ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓް (އެޗްއައިސީޑީޕީ) ގެ ދަށުން ރާއްޖޭގައި ހިންގުމަށް ހަމަޖެހިފައިވާ 9 މަޝްރޫއުއަކަށް 5.95 މިލިއަން ރުފިޔާގެ ހިލޭ އެހީ އިންޑިއާ އިން ދީފިއެވެ.

މިކަމާއި ގުޅިގެން ރާއްޖޭގައި ހުންނަ އިންޑިއާ ހައިކޮމިޝަނުން ބުނީ، މި އެއްބަސްވުންތަކުގައި ސޮއިކުރެވިފައިވަނީ ރާއްޖޭގެ ހާރިޖީ ވަޒީރު އަބްދުالله ޝާހިދު، މިދިޔަ ޖުލައި 11 ގައި އިންޑިއާ އަށް ކުރެއްވި ދަތުރުފުޅުގައި ކަމަށެވެ. 

އަދި މި 5.95 މިލިއަން ރުފިޔާގެ އެހީ ދީފައިވާ މަޝްރޫއުތަކުން މުޖުތަމައު އަށް ފައިދާ ކުރާނެ ކަމަށްވެސް ހައި ކޮމިޝަނުން ބުނެފައިވެއެވެ.

މި ނުވަ މަޝްރޫއުތަކުގެ ތެރޭގައި ހިމެނެނީ:

1- ރ. އުނގޫފާރު ހޮސްޕިޓަލްގައި މެންޓަލް ޔުނިޓް ތަރައްގީ ކުރުން.

2- ށ. ކަނޑިތީމުގަައި ވޮލީބޯޅަ ކޯޓެއް ތަރައްގީ ކުރުން.

3- މ. ދިއްގަރުގައި ގޭދޮށު މަސް ޕްލާންޓް ބެހެއްޓުން.

4- ށ. ފޯކައިދޫ ކޮމިއުނިޓީ ސެންޓަރަށް ފަރުނީޗަރާއި އިކުއިޕްމަންޓް ހޯދުން.

5- ތ. ވިލުފުށީ ސްކޫލް ޑިޖިޓަލައިޒޭޝަން ޕްރޮގްރާމް.

6- ފ. ނިލަންދޫ ހޮސްޕިޓަލް އަޕްގްރޭޑް ކުރުން.

7- ސްކޫލްތަކުގެ ކޮމްޕިއުޓަރ ލެބް އަޕްގްރޭޑް ކުރުން.

8- އުތީމުގަނޑުވަރުގެ ފުރާޅު ހިމާޔަތްކުރުމާއި ގަނޑުވަރުގެ ވަށައިގެންވާ ސަރަހައްދު ތަރައްގީކުރުން.

9- ގއ. ކޮނޑޭގައި މަގުބައްތި ހަރު ކުރުން.

އިންޑިޔާ ހައިކޮމިޝަނުން އިތުރަށް ބުނީ، ރާއްޖޭގައި ކޮމިއުނިޓީ ޑިވެލޮޕްމަންޓް ޕްރޮޖެކްޓްތައް ހިންގުމަށް އެ ސަރުކާރުން ޖުމްލަ 361 މިލިއަން ރުފިޔާގެ ހިލޭ އެހީ ކަނޑައަޅާފައިވާ ކަަމަށެވެ. އަދި ދިވެހި ޚާރިޖީ ވުޒާރާއާއި ކަމާއި ބެހޭ އެހެން ވުޒާރާތަކާއި، ލޯކަލް ގަވަރމަންޓްތަކާ ގުޅިގެން ރާއްޖޭގެ 21 އަތޮޅެއްގައި 65 މަޝްރޫޢެއް އިންޑިއާ އިން ހިންގަމުން އަންނަ ކަންވެސް ފާހަގަކޮށްފައިވެއެވެ.

އޭގެ ތެރޭގައި ތެރޭގައި ކުޅިވަރާއި، ތައުލީމާއި، ސިއްހީ ދާއިރާއާއި، މަދަނީ ވަސީލަތްތަކާއި، މަސްވެރިކަމާއި، ފަތުރުވެރިކަމާއި، ސަގާފީ ދާއިރާ ފަދަ ދާއިރާތައް ހިމެނޭ އިރު އޭގެ ތެރެއިން 27 މަޝްރޫއެއްގެ މަސައްކަތް މިހާރު ނިމިފައިވާ ކަމަށާ އަދި ފަސް މަޝްރޫއެއް ވަނީ ނިމުމާ ގާތްވެފައިވާ ކަމަށް އެ ބަޔާނުގައި ވެއެވެ..