ގައުމު އަޅުދާސްތު ކުރި މީހަކު ތިމަންމެން ރައްޔިތުން ގާތަށް މި އަންނަނީ ރައްޔިތުން އެދޭ ކަންކަމާއިގެންނޭ ބުނަން ލަދު ނުގަނޭތޯ ވިދާޅުވެ ޢަލީ ރަމީޒުގެ ބަހުގެ ހަމަލާތަކެއް ދިފާއީ ވަޒީރު މާރިޔާ އަހުމަދު ދީދީ އަށް އަމާޒުކުރައްވައިފިއެވެ. 

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ކެންޕެއިން ކުރިއަށްދާ ގޮތާއި ގުޅޭގޮތުން މައުލޫމާތު ދެއްވަން އިއްޔެ ބޭއްވި ނޫސްވެރިންގެ ބައްދަލުވުމުގައި މާރިޔާ ވަނީ އިދިކޮޅު ކޯލިޝަނުގެ ރިޔާސީ ކެނޑިޑޭޓް ޑރ.މުހައްމަދު މުއިއްޒަކީ ޕީއެންސީ އާއި ސަލަފުގެ ކެނޑިޑޭޓެއް ކަމަށް ތަކުރާރުކޮށް ވިދާޅުވެފަ އެވެ. 

އެހެން ވިދާޅުވާ ސަބަބެއްގެ ގޮތުގައި މާރިޔާ ވިދާޅުވީ ޕީޕީއެމްގެ ބޭފުޅުންނަށް ވުރެ ބޮޑަށް، ވަކި ވަކިން ސަލަފު ޖަމިއްޔާގެ ބޭފުޅުން ޑރ. މުއިއްޒު އެންޑޯޒްކުރައްވާ ތަން ފެންނާތީ ކަމަށެވެ.

Advertisement

"އެހެންވީމާ އެގޮތަށް ފެންނަ ހެކިތަކަށް ބަލައި އަޅުގަނޑުމެން މި ދަންނަވަނީ ޕީއެންސީ ސަލަފުގެ ކެންޑިޑޭޓޭ،" މާރިޔާ ވިދާޅުވިއެވެ.

މީގެ އިތުރުން ވެސް މާރިޔާ ވަނީ، ރައްޔިތުންގެ ހާލު ބަލައި ރައްޔިތުންގެ ކަންކަން އެނގިގެން ވެރިކަމަށް ވާދަކުރައްވާ ހުންނެވި ހަމައެކަނި ކެންޑިޑޭޓަކީ ރައީސް ޞާލިހު ކަމަށާ، ޑރ. މުޢިއްޒު އަށް ރައްޔިތުންގެ ހާލުވެސް އެނގިވަޑައިނުގަންނަވާ ކަމަށެވެ. 

މާރިޔާގެ ބަހުގެ ހަމަލާތައް ސަލަފަށް އަމާޒުވުމާއި ގުޅިގެން އެކަމަށް ރައްދު ދެއްވައި އެ ޖަމިއްޔާގެ އަލީ ރަމީޒް ކުރެއްވި ޓްވީޓެއްގައި ވިދާޅުވީ، ދިފާއީ ވަޒީރުގެ މަގާމުގައި ހުރެ ބޭރު ގައުމެއްގެ ސިފައިން އަރައި ރާއްޖެ ހިފިދާނެ ކަމަށް ބުނެ، ގައުމު އަޅުދާސްތު ކުރި މީހަކު (މާރިޔާ) ތިމަންމެން ރައްޔިތުން ގާތަށް މި އަންނަނީ ރައްޔިތުން އެދޭ ކަންކަމާއިގެންނޭ ބުނަން ލަދު ގަންނަން ޖެހޭނެ ކަމަށެވެ.