ރިޔާސީ ކެމްޕޭނަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމދު މުއިއްޒު ދ ކުޑަހުވަދޫއަށް ވަޑައިގަތުމުން އެ ރަށުން ހޫނު މަރުހަބާއެއް ކިޔައިފި އެވެ.

ޑރ މުއިއްޒު ކުޑަހުވަދޫއަށް ވަޑައިގެންފައިވަނީ މިއަދުގެ އިރުއޮއްސުނުހާއިރުގަ އެވެ. އެއަށްފަހު އެމަނިކުފާނަށް މަރުޙަބާދެންނެވުން އޮތީ ރިޔާސީ ކެމްޕޭނުގެ ޖަލްސާ ފެށުމުގެ ކުރިންނެވެ.

އެގޮތުން ޑރ މުއިއްޒަށް މަރުހަބާ ދެންނެވުމަށް ގިނަ އަދަދެއްގެ ބަޔަކު އެއްވެ ތިބިކަން ފާހަގަކޮށްލެވެއެވެ. އަދި ވަރަށް ހޫނު މަރުހަބާއެއް ސަޕޯޓަރުން ކިޔާފައިވާއިރު، އެ ސަޕޯޓަރުން ދިޔައީ އެއްބުރުން ޑރ މުޙައްމަދު މުއިއްޒު ހޮވާނެކަމަށް ބުނަމުންނެވެ.

ޑރ މުއިއްޒަށް މަރުހަބާ ދަންނަވަން ގޮސްތިބި ސަޕޯޓަރުންގެ ތެރެއިން މީހަކު "ވޮއިސް" އަށް ބުނީ ޑރ މުއިއްޒަށް ތާއީދުކުރައްވަނީ ރައީސް ޔާމިނު ދެއްކި ކެންޑިޑޭޓަށް ވީމަ ކަމަށެވެ.

ރައީސް ޔާމިނަކީ ކުޑަހުވަދޫއަށް އެމަނިކުފާނުގެ ވެރިކަމުގައި އިންގިލާބީ ތަރައްގީ ގެނެސްދެއްވި ލީޑަރެއް ކަމަށާއި، އެ ތަރައްގީ އަނބުރާ ގެނައުމަށް ރައީސް ޔާމިނުގެ އިރުޝާދާއި އެކު ކުރެވެން އޮތްކަމެއް ކުރާނެކަމަށް އޭނާ ބުންޏެވެ.

ޑރ މުއިއްޒަށް މަރުހަބާ ދެންނެވުމަށް ގޮސްހުރި އިތުރު މީހަކު ބުނީ އެމަނިކުފާނަށް ތާއީދު ކުރައްވަނީ މި ރިޔާސީ އިންތިޚާބުގައި ވާދަކުރައްވާ ކެންޑިޑޭޓުންގެ ތެރެއިން އެމަނިކުފާނު ފަދަ ގާބިލު ކެންޑިޑޭޓަކު ފެންނަން ނެތުމުން ކަމަށެވެ.

ޑރ މުއިއްޒަށް ކުޑަހުވަދޫއިން ހޫނު މަރުހަބާއެއް ކިޔާފައިވާއިރު، ކުޑަ ހުވަދޫގައި ބާއްވާ އެމަނިކުފާނުގެ ރިޔާސީ ކެންޕޭނުގެ ޖަލްސާގައި ވެސް ގިނަ އަދަދެއގެ ބަޔަކު ވަނީ ބައިވެރިވެވަޑައިގެންފަ އެވެ.