މިދައުރަށް ވީ ވަޢުދުތައް ބަރާބަރަށް ފުއްދަވަމުން ގެންދަވާ ކަމަށާއި ރައްޔިތުން އެމަނިކުފާނަށް އިތުބާރުކުރެއްވުމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ރައީސް ޞާލިޙް މިހެން ވިދާޅުވީ ރިޔާސީ އިންތިޚާބުގެ ކެމްޕޭނަށް އަރިއުތުރަށް ކުރައްވަމުން ގެންދަވާ ދަތުރުފުޅުގައި އެއަތޮޅު ތޮއްޑޫއަށް ވަޑައިގެން އެރަށުގެ ރައްޔިތުންނާއި އެކު ބޭއްވެވި ބައްދަލުވުމުގައި ވާހަކަފުޅު ދައްކަވަމުންނެވެ.
"ވީ ވަޢުދުތައް އަޅުގަނޑުމެން މިއަންނަނީ ބަރާބަރަށް ފުއްދަމުން، ތިބޭފުޅުންގެ އަރިހުން އަޅުގަނޑު އެދެނީ އަޅުގަނޑުމެންނަށް އިތުބާރުކުރައްވާށޭ، ރިޔާސީ އިންތިޚާބެއް ބޯމަތިވެގެން އަންނަ އިރުގައި ތަފާތު ވަޢުދުތައް ތަފާތު ކެންޑިޑޭޓުން ވާނެ، މިރަށަށް ވެސް ވަޑައިގެން ވަޢުދުތައްވެސް ވެވަޑައިގަންނަވާނެ، އެހެންނަމަވެސް މާޒީގައި ކަންވެފަ އޮތްގޮތާއި މިހާރު ކަން ހިނގާގޮތް އެއީ ތިބޭފުޅުން މިނެ ކިރާލަން ޖެހޭނެ ކަމެއް" ރައީސް ޞާލިޙް ވިދާޅުވިއެވެ.
ރައީސް އިތުރަށް ވިދާޅުވީ މިފާއިތުވެގެން ދިޔަ ފަސްއަހަރުދުވަހުގެ ތެރޭގައި މިއިން ޒަމާނަކު ރާއްޖޭގެ ރަށްތައް ތަރައްޤީކުރުމަށްޓަކައި ނުކުރާވަރުގެ ބިޔަ ބޮޑެތި މަޝްރޫޢުތައް ކޮންމެ ރަށެއްގައިވެސް ހިނގަމުންދާކަމަށެވެ.
"އަޅުގަނޑުމެން ވަޢުދުވަނީ ވަޢުދު ފުއްދަން، އަޅުގަނޑުމެން ވަޢުދުވަނީ މިރާއްޖެ ބަދަލުކުރަން، އަޅުގަނޑުމެން ވަޢުދުވަނީ ތިބޭފުޅުންގެ ދިރިއުޅުން ބިނާކުރުމަށް، އެހެން އެއްވެސް އިތުރު ބޭނުމެއް އަޅުގަނޑުމެންގެ ނެތް"
ރައީސް އިބްރާހިމް މުޙައްމަދު ޞާލިޙް
ރައީސް ޞާލިޙް ވިދާޅުވީ ކުރިއަށް އޮތް ފަސް އަހަރަށްވެސް އޮތް ކަމަކީ ރައްޔިތުންނަށް ޓަކައި ވަޢުދުތައް ފުއްދެވުން ކަމަށެވެ. ރަށްރަށުގެ ރައްޔިތުން ބޭނުންވާ ތަރައްޤީގެ މަޝްރޫޢުތައް ބާރު ސްޕީޑުގައި ކުރިއަށް ގެންދިޔުން ކަމަށެވެ.
ރައީސް އަރިއުތުރަށް ކުރައްވަމުން މިގެންދަވާ ދަތުރުފުޅުގައި އއ ތޮއްޑޫ ގެ އިތުރުން އެއަތޮޅު ރަސްދޫ، ބޮޑުފޮޅުދޫ، މަތިވެރި، މާޅޮސް، ފެރިދޫ އަދި އުކުޅަހަށް ވަޑައިގަންނަވާނެއެވެ.
Advertisement
This content is created and paid for by advertisers and does not involve Voice Journalists
