ޕްރޮގްރެސިވް ކޮންގްރެސް ކޯލިޝަންގެ ވެރިކަމުގައި އެއާ އެމްބިއުލަންސްގެ ޚިދުމަތް ތައާރަފްކުރުމަށް އެ ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ވައިދުވެވަޑައިގެންފި އެވެ. 

ޑރ މުއިއްޒު މިފަދައިން ވައުދުވެވަޑައިގެންފައި ވަނީ މެދުރާއްޖެތެރެއަށް އެމަނިކުފާނު ކުރައްވާ ރިޔާސީ ކެމްޕޭނު ދަތުރުފުޅުގައި ދ ކުޑަހުވަދޫއަށް ވަޑައިގެން އެ ރަށުގައި ބޭއްވި ރިޔާސީ ކެމްޕޭނުގެ ޖަލްސާގައި ވާހަކަދައްކަވަމުން ނެވެ. 

އަވަސް ފަރުވާއަށް ބޭނުންވާ ފަރާތްތަކަށް ސިއްޙީ ޚިދުމަތް ފޯރުކޮށްދިނުމަށް ރައީސް ޔާމީން އަބްދުލްގައްޔޫމުގެ ވެރިކަމުގައި ވަނީ ރާއްޖޭގައި ސީ އެމްބިއުލާންސްގެ ޚިދުމަތް ތައާރަފްކޮށްފަ އެވެ. އަދި ސީ އެމްބިއުލާންސްގެ ފްލީޓު މޯލްޑިވްސް ނެޝަނަލް ޑިފެންސް ފޯސްއާއި ހަވާލުކޮށް އެ ޚިދުމަތް އިންތިޒާމުވެގެން ހިންގަމުން ގެންދެވިއެވެ. 

ޑރ މުއިއްޒު ވިދާޅުވާ ގޮތުގައި އެމަނިކުފާނު ގެންގުޅުއްވަނީ ރައީސް ޔާމިނުގެ ސިޔާސަތާއި އެމަނިކުފާނުގެ މެނިފެސްޓޯއެވެ. އެގޮތުން ރައީސް ޔާމިނުގެ ވެރިކަމުގައި ސިއްހީ ނިޒާމަށް އިންގިލާބީ ބޮޑު ބަދަލެއް ގެނެސް ރައްޔިތުންނަށް ރާއްޖޭގައި ތިބެގެން ރަނަގޅު ފެންވަރުގެ ސިއްހީ ޚިދުމަތް ފޯރުކޮށްދެވޭނެ އިންތިޒާމުތައް ހަމަޖައްސާދެއްވާފައިވާކަން ޑރ މުއިއްޒު ފާހަގަކުރެއްވި އެވެ. 

އެއާއެކު އެމަނިކުފާނު ވިދާޅުވީ ސިއްޙީ އަވަސް ފަރުވާގެ ޚިދުމަތް ފުޅާކުރުމަށް އެމަނިކުފާނުގެ ވެރިކަމުގައި އެއާ އެމްބިއުލަންސްގެ ޚިދުމަތް ތައާރަފްކުރައްވާނެ ކަމަށެވެ. އަދި އެ ޚިދުމަތް ކުރިއަށް ގެންދިއުމަށް ޓެސްޓު ފްލައިޓެއް ނެގެސް، އެކަމުގެ މަސައްކަތްތައް ވަރަށް އަވަސް މުއްދަތެއްގެ ތެރޭގައި ފައްޓަވާދެއްވާނެ ކަމަށެވެ. 

ސިއްހީ ފަރުވާއާއި ހަމަޔަށް ނުދެވި ނުވަރަ ފަރުވާ ނުލިބި އެ ހައްގުން އެއްވެސް ރައްޔިތަކު މަހުރޫމުވެގެން ނުވާނެ ކަމަށާއި، އެ އަސާސީ ހައްގު ކަށަވަރުކޮށްދިނުމަށް ޚާއްސަ އިސްކަމެއް ދެއްވައިގެން މަސައްކަތްޕުޅު ކުރައްވާނެކަމުގެ ޔަގީންކަން ޑރ މުއިއްޒު ވަނީ ވިދާޅުވެފަ އެވެ.