މީގެ ކުރީގެ ސަރުކާރުތަކުގެ ޗާޓަށް ކުދި އާބާދީތައް ދިރިއުޅޭ ރަށްރަށް ނާރާ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް މިހެން ވިދާޅުވީ ރިޔާސީ އިންތިޚާބުގެ ކެމްޕޭނަށް އަރިއުތުރަށް ކުރައްވަމުން ގެންދަވާ ދަތުރުފުޅުގައި އެއަތޮޅު މަތިވެރި އަށް ވަޑައިގެން އެރަށު ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.

ރައީސް ޞާލިޙް ވިދާޅުވީ 2008 ވަނަ އަހަރު އެމްޑީޕީގެ ވެރިކަމުގައި މަތިވެރިއަށް ކޮންމެވެސް ވަރަކަށް ކަންތައްތަކެއް ކޮށްދެވުނު ނަމަވެސް 2013 އިން 2018 އަށް އައި ސަރުކާރުގައި އަޅާނުލެވި ދިޔަ ކަމަށެވެ.

"މީޔަކީ އެއް ހަމައެކަނި މަތިވެރިއަށް ދިމާވެފައި އޮތް މައްސަލައެއް ނޫން، ރާއްޖޭގެ ގިނަ ރަށްތަކުގެ ޙާލަކީ މިއީ، އަދި ޚާއްސަކޮށް އާބާދީ ކުޑަ ވެއްޖެނަމަ އެއްގޮތަކަށްވެސް ޗާޓަކަށް ނާރާ، އެހެންނަމަވެސް އަޅުގަނޑުމެން ޖަޒީރާ ރާއްޖެގެ ތަޞައްވުރަކާއި އެކީގަ ނުކުތީ  މިކަންތައްތައް ބަދަލު ކުރަން، އެމްޑީޕީގެ އަބަދުގެވެސް ސިޔާސަތަކީ ޖަޒީރާ ރާއްޖެއެއްގެ ގޮތުގައި ރާއްޖެ ތަރައްޤީ ކުރުން" ރައީސް ޞާލިޙް ވިދާޅުވިއެވެ.

ރައީސް ވިދާޅުވީ އޭރު ހުށައެޅި މެނިފެސްޓޯއާއި އެއްގޮތަށް ގިނަ މަސައްކަތްތަކެއް ދަނީ ކުރެވެމުން ނިމެމުން ކަމަށެވެ. އަދި މަތިވެރިންވެސް މިހާރު ފެންނަމުން ދަނީ އެމަންޒަރުކަމަށް ރައީސް ވިދާޅުވިއެވެ.

ރައީސް ޞާލިޙް މަތިވެރީ ރައްޔިތުންނާއި މުޚާތަބު ކުރައްވައި ވާހަކަދައްކަވަމުން ވިދާޅުވީ 2018ގައި މަތިވެރިއަށް ކޮށްދެއްވަން ވަޢުދުވެވަޑައިގަތް ހުރިހާ ކަމެއް ދައުރު ނިމުމުގެ ކުރިން ކޮށްދެއްވައި ނިންމަވާނެ ކަމަށެވެ.

"އަޅުގަނޑުގެ އިލްތިމާސަކީ، އަޅުގަނޑުގެ އެދުމަކީ މަތިވެރީގެ ރައްޔިތުން ނުކުމެ ވަޑައިގެން ތަރައްޤީއާއި އެކީގައި އުފާވެރި އަމާން ރާއްޖެއެއް ހޯދުމަށް އަޅުގަނޑުމެން މިކުރާ މަސައްކަތުގައި ބައިވެރިވެޑައިގެން އަޅުގަނޑަށް ވޯޓު ދެއްވުން" ރައީސް ޞާލިޙް ވިދާޅުވިއެވެ.

ރައީސް އިތުރަށް ވިދާޅުވީ ކުރިން މަތިވެރިއަށް ވެވަޑައިގެންނެވި ވަޢުދުތައް ފުއްދަވައިދެއްވި ގޮތަށް ކުރިއަށް އޮތް ތަނުގައިވެސް މަތިވެރިއަށްޓަކައި ވެވަޑައިގަންނަވާ ވަޢުދުތައް ފުއްދަވައި ދެއްވާނެ ކަމަށެވެ.

އަރިއުތުރަށް ރައީސް ކުރައްވަމުން ގެންދަވާ ދަތުރުފުޅުގައި ތޮއްޑޫ، ރަސްދޫ، ބޮޑުފޮޅުދޫ، މަތިވެރި، މާޅޮސް، ފެރިދޫ އަދި އުކުޅަހަށް ވަޑައިގަތުމަށް ވަނީ ހަމަޖެހިފައެވެ.