މިއަހަރުގެ ރިޔާސީ އިންތިޚާބުގައި ވާދަކުރައްވާ 8 ކެންޑިޑޭޓުންގެ ތެރެއިން ދިވެހިރާއްޖޭގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލަ ޙައްލުކުރައްވާނެ ގޮތް އެނގިވަޑައިގަންނަވާނީ ޕްރޮގްރެސިވް ކޮންގްރެސް ކޯލިޝަންގެ ރިރާސީ ކެންޑިޑޭޓު ޑރ މުޙައްމަދު މުއިއްޒުއަށް ކަމަށް ކުރީގެ އިކޮނޮމިކް މިނިސްޓަރު އަދި މީހަރު މަޖިލީހުގެ މާވަށު ދާއިރާގެ މެމްބަރު އަދި ޕީއެންސީގެ ނައިބު ރައީސް މުހައްމަދު ސައީދު ވިދާޅުވެއްޖެ އެވެ. 

ސައީދު މިފަދައިން ވިދާޅުވެފައި ވަނީ ކުޑަހުވަދޫގައި ބޭއްވި ޑރ މުއިއްޒުގެ ރިޔާސީ ކެމްޕޭނުގެ ޖަލްސާގައި ވާހަކަދައްކަވަމުން ނެވެ. 

އެގޮތުން ސައީދު ވިދާޅުވީ ސަރުކާރު ހިންގާ މައި ޕާޓީ އެމްޑީޕީން ބޯހިޔާވަހިކަމުގެ މައްސަލަ ޙައްލުކުރުމަށް ހަރުދަނާ ސިޔާސަތެއް ގެންގުޅެމުން ނުދާކަން ފާހަގަކުރެވޭ ކަމަށެވެ. ވެރިކަމުގައި ވެސް ބޯހިޔާވަހިކަން ފޯރުކޮށްދިނުމަށް ސަރުކާރަށް މަސައްކަތްކޮށްދެވިފައި ނުވާކަމަށް ސައީދު ވިދާޅުވި އެވެ. 

Advertisement

އޭގެ އިތުރުން ސައީދު ވިދާޅުވީ އެމްޑީޕީގައި ތިއްބެވުމަށްފަހު ނިކުމެ "ދަ ޑިމޮކްރެޓްސް" ގެ ނަމުގައި ޕާޓީއެއް އުފައްދައިގެން އުޅޭ ފަރާތްތަކުން ވެސް ބޯހިޔާވަހިކަމުގެ މައްސަލަ ޙައްލުކުރުމަށް ގެންގުޅުއްވަނީ އެކަށީގެންވާ ސިޔާސަތެއް ނޫން ކަމަށެވެ. 

އެހެން ނަމަވެސް ޑރ މުއިއްޒަކީ އެ މަސައްކަތްޕުޅު ކުރައްވާ، ކާމިޔާބު ނަތީޖާތަކެއް ނެރެދެއްވާފައިވާ ބޭފުޅެއްކަން ސައީދު ފާހަގަކުރެއްވި އެވެ. އަދި ވިދާޅުވީ މިއަހަރުގެ ރިޔާސީ އިންތިޚާބުގައި ވާދަކުރައްވާ ކެންޑިޑޭޓުންގެ ތެރެއިން ބޯހިޔާވަހިކަމުގެ މައްސަލަ ޙައްލުކޮށްދެއްވާނެ ގޮތް އެންމެ ރަނގަޅަށް އެނގިވަޑައިގަންވާނެ ކެންޑިޑޭޓަކީ ޑރ މުއިއްޒު ކަމަށެވެ. އަދި އެކަން ރައްޔިތުންނަށް އެނގިލައްވާނެ ކަމަށް ސައީދު ވިދާޅުވި އެވެ. 

2018 ވަނަ އަހަރުގެ ރިޔާސީ އިންތިޚާބުގައި ރައީސް އަބްދުﷲ ޔާމީން އަބްދުލްގައްޔޫމު ވަނީ 18 އަހަރު ފުރޭ ކޮންމެ ކުއްޖަކަށް އަމިއްލަ ބޯހިޔާވަހިކަމެއް ކަށަވަރުކޮށްދިނުމަށް ފްލެޓެއް ނުވަތަ ގެދޮރު އިމާރާތްކުރާނެ ބިންކޮޅެއް ދެއްވާނެކަމަށް ވައުދުވެވަޑައިގެންފަ އެވެ. 

އެހެން ނަމަވެސް އެ އަހަރުގެ ރިޔާސީ އިންތިޚާބު ރައީސް ޔާމިނަށް ކާމިޔާބުވާގޮތް ނުވެ ސަރުކާރު ވަނީ ބަދަލުވެފަ އެވެ. އެފަހުން 2023 އަށް ވެސް ޕްރޮގްރެސިވް ކޮންގްރެސް ކޯލިޝަނުން، އެ ކޯލިޝަންގެ ވެރިކަމެއްގައި ކުރިންވެސް ބުނިގޮތަށް 18 އަހަރު ފުރޭ ކޮންމެ ކުއްޖަކަށް އަމިއްލަ ފްލެޓެއް ނުވަތަ ބިންކޮޅެއް ދޭނެކަމަށް ވައުދުވެފައި ކަމަށް ވާއިރު، ޑރ މުއިއްޒު ގެންދަވަނީ އެ ވައުދު ތަކުރާރު ކުރައްވަމުން ނެވެ. އަދި ރައްޔިތުންނަށް ބޯހިޔާވަހިކަން ކަށަވަރުކޮށްދޭނެކަމުގެ ޔަގީންކަން ދަނީ ދެއްވަމުން ނެވެ. 

ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި ބޯހިޔާވަހިކަން ކަށަވަރުކޯށްދިނުމަށް ގެންގުޅެއްވާނެ ސިޔާސަތުގެ ތަފްސީލު ވަކިން ޖަލްސާއެއްގައި ހާމަކުރައްވާނެކަމަށް އެ ކޯލިޝަނުން ވަނީ ބުނެފައެވެ.