ރައްޔިތުން ބޭނުންވަނީ ރައްޔިތުން ބޭނުންވާ ކަންކަން ކޮށްދޭ ސަރުކާރެއް ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް މިހެން ވިދާޅުވީ އެމަނިކުފާނު ރިޔާސީ އިންތިޚާބަށް ކެމްޕޭނު ކުރެއްވުމަށް އަރިއުތުރަށް މިއަދު ކުރައްވަމުންދާ ދަތުރުފުޅުގައި އެއަތޮޅު ފެރިދުއަށް ވަޑައިގެން ފެރިދޫގެ ރައްޔިތުންނާއި ބައްދަލުކުރައްވައި ވާހަކަފުޅު ދައްކަވަމުންނެވެ.

"ފެރިދޫއަކީ އެއްވެސް އިރެއްގައި އެމްޑީޕީގެ އެއްވެސް ކައުންސިލަރެއް އިންތިޚާބުވެފައި ހުރި ކައުންސިލެއް ނޫން، އެހެންނަމަވެސް މިއަދު ފެރިދޫގެ މުޅި ކައުންސިލް އޮތީ އެމްޑީޕީއަށް، ހުރިހާ ކައުންސިލަރުން އެމްޑީޕީއާއި ގުޅިވަޑައިގަންނަވައިފި، އަދި އެންމެފަހު ބޭއްވުނު ޑަބްލިޔު ޑީ ސީގެ ބައިއިލެކްޝަންގައި ފުރަތަމަ ފަހަރަށް އެމްޑީޕީއަށް ގޮނޑިއެއް ވަނީ ކަށަވަރުވެފައި، ހަމަޔަޤީނުންވެސް އޭގެން މިދޭހަވަނީ ވަޢުދުތަކެއްވެ ރައްޔިތުނަށް ކަންތައްތަކެއް ކޮށްދޭކަމަށް ވަންޏާ، އެކަން ޤަބޫލް ކުރާ ރައްޔިތުން ތިބޭ ކަން، ރައްޔިތުން ބޭނުންވަނީ ރައްޔިތުން އެބޭނުންވާ ކަންކަން ކޮށްދޭނެ ސަރުކާރެއް އޮންނަންކަން" ރައީސް ޞާލިޙް ވިދާޅުވިއެވެ.

ރައީސް ޞާލިޙް ވިދާޅުވީ މިސަރުކާރުން ވަޢުދުތައްވެ އެވަޢުދުތައް ފުއްދަމުން މިދަނީ ކުޑަރަށެއް ބޮޑު ރަށެއް ނުބަލައި ކަމަށެވެ. ރައްޔިތަކަށް ވީތީ ފޯރުކޮށްދޭންޖެހޭ ޚިދްމަތްތަކަކާއި ވަޞީލަތް ތަކެއް ހުރިކަން ޤަބޫލުކޮށް، އެއީ ސަރުކާރުގެ މައްޗަށް އޮތް ޒިންމާ އެއްކަމަށް ޤަބޫލުކޮށްގެން ކަމަށް ރައީސް ވިދާޅުވިއެވެ.

ރައީސް އިތުރަށް ވިދާޅުވީ މިރޭ އުކުޅަހުގައި ބޭއްވުމަށް ހަމަޖެހިފައިވާ ޖަލްސާގައި އަމާން މުޖްތަމަޢެއް ރާއްޖޭގައި ކުރިއަށް އޮތް ފަސް އަހަރު ތަންފީޒު ކުރާނެ ސިޔާސަތުތައް ތަޢާރަފްކުރެވިގެން ދާނެ ކަމަށެވެ.

އުކުޅަހަށް ކުރައްވާ ދަތުރުފުޅަށް ފަހު އަރިއުތުރުގެ ދަތުރު ނިންމަވައި މާދަމާ ރައީސް ދަތުރުކުރައްވާނީ އަރި ދެކުނަށެވެ. މާދަމާ އެންމެ ފުރަތަމަ ވަޑައިގަތުމަށް ހަމަޖެހިފައިވަނީ ހިމަންދޫއަށެވެ.