ވެރިކަން ކޮށްދެއްވާނީ ވަކި ސިޔާސީ ޕާޓީއަކަށް ނޫން ކަމަށާއި، ރައްޔިތުންގެ މެދުގައި ހަމަހަމަކަން ޤާއިމްކުރައްވާނެ ކަމުގެ ޔަގީންކަން ދެއްވާކަމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ވިދާޅުވެއްޖެ އެވެ. 

ޑރ މުއިއްޒު މިފަދައިން ވިދާޅުވެފައި ވަނީ އެމަނިކުފާނު ތިލަދުންމައްޗަށް ކުރައްވާ ކެމްޕޭނު ދަތުރުފުޅުގައި ހއ ކެލާއަށް ވަޑައިގެން ރައްޔިތުންނާއި މުޚާތަބުކުރައްވާ ވާހަކަދައްކަވަމުން ނެވެ. 

އެގޮތުން ޑރ މުއިއްޒު ވިދާޅުވީ ރައްޔިތުންނަށް ޚިދުމަތްކުރާނީ އަދުލުވެރިކަމާއި އެކުގައި ކަމަށެވެ. ވަކި ސިޔާސީ ޕާޓީއަކަށް ވީތީ، ނުވަތަ ސިޔާސީ ފިކުރު ތަފާތުވެގެން އެމީހަކާއި ދޭތެރޭ ތަފާތު ގޮތަކަށް އަމަލު ނުކުރައްވާނެކަމަށް ޑރ މުއިއްޒު ވިދާޅުވި އެވެ. އަދި ވިދާޅުވީ ތަރައްގީއަކީ ރައްޔިތުންގެ މެދުގައި ހަމަހަމަކަމާއެކު ގެންގަން ޖެހޭ އެއްޗެއްކަމަށް ދެކިވަޑައިގަންނަވާ ކަމަށެވެ. 

Advertisement

ޑރ މުއިއްޒު ވިދާޅުވީ ޕްރޮގްރެސިވް ކޮންގްރެސް ކޯލިޝަންގެ ވެރިކަން ވެގެންދާނީ ޤާނޫނުގައި ބަޔާންކޮށްފައިވާ ގޮތަށް ރައްޔިތުންނަށް ޚިޔާލުފާޅުކުރުމުގެ މިނިވަންކަމާއި، އެއްވެ އުޅުމުގެ މިނިވަންކަން ދޭނެ ވެރިކަމަކަށް ކަމަށެވެ. 

ރައްޔިތުންގެ އަޑު އައްސަވާނެ ކަމަށާއި، ރައްޔިތުންގެ ޚިޔާލާއި ޝުއޫރު ފާޅުކުރުމުގެ ފުރުސަތުވެސް ދެއްވާނެކަމަށް ޑރ މުއިއްޒު ވިދާޅުވި އެވެ. އެމަނިކުފާނު ވިދާޅުވީ ބަދަލު ހިފުމާއި އަނިޔާވެރިކަން ނިމުމަކަށް ގެންނަން ޖެހޭ ކަމަށެވެ.

ސިޔާސީ ގޮތުން ޚިޔާލު ތަފާތުވުމަކީ ރައްޔިތުންނާއި ގުޅުން ކަނޑާލަން ޖެހޭ ސަބަބެއް ނޫން ކަމަށާއި، ސަރުކާރުން ފޯރުކޮށްދޭ ޚިދުމަތްތައް ފޯރުކޮށްދޭން ޖެހޭނީ އޯގާތެރި ކަމާއެކު އެންމެނަށް ވެސް އޭގެން ހިއްސާވާ ގޮތަށް ކަން ޑރ މުއިއްޒުގެ ވާހަކައިގައި ފާހަގަކުރެއްވި އެވެ. 

އެމަނިކުފާނު މިފަދައިން ވިދާޅުވެފައި ވާއިރު، ކެލާއަށް އެމަނިކުފާނު ވަޑައިގަތުމުން، އެމަނިކުފާނާއި ދެކޮޅަށް މުޒާހަރާކުރި އެމްޑީޕީގެ ސަޕޯޓަރުންނާއި ވެސް ޑރ މުއިއްޒު ވަނީ ބައްދަލުކުރައްވާ ސަލާމްކުރައްވާފަ އެވެ.