މިއަހަރުގެ ރިޔާސީ އިންތިޚާބުގައި ޕްރޮގްރެސިވް ކޮންގްރެސް ކޯލިޝަން ތަމްސީލުކުރައްވާ ޕީއެންސީގެ ރިޔާސީ ކެންޑިޑޭޓު ޑރ މުޙައްމަދު މުއިއްޒަށް ހއ ދިއްދޫއިން ހޫނު މަރުހަބާއެއް ކިޔައިފި އެވެ.

ޑރ މުއިއްޒު ދިއްދޫއަށް ވަޑައިގެންފައި ވަނީ މިއަދު ހަވީރުގެ ވަގުތެއްގަ އެވެ. އެމަނިކުފާނު އެރަށަށް ވަޑައިގަތުމާއެކު އެރަށުން ވަނީ ވަރަށް ހޫނު މަރުހަބާއެއް ދަންނަވާފަ އެވެ.

ގިނަ އަދަދެއްގެ ބަޔަކު ޑރ މުއިއްޒުގެ އިސްތިގުބާލުގައި ތިބިތަން ފެނިގެން ގޮސްފައިވެއެވެ. އަދި ދިއްދޫ ވަރަށް ބޮޑަށް ޑރ މުއިއްޒުގެ އިސްތިގުބާލަށް ޒީނަތްތެރިކޮށްފައިވާ ތަން ވެސް ވަނީ ފެނިގެން ގޮސްފަ އެވެ. އޭގެ އިތުރުން އެމަނިކުފާނަށް މަރުޙަބާ ދެންނެވުމަށްޓަކައި ސަގާފީ ކުޅިވަރު ހަރަކާތެއް ވެސް ކުރިއަށް ގެންދިޔަ އެވެ.

ޑރ މުއިއްޒަށް މަރުހަބާ ދެންވުމަށް ދިޔަ ދޮށީއުމުރުގެ ބޭފުޅަކު ޝުއޫރު ފާޅުކުރަނީ

ޑރ މުއިއްޒު ދިއްދޫއަށް ވަޑައިގެންފައިވާއިރު، މިރޭ އެރަށުގައި ބޮޑު ޖަލްސާއެއް ބޭއްވުމަށް ވެސް ވަނީ ހަމަޖެހިފައެވެ. މި ޖަލްސާގައި ދިއްދޫއަށް ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި ކޮށްދެއްވާނެ މުހިންމު ކަންތައްތަކަށް ވެސް އަލިއަޅުވާލައްވާނެ އެވެ.

ޑރ މުއިއްޒު ބޮޑު ތިލަދުންމައްޗަށް ކުރައްވާ މި ދަތުރުފުޅުގައި ދިއްދޫއަކީ ފަހު މަންޒިލެވެ.

މި ދަތުރުފުޅަށް ބަލާއިރު ހއ ހދ ގެ ގިނަ ރަށްތަކަށް އެމަނިކުފާނު ވަނީ ވަޑައިގެންފަ އެވެ. އަދި އެ އަތޮޅަށް ކޮށްދެއްވާނެ ގިނަ ކަންތައްތަކާއި ގެންގުޅުއްވާނެ ތަރައްގީގެ ސިޔާސަތު އެމަނިކުފާނު ވަނީ ސާފުކޮށްދެއްވާފަ އެވެ.

ޑރ މުއިއްޒުގެ އިސްތިގުބާލުގައި ތިއްބެވި ފަރާތްތަކާއި ސަލާންކުރެއްވުމުގެ ތެރެއިން 

ތިލަދުންމަތީގެ ހުރިހާ ރަށަކުން ވެސް ޑރ މުއިއްޒަށް ވަރަށް ހޫނު މަރުހަބާއެއް ދަންނަވާފައިވާއިރު، އިދިކޮޅުން ގެންދަނީ ރާއްޖޭގެ އެކި ސަރަހައްދުތަކުގަޔާއި މާލެ ސަރަހައްދުގައި ވެސް ހުއްޓުމެއް ނެތި ކެމްޕޭނު ހަރަކާތްތައް ކުރިއަށް ގެންދަމުންނެވެ.

އިދިކޮޅުން ބުނާ ގޮތުގައި ރައްޔިތުން ތިބީ ރައީސް ޔާމިނުގެ ތަރައްގީގެ ފިކުރާއި އެއްކޮޅަށް ވޯޓުދޭން ތައްޔާރަށެވެ. އަދި ރިޔާސީ އިންތިޚާބު އެއްބުރުން ކާމިޔާބުކުރެވޭނެ ކަމުގެ ޔަގީންކަން ވެސް އޮތްކަމަށް އިދިކޮޅުން ދަނީ ބުނަމުންނެވެ.