ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން މާލެ ސަރަޙައްދުން ބަންޑާރަގޯތި ދޫކުރުމަށްޓަކައި ހިންގާ ބިންވެރިޔާ ސްކީމުގެ ދަށުން މާލެ ސަރަޙައްދުން ގޯތި ލިބޭ ފަރާތްތަކަށް ލިބޭ ގޯތި ކަނޑައެޅުމަށްޓަކައި ގުރުއަތު ނެގުން ފަށައިފިއެވެ.

ގޯތި ލިބޭ މީހުންނަށް ލިބޭ ގޯތި ކަނޑައެޅުމަށްޓަކައި ގުރު ނެގުން މިހާރު ގަލޮޅު ދަނޑު ތެރޭގައި ކުރިއަށް ދާއިރު، މި ގުރު ނެގުން މާދަމާ، 16 އޯގަސްޓް 2023 ގައިވެސް ގަލޮޅު ދަނޑުގައި ކުރިއަށްދާނެ ކަމަށް ޕްލޭނިންގ މިނިސްޓްރީން ބުނެއެވެ. އަދި 17 އޯގަސްޓް 2023 އިން ފެށިގެން ހެންވޭރު ފުޓްބޯޅަ ދަނޑުގައި ގުރުނެގުން ކުރިއަށް ގެންދިއުމަށް ހަމަޖެހިފަވާ ކަމަށް އެ މިނިސްޓްރީން ބުނެއެވެ. 

ޕްލޭނިންގ މިނިސްޓްރީން ބުނީ، ގުރުއަތު ނެގުމަށް ހާޒިރުވާނެ ތަނާއި ވަގުތު ގޯތި ލިބޭ ފަރާތްތަކުން " ގެދޮރުވެރިން ޕޯޓަލް" އަށް ވަނުމުން ފެންނާނެ ކަމަށާ ގުރުއަތު ލުމަށް ޙާޒިރުވާނީ ގޯތި ލިބޭ ފޯމުގެ 1 ބައިވެރިއެއް ކަމަށެވެ. އަދި ގޯތި ލިބޭ ފޯމުގެ އެއްވެސް ބައިވެރިއަކަށް ގުރުއަތުލުމަށް ހާޒިރުވެވެން ނެތްނަމަ ގުރުއަތު ނެގުމަށް ހާޒިރުވާނެ ފަރާތެއްގެ މައުލޫމާތު "ގެދޮރުވެރިން ޕޯޓަލް" މެދުވެރިކޮށް ހުށަހަޅުއްވަންވާނެ ކަމަށްވެސް އެ މިނިސްޓްރީން ބުނެއެވެ.

އަދި ކަނޑައަޅާފައިވާ ވަގުތެ ތެރޭގައި ގުރުއަތުލުމަށް ހާޒިރުނުވާ ފަރާތްތަކުގެ ގުރުއަތު ނެގުމަށް ހަމަޖެހިފައިވަނީ އެ މިނިސްޓްރީގެ ފަރާތުން އެކަމަށް ކަނޑައަޅާފައިވާ އޮފިޝަލެއް ކަންވެސް ފާހަގަކޮށްފައިވެއެވެ.

އެހެންކަމުން ގޯތި ލިބޭ ފޯމުގެ ބައިވެރިންގެ ތެރެއިން 1 ބައިވެރިއެއް ނުވަތަ ފޯމުގެ ބައިވެރިންގެ ފަރާތުން ކަނޑައަޅާ ފަރާތެއް، ގުރުއަތު ނެގުމަށް ހާޒިރުވުމަށް ހަމަޖެހިފައިވާ ވަގުތުގެ ތެރޭގައި ގުރުއަތުނެގުމަށް ހާއްސަކުރެވިފައިވާ ތަނަށް ހާޒިރުވުމަށް ޕްލޭނިންގ މިނިސްޓްރީން ވަނީ އެދިފައެވެ.