ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ހއ. ބާރަށަށް ކެންޕެއިނަށް ވަޑައިގެންނެވުމުން އެރަށު އެމްޑީޕީ ސަޕޯޓަރުން އޭނާއަށް ދަތިކުރަން މަސައްކަތް ކުރުމުން ހަމަނުޖެހުން ހިނގައިފި އެވެ. 

ޕީޕީއެމްގެ ރިޔާސީ ކެންޕެއިނަށް ޑރ. މުޢިއްޒު މިއަދު ވަނީ ބާރަށަށް ވަޑައިގެންފައެވެ. މުޢިއްޒު އެރަށަށް ވަޑައިގެންނެވުމާއިއެކު އެރަށު އެމްޑީޕީ ސަޕޯޓަރުން ވަނީ އޭނާއަށް އުނދަގޫ ވާގޮތަށް، އެމްޑީޕީ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ ކެންޕެއިން ޕޯސްޓަރު ބަނދަރުގައި ހަރުކޮށްފައެވެ. 

އޭގެ ސަބަބުން ދެ ޕާޓީގެ ސަޕޯޓަރުންގެ މެދުގައި ހަމަނުޖެހުން ހިނގައި، އެއްބަޔަކު އަނެއް ބައެއްގެ ގަޔަށް ބޮލަށް އަރާ ހިސާބަށް ގޮސްފައިވާއިރު, ގިނަ އަދަދެއްގެ ފުލުހުން ވަނީ އެތަނަށްގޮސް ހަމަނުޖެހުން ހިންގި މީހުން ދުރަށް ޖައްސައި، ކޮންޓްރޯލް ކުރުމަށް މަސައްކަތް ކޮށްފައެވެ. 

ބާރަށުގެ އިތުރުން، ޑރ. މުޢިއްޒު ހއ ކެލާއަށް ވަޑައިގެންނެވުމުން އެމްޑީޕީ ބައެއް ސަޕޯޓަރުންވަނީ އިހްތިޖާޖު ކޮށްފައެވެ. 

ނަމަވެސް މުޢިއްޒު ވަނީ އެ ސަޕޯޓަރުންގެ އަރިހަށް ވަޑައިގެން، އެ އެންމެނާއިވެސް ސަލާމްކުރައްވައި ރިވެތި ނަމޫނާ ދައްކަވާފައެވެ. އެއާއެކު ގިނަ ބަޔަކު އަންނަނީ އޭނާއަށް ތަޢުރީފުވެސް ކުރަމުންނެވެ.