ބައްލަވާ. އެއްވެސް ކެންޑިޑޭޓެއް އެބަހުރިތޯ އެބޭފުޅާގެ އަމިއްލަ ރަށް ޓްރާންސްފޯމްކޮށްފަ ހުރި؟ މާމިގިއްޔަށް އަރާ ބައްލަވާ އަޅުގަނޑުމެންގެ ގައުމީ ކެންޑިޑޭޓް ގެނެއްސަ އޮތް ބަދަލު. ފަޅެއްގެ ތެރެއިން ބޮޑުސިންގާ އިންޓަނޭޝަނަލް އެއާޕޯޓެއް އެއޮތީ ހައްދަވާފަ. ފަޅަކަށް ކާގޯ ބޯޓު އާދެވޭނެގޮތް އެއޮތީ ހައްދަވާފަ. އެހެންކަމުން އަޅުގަނޑު ގަބޫލްކުރާ ގޮތުގައި ރަށެއް ޓްރާންސްފޯމްކޮށްފައި ހުންނެވި ބޭފުޅަކަށް، ގައުމުވެސް ޓްރާންސްފޯމް ކުރެވޭނެ." ޢަލީ ހުސެއިން ވިދާޅުވި އެވެ.