އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ގެ ރަނިންމޭޓް، އަދި ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް، ބައިވެރިވެވަޑައިގެން ހިންގޭ ދޮރުން ދޮރަށް ކެންޕެއިން ހަރަކާތެއް މިއަދު މާލޭގައި ކުރިއަށް ދާނެ ކަމަށް އެ ކޯލިޝަނުން ބުނެފިއެވެ. 

އިދިކޮޅުން ބުނީ، މިއަދު ދޮރުން ދޮރަށް ކެންޕެއިން ހަރަކާތް ކުރިއަށް ދާނީ މާފަންނު ހުޅަނގު ދާއިރާގެ ގެތަކަށް ކަމަށެވެ. އަދި މިހަރަކާތް ފެށުމަށް ހަމަޖެހިފައިވަނީ 16:30 ގައި ހިރިޔާ ސުކޫލު ކައިރީގައި ހުންނަ ޕީޕީއެމް އޮފީސް ކައިރިން ކަމަށްވެސް ބުނެފައިވެއެވެ. 

މި ހަރަކާތުގައި ރަނިންމޭޓު ބައިވެރިވެވަޑައިގަންނަވާނެ ކަމަށް އެ ޕާޓީން މައުލޫމާތުދެއެވެ. 

Advertisement

މާލެ ސަރަހައްދުގައި ބޭއްވުނު، މުޢިއްޒުގެ ފުރަތަމަ ދޮރުން ދޮރަށް ކެންޕެއިން ހަރަކާތް އޮތީ ހުޅުމާލޭ ދެވަނަ ފިޔަވަހީގައެވެ. އެ ހަރަކާތުގައި ރިޔާސީ ކެންޑިޑޭޓް ޑރ. މުއިއްޒު އާއި ސެމްބެވެސް ބައިވެރިވެވަޑައިގެންނެވިއެވެ. 

މިވަގުތު މުޢިއްޒު އުޅުއްވަނީ ބޮޑު ތިލަދުންމަތީގެ ރަށްތަކުގައި ކެންޕެއިން ހަރަކާތްތައް ހިންގެވުމުގައެވެ. 

ޑރ. މުއިއްޒު އަކީ ކުރީގެ ރައީސް ޔާމީން އަބްދުލްގައްޔޫމަށް ރިޔާސީ އިންތިހާބުގައި ވާދަނުކުރެއްވުމުން އެމަނިކުފާނުގެ ބަދަލުގައި ކަނޑައެޅުނު ބެކްއަޕް ކެންޑިޑޭޓެވެ. މުއިއްޒުގެ ކެންޕެއިން ސްލޯގަންއަށްވެސް ބޭނުން ކުރަނީ ރައީސް ޔާމީންގެ ސްލޯގަން އަކަށް ކަނޑައެޅި "ދިވެހީންގެ ރާއްޖެ" އެވެ. 

ކެނޑިޑޭޓެއްގެ ގޮތުގައި ކަނޑައެޅުމަށްފަހު އެންމެ ފުރަތަަމަ ބޭއްވުނު ނޫސްވެރިންގެ ބައްދަލުވުމުގައި މުއިއްޒުވަނީ އޭނާގެ މަސައްކަތަކަށް ވާނީ، ރައީސް ޔާމީންގެ ތަރައްގީގެ ލެގަސީ ދެމެހެއްޓުން ކަމަށް ވިދާޅުވެފައެވެ.