ރޭ އެމްޑީޕީ ކޯލިޝަނުން ތަޢާރަފްކުރި ޒުވާނުންގެ މެނިފެސްޓޯ އަކީ އެންމެ ތާރީޚީ އެންމެ އީޖާދީ އަދި އެންމެ އިންޤިލާބީ ޒުވާނުންގެ މެނިފެސްޓޯ ކަމަށް ޢަދާލަތު ޕާޓީގެ ނައިބު ރައީސް އިޢާދު ޙަމީދު ވިދާޅުވެއްޖެއެވެ.

އިޢާދު މިހެން ވިދާޅުވީ ރޭ ނ ވެލިދޫގައި ބޭއްވި އެމްޑީޕީ ކޯލިޝަންގެ ކެމްޕޭނު ޖަލްސާގައި ވާހަކަ ދައްކަވަމުންނެވެ.

"މިރޭ އަޅުގަނޑުމެންނަށް ފެނިގެން މިދިޔައީ އުފާވެރި އަމާން ރާއްޖެ މެނިފެސްޓޯގެ ޒުވާނުންގެ ސިޔާސަތުތައް ހާމަކުރެވިގެން ދިޔަ މަންޒަރު، އާދެ ރާއްޖޭގެ ތާރީޚުގަވެސް އެއްވެސް ރިޔާސީ ކެންޑިޑޭޓަކު ހުށައެޅުއްވި އެންމެ އިންޤިލާބީ އެންމެ އީޖާދީ ޒުވާނުންގެ މެނިފެސްޓޯ މިރޭމި ފެނިގެންދިޔައީ" އިޢާދު ވިދާޅުވިއެވެ.

އިޢާދު ވިދާޅުވީ ދިވެހި ޒުވާނުންނަށް އެންމެ ބޮޑު އުއްމީދެއް ގެނެސްދިނީ މިސަރުކާރުން ކަމަށެވެ. މިއާއިއެކު ޒުވާނުންނަށް އެންމެ ގިނަ ފުރުސަތުތައް ފަހިކޮށްދިނީ ވެސް މިސަރުކާރުން ކަމަށް އެނާ ވިދާޅުވިއެވެ.

މިސަރުކާރުން ޒުވާނުންނަށް ފަހިކޮށްދެއްވި އެންމެ ރަނގަޅު ފުރުސަތަކީ ހިލޭ ޑިގްރީގެ ފުރުސަތު ކަމަށާއި، މީގެ ކުރީގައި ޑިގްރީ ހާސިލް ކުރުމަކީ ހަމައެކަނި ތަނަވަސް ކަން ލިބިފައިވާ ޢާއިލާތަކަށް ނިސްބަތްވާ ޒުވާނުންނަށް އެކަނި ލިބޭ ފުރުސަތެއް ކަމަށެވެ. އިޢާދު ވިދާޅުވީ ޑިގްރީ ހާސިލް ކުރަން ބޭނުން ޒުވާނުން މިހާރު ފައިސާއާއި ދޭތެރޭ ވިސްނާކަށް ނުޖެހޭ ކަމަށެވެ.

ފަތުރުވެރިކަމުގެ ދާއިރާގައި މަސައްކަތް ކުރާ ފަރާތްތަކަށާއި އެހެނިހެން ދާއިރާތަކުގެ  ފަރާތްތަކަށް މިސަރުކާރުން ގެނެސްދިން އެންމެ އުފާވެރި ކަމަކީ މިނިމަމް ވޭޖް ކަމަށް އިޢާދު ވިދާޅުވިއެވެ. އިތުރަށް އޭނާ ވިދާޅުވީ ރާއްޖޭގައި މީގެ ކުރިންވެސް ސަރުކާރު ތަކަކުން ވެރިކަން ކޮށްފި ކަމަށާއި ނަމަވެސް އެއްވެސް އެހެން ސަރުކާރަކަށް މިނިމަމް ވޭޖް ގެ ކަންކަން ކުރަން ނުކެރުނު ކަމަށެވެ. އެކަން ކުރައްވަން ކެރި ވަޑައިގަތް ހަމައެކަނި ވެރިޔަކީ ރައީސް ޞާލިޙް ކަމަށް އިޢާދު ވިދާޅުވިއެވެ. އަދި ފަތުރުވެރިކަމުގެ ދާއިރާގައި މަސައްކަތްކުރާ ފަރާތަކަށް ލިބެން ޖެހޭ ސާވިސް ޗާޖު ޤާނޫނަކުން ޔަޤީން ކޮށްދެވިފައިވާ ކަމަށްވެސް އޭނާ ވިދާޅުވިއެވެ.

ވެލިދޫގައި ބޭއްވުނު ޖަލްސާގައި ރައީސް ޞާލިޙާއި އެކު ކޯލިޝަންގެ ޕާޓީތަކުގެ ބައެއް ލީޑަރުން ވެސް ބައިވެރިވެފައިވެއެވެ.