މި ރިޔާސީ އިންތިޚާބުގައި ޕްރޮގްރެސިވް ކޮންގްރެސް ކޯލިޝަން ތަމްސީލުކުރައްވާ ރިޔާސީ ކެންޑިޑޭޓު ޑރ މުހައްމަދު މުއިއްޒުގެ ރަނިންމޭޓު ހުސެއިން މުޙައްމަދު ލަތީފަށް ފަރެސްމާތޮޑާއިން ހޫނު މަރުހަބާއެއް ކިޔައިފި އެވެ.

ހުސެއިން މުހައްމަދު ލަތީފަކީ ފަރެސްމާތޮޑާ ދާއިރާ ތަމްސީލުކުރައްވާ މަޖިލީސް މެމްބަރެވެ. ޑރ މުއިއްޒުގެ ރަނިންމޭޓުތަކަށް މެމްބަރު ހުސެއިން ހަމަޖެއްސެވީ އެ މަގާމުގައި ހުންނަވަނިކޮށެވެ.

ރިޔާސީ އިންތިޚާބުގެ ކެމްޕޭނަށް މެމްބަރު ހުސެއިން ފަރެސްމާތޮޑާއަށް މިއަދު ހަވީރު ވަޑައިގަތުމުން އެ ރަށުން ވަނީ ވަރަށް ހޫނު މަރުހަބާއެއް ކިޔާފަ އެވެ.

Advertisement

ގިނަ އަދަދެއްގެ ބަޔަކު ނިކުމެ އެމަނިކުފާނަށް މަރުހަބާ ދަންނަވާފައިވާއިރު، އެރަށް ވަރަށް ބޮޑަށް ޒީނަތްތެރިކޮށްފައިވާތަން ފެނިގެން ދިޔައެވެ. މެމްބަރު ހުސެއިން ވަނީ އޭނާގެ އިސްތިގުބާލުގައި ތިއްބެވި ހުރިހާ ފަރާތްތަކަާއި ސަލާން ކުރައްވާފަ އެވެ.

ފަރެސްމާތޮޑާގައި ކެމްޕޭނު ޖަލްސާއެއް ބޭއްވުމަށް ވަނީ ހަމަޖެހިފަ އެވެ.

ޑރ މުއިއްޒުގެ ރިޔާސީ ކެމްޕޭނަށް ރަނިންމޭޓު ފަރެސްމާތޮޑާއަށް ވަޑައިގެންފައިވާއިރު، މިއަދު ޑރ މުހައްމަދު މުއިއްޒު ވަނީ ތިލަދުންމައްޗަށް ކުރެއްވި އެމަނިކުފާނުގެ ކެމްޕޭނު ދަތުރުފުޅު ނިންމަވާލައްވާ އަނބުރާ މާލެ ވަޑައިގެންފަ އެވެ.

ދެން ޑރ މުހައްމަދު މުއިއްޒު ވަޑައިގަންނަވާނީ ދ އަތޮޅަށެވެ. އެ ދަތުރުފުޅުގައި ދ އަތޮޅުގެ އިތުރުން ފ، އަތޮޅާއި މ އަތޮޅު އަދި ވ އަތޮޅުގެ ރަށްތަކަށް ވެސް ވޑައިގަތުމަށް ވަނީ ހަމަޖެހިފަ އެވެ.