ރިޔާސީ އިންތިޚާބުގެ އޮބްޒާވަރުންނާއި މޮނިޓަރުންގެ ގޮތުގައި ޖުމްލަ 8152 އެޕްލިކޭޝަނެއް ހުށައަޅައިފައިވާ ކަމަށް އިލެކްޝަންސް ކޮމިޝަނުން ބުނެފިއެވެ.

އީސީގެ ނައިބު ރައީސް އިސްމާއިލް ޙަބީބް ކުރެއްވެވި ޓްވީޓެއްގައި ވިދާޅުވެފައިވަނީ ރިޔާސީ އިންތިޚާބު 2023 މޮނިޓަރ ކުރުމަށްޓަކައި، ރާއްޖޭގެ މީޑިއާތަކުން މޮނިޓަރުންގެ ގޮތުގައި، 4545 އެޕްލިކޭޝަން އަދި އިންތިހާބުގެ އޮބްޒާވަރުންގެ ގޮތުގައި، ސިޔާސީ ޕާޓީތަކުންނާއި، ޖަމްޢިއްޔާ ޖަމާޢަތްތަކުންނާއި އަމިއްލަގޮތުން ކުރިމަތިލެއްވި ބޭފުޅުންނާއެކު 3607 އެޕްލިކޭޝަން ލިބިފައިވާ ކަމަށެވެ.

މިއާއިއެކު އޮބްޒާވަރުންނާއި، މޮނިޓަރުންގެ ގޮތުގައި ، ޖުމްލަ 8152 އެޕްލިކޭޝަން ރާއްޖޭން އީސީ އަށް ލިބިފައިވާ ކަމަށް ޙަބީބް ވިދާޅުވެފައިވެއެވެ.

މީގެއިތުރުން ޙަބީބް ވިދާޅުވީ އެޕްލިކޭޝަންތަކުގެ މަޢުލޫމާތު ކަށަވަރުކޮށް އެކްރެޑިޓް ކުރުމުގެ މަސައްކަތް ކުރިޔަށް އެބަދާކަމަށެވެ.

"ރިޔާސީ އިންތިޚާބުގައި 574 ވޯޓުލާ މަރުކަޒު ގާއިމް ކުރެވޭއިރު، ކޮންމެ ވޯޓުލާ މަރުކަޒެއްގައި، ރާއްޖެއިން ގާތްގަނޑަކަށް 14 ބޭފުޅުން، އިންތިޚާބު އޮބްޒާވްކޮށް މޮނިޓަރ ކުރުމަކީ، އިންތިޚާބުގެ ކަންކަން ޤާނޫނާއި ޤަވާއިދުގެ އިމުގެ ތެރެއިން ކުރިޔަށް ގެންދިޔުމަށް، އީސީ އަށް ލިބިގެންދާ ވަރަށްބޮޑު ހިތްވަރެއް، އަދި ހިތްހަމަ ޖެހުމެއް" ޙަބީބް ވިދާޅުވެފައިވެއެވެ.

އީސީގެ ނައިބު ޙަބީބް ވިދާޅުވީ ރާއްޖޭގެ މޮނިޓަރުންނާއި، އޮބްޒާވަރުންގެ އިތުރުން، އިންޓަރނޭޝަނަލް އޮބްޒާވަރުންނާއި މޮނިޓަރުންގެ އޮބްޒަރވޭޝަންތަކާއެކު، ރިޔާސީ އިންތިޚާބު 2023 ވެގެންދާނީ، އެންމެ ރަނގަޅަށް، އެންމެ ގިނަ އަދަދެއްގެ ބޭފުޅުން، އޮބްޒާވްކޮށް މޮނިޓަރ ކުރެވޭނެ އިންތިޚާބަށް ކަމަށެވެ.

ސެޕްޓެމްބަރު 9 ވަނަ ދުވަހު ރިޔާސީ އިންތިޚާބު ބޭއްވުމަށް ހަމަޖެހިފައިވާއިރު އިންތިޚާބުގައި 8 ކެންޑިޑޭޓަކު ވާދަކުރެއްވުމަށް ވަނީ ނަން ހުށައަޅުއްވައިފައެވެ. އެއީ އަމިއްލަ 3 ކެންޑިޑޭޓަކާއި 5 ޕާޓީ އަކުން ވާދަކުރައްވާ 5 ކެންޑިޑޭޓެކެވެ.