މިހާރު ކުރިއަށްދާ ނޯތު އަދި ސެންޓްރަލް އެމެރިކާގެ ލީގު ކަޕް ފުޓްބޯޅަ މުބާރާތުގެ ސެމީ ފައިނަލުގެ ފުރަތަމަ މެޗުގައި 4-1 ގެ ނަތީޖާއަކުން ފިލަޑެލްފިއާ ޔޫނިއަން ބަލިކޮށް މުބާރާތުގެ ފައިނަލުގެ ފުރަތަމަ ޖާގަ އިންޓަ މިއާމީ އިން ހޯދައިފިއެވެ. އަދި މިއީ މި މުބާރާތުގެ ފައިނަލުން އިންޓަ މިއާމީ ޖާގަ ހޯދި ފުރަތަމަ ފަހަރެވެ.

މި މެޗުގެ ފުރަތަަމަ ހާފުގައި އިންޓަ މިއާމީ އިން ތިން ލަނޑުގެ ލީޑެއް ހޯދި އިރު، އެޓީމުގެ ފުރަތަމަ ލަނޑު މެޗު ފެށިގެން ތިންވަނަ މިނެޓުގައި ކާމިޔާބުކޮށްދިނީ ވެނަޒުއޭލާގެ ފޯވާޑް ޖޯސެފް މާޓިނޭޒް އެވެ. އަދި އެޓިމުގެ ދެވަނަ ލަނޑު ފުރަތަމަ ހާފުގެ 20 ވަނަ މިނެޓުގައި މާޓިނޭޒް ތަނަވަސްކޮށްދިން ފުރުސަތެއްގައި ކާމިޔާބުކޮށްދިނީ އެޓީމުގެ ކެޕްޓަން ލިއޮނަލް މެސީ އެވެ. މިއީ މި މުބާރާތުގައި ކުޅުނު ހަމެޗުގައި މެސީ ކާމިޔާބުކުރި 9 ވަނަ ލަނޑެވެ.

މީގެ އިތުރުން މިއީ މެސީގެ ފުޓްބޯޅަ ކެރިއަރުގައި މިހާތަނަށް އެންމެ ދުރުން ކާމިޔާބުކުރި ލަނޑެވެ. މިއީ ފިލަޑެލްފިއާ ޔޫނިއަން ގެ ގޯލާއި 32 މީޓަރު ދުރުގައި ހުރެ ތިރިތިރިން ފޮނުވާލި ބާރު ހަމަލާއެއް ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މި މެޗުގައި އިންޓަ މިއާމީގެ ތިންވަނަ ލަނޑު ފުރަތަަމަ ހާފުގެ އިތުރު ވަގުތުގެ ތެރޭގައި ކާމިޔާބުކޮށްދިނީ ތަޖުރިބާކާރު ޑިފެންޑަރު ޖޯޑީ އަލްބާ އެވެ. މިއީ އެޓީމުގެ ފިންލޭންޑް މިޑްފީލްޑަރު ރޮބަޓް ޓެއިލަރ މުޅިން ހުސްކޮށްލާފައި ޖައްސާލި ބޯޅައެއް ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 3-0 ގެ ނަތީޖާއަކުން އިންޓަ މިއާމީ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ފިލަޑެލްފިއާ ޔޫނިއަން އެޓީމުގެ ކުޅުން ރަނގަޅުކޮށް އެޓޭކުތައް ވަރުގަދަކުރިއިރު، މި މެޗުގައި އެޓީމުން ކާމިޔާބުކުރި ހަމައެކަނި ލަނޑު ދެވަނަ ހާފުގެ 73 ވަނަ މިނެޓުގައި ކާމިޔާބުކޮށްދިނީ އެޓީމުގެ އަލެޖަންޑްރޯ ބެޑޯޔާ އެވެ.

މި މެޗުގައި އިންޓަ މިއާމީގެ ހަތަރުވަނަ ލަނޑު ދެވަނަ ހާފުގެ 84 ވަނަ މިނެޓުގައި ކާމިޔާބުކޮށްދިނީ އެޓީމުގެ ޒުވާން މިޑްފިލްޑަރު ޑޭވިޑް ރުއިޒް އެވެ. މިލަނޑާއެކު މެޗުގެ ކުޅުން ނިމިގެންދިޔައީ 4-1 ގެ ނަތީޖާއަކުން އިންޓަ މިއާމީ ކުރީގައި އޮވެގެންނެވެ.

މުބާރާތުގެ ފައިނަލްގައި އިންޓަ މިއާމީ ވާދަކުރަން ޖެހޭނީ ނެޝްވިލް އެސްސީ އާއި ދެކޮޅަށެވެ. މި މެޗު ކުޅުމަށް ހަމަޖެހިފައިވަނީ މި މަހުގެ 20 ވަނަ ދުވަހުގެ ހެނދުނު 6:00 ގައެވެ.