އޭއެފްސީ ކަޕް ފުޓްބޯޅަ މުބާރާތުގެ ޕްލޭއޮފް ބުރުގައި ބަންގްލަދޭޝަގެ އަބަހާނީ ލިމިޓެޑް އަތުން ބަލިވެ ރާއްޖެ ކުލަބު އީގަލްސް މުބާރަތުން ކަޓައިފި އެވެ. މި މެޗު އަބަހާނީ އިން ކާމިޔާބުކުރީ ފަހުވަގުތު ކާމިޔާބުކުރި ލަނޑާއެކު 2-1 ގެ ނަތީޖާއަކުން ނެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ އަބަހާނީ އިންނެވެ. މިލަނޑު އެޓީމަށް ކާމިޔާބުކޮށްދިނީ ކުރިން ރާއްޖޭގެ މާޒިޔާ ސްޕޯޓްސް އެންޑް ރެކްރިއޭޝަން ކްލަބަށް ކުޅުނު މިޑްފީލްޑަރު  ކޯނޭލިއަސް ސްޓެވާޓް އެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން އަބަހާނީ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ކުލަބު އީގަލްސް އިން އެޓީމުގެ ކުޅުން ރަނގަޅުކޮށް އެޓޭކުތައް ވަރުގަދަކުރިއިރު، މިމެޗުގައި އެޓީމުން ނަތީޖާ އެއްވަރުކުރި ލަނޑު ފަހުހާފުގެ 63 ވަނަ މިނެޓުގައި ކާމިޔާބުކޮށްދިނީ އެޓީމުގެ ކެޕްޓަން ރިޒްވާން އެވެ.

މިމެޗުން ޑާކާ އަބަހާނީ މޮޅުވި ލަނޑު މެޗު ނިމެން މިނެޓަކަށް ވެފައިވަނިކޮށް ކާމިޔާބުކޮށްދިނީ އެޓީމުގެ ބްރެޒިލް ޑިފެންޑަރު ޑެނީލޯ އަގަސްޓޯ އެވެ. މިލަނޑާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން އަބަހާނީ ކުރީގައި އޮވެގެންނެވެ.

މި މެޗުން ބަލިވެ އީގަލްސް މުބާރާތުން ކަޓާފައިވާއިރު، ދިވެހި ޕްރެމިއާ ލީގުގައި މިވަގުތު އެޓީމު އޮތީ ދެވަނައިގައެވެ. ލީގުގައި އެޓީމު އެންމެ ފަހުން މާޒިޔާ އާއި ދެކޮޅަށް ކުޅެން އޮތް މެޗު މި މެޗަށް ތައްޔާރުވުމަށް އެޓީމަށް ވަގުތު ދިނުމުގެ ގޮތުން ފަސްކުރެވުފައިވާއިރު، ދިވެހި ޕްރެމިއާ ލީގުގެ މިހަފްތާގައި ކުޅުމަށް ތާވަލުކުރެވިފައިވާ މެޗުތައް ވެސް ވަނީ ކެންސަލް ކުރެވިފައެވެ.