އެމްޑީޕީ ކޯލިޝަންގެ ސިޔާސަތުތައް ތަންފީޒުވެގެން ދާއިރު ކޮންމެ ރަށެއްގެ ކައިރީ ދަތުރު ދެވޭނެ ރަށެއް ހައްދަވައި ދެއްވާނެ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ރައީސް ޞާލިޙް މިހެން ވިދާޅުވީ އަރިއުތުރަށް ކުރައްވަމުން ގެންދަވާ ކެމްޕޭނު ދަތުރުފުޅުގައި މާޅޮހަށް ވަޑައިގެން މާޅޮހުގެ ރައްޔިތުންނާއި ބައްދަލުކުރައްވައި ވާހަކަ ދައްކަވަމުންނެވެ.
"އަޅުގަނޑު މިރަށަށް އައިން މިރަށުގަ ބަނދަރެއް ނެތް އިރުވެސް، ކުޑަ ބަނދަރެއް އޮތް އިރުވެސް، އަދި މިހާރު މިއޮތް ބަނދަރު ހެދެމުން ދާއިރުވެސް، ރައްޔިތުން ބޭނުންވާގޮތައް ރައްޔިތުން ބޭނުންވާ ބަދަލުތަކާއި އެކީގައި އަޅުގަނޑުމެން އިރާދަކުރެއްވިއްޔާ އެމަސައްކަތް ކޮށް ނިންމާނަން، އެގޮތުން އެބަނދަރު ނިމޭއިރުގައި ލޯކަލް ބީޗަކާއި ދޯނި އެހެލާ ތަނެއް އެއާއި އެކީގައި ހެދިގެން ދާނެ" ރައީސް ވިދާޅުވިއެވެ.
ރައީސް އިތުރަށް ވިދާޅުވީ ރައްޔިތުން ބޭނުންވާ ބޯހިޔާ ވަހިކަމުގެ މައްސަލައަށް ހައްލެއް ހޯދުމަށްޓަކައި މާޅޮހުގައި އަޅުއްވައިދެއްވާނެ ކަމަށެވެ. އަދި އަމިއްލަ ގޯތީގައި ގެ އެޅުމަށް ބޭނުންވާ ފަރާތްތަކަށް، ގެދޮރު ހެދުމަށް ބޭނުންވާ ލޯނު ދިނުމަށް ޚާއްސަކޮށް ހަދާ ބޭންކުން ސޮފްޓް ލޯނު ދޫކުރަށްވާނެ ކަމަށްވެސް ރައީސް ވިދާޅުވިއެވެ.
މިއާއި އެކު މާޅޮހުގައި ޒަމާނީ ފެންވަރުގެ ބޮޑު ހުކުރު މިސްކިތެއް އަޅައިދެއްވާނެ ކަމަށާއި، ޒުވާނުން ބޭނުންވާހެން ކުޅިވަރުތައް ކުޅުމަށް ވޮލީ ކޯޓެއް އަޅައިދެއްވާނެ ކަމަށްވެސް ރައީސް ޞާލިޙް ވިދާޅުވިއެވެ.
"ސިއްޚީ ޚިދުމަތަކީ މިރަށުގައި ބަދަލު ކުރަން ޖެހިފައި އޮތް އެއް ދާއިރާ، ކުރިއަށް އޮތް ތަނުގައި ސިއްޚީ މަރުކަޒު ބޮޑުކޮށް އެސެންޓަރު 24 ގަޑިއިރަށް އަޅުގަނޑުމެން ބަދަލު ކޮށްދޭނަން، އެއާއި އެކީގައި އިތުރު ޚިދްމަތްތައް އެތަނުން ލިބޭ ގޮތް އަޅުގަނޑުމެން ހަދައިދޭނަން" ރައީސް ޞާލިޙް ވިދާޅުވިއެވެ.
ރައީސް ވިދާޅުވީ އެ ކޯލިޝަންގެ ސިޔާސަތުތައް ތަންފީޒުވެގެން ދާއިރު ކޮންމެ ރަށަކަށް ކައިރިން ޕިކްނިކް ދެވޭނެ ރަށެއް ހަދައިދޭ ކަމަށާއި، މާޅޮހަށްވެސް އެފަދަ ރަށެއް ހައްދަވައި ދެއްވާނެ ކަމަށް ރައީސް ޞާލިޙް ވިދާޅުވިއެވެ.
ރައްޔިތުން އެދޭ ގޮތައް މާޅޮހުގައި ގެސްޓުންނަށް ޚާއްސަ ބީޗެއް، ގޮނޑުދޮށް ހިމާޔަތް ކުރުމުގެ މަސައްކަތުގެ ތެރެއިން ހައްދަވައިދެއްވާނެ ކަމަށާއި އަދި މާޅޮހުގައި އިތުރު އައިސް ޕްލާންޓެއް ގާއިމް ކޮށްދެއްވާނެ ކަމަށް ރައީސް ޞާލިޙް ވިދާޅުވިއެވެ.
ރައީސް ވިދާޅުވީ ސެޕްޓެމްބަރ 9 ގައި ރައްޔިތުން ނިންމަވާ ނިންމެވުމާއި އެކު މާޅޮހުގެ ތަރައްޤީގެ މަޝްރޫޢުތައް ބާރު ސްޕީޑުގައި ކުރިއަށް ދާނެ ކަމަށެވެ.
އަރިއުތުރުގެ ދަތުރަށް ފަހު މާދަމާ ރައީސް ޞާލިޙާއި އެމަނިކުފާނުގެ ޓީމު ވަޑައިގަންނަވާނީ އަރި ދެކުނުގެ ރަށްތަކަށެވެ.
Advertisement
This content is created and paid for by advertisers and does not involve Voice Journalists
