ކުޅުއްދުފުށީ އުތުރު ދާއިރާގެ މެމްބަރު ޔާސިރު ޢަބްދުއްލަތީފާއި އެސިޓީގެ މޭޔަރު މުހައްމަދު އާތިފާއި ކައުންސިލްގެ މެމްބަރުން، ދަ ޑިމޮކްރެޓްސް ދޫކޮށް އެމްޑީޕީއާ އަލުން ގުޅިވަޑައިގަތުމުން އެކަމަށް ކުރީގެ ރައީސް އަދި ދަ ޑިމޮކްރަޓްސްގެ ބާނީ މުޙައްމަދު ނަޝީދު ފާޑު ވިދާޅުވެއްޖެއެވެ.
ރައީސް ނަޝީދު ވިދާޅުވެފައިވަނީ އެބޭފުޅުން ޖެހިވަޑައިގަތީ ވަގުތީ އުފަލުގެ އަޖަލުގައި ކަމަށާއި އެއީ ޟަމީރުގެ ބަލިކަށި ކަމެއް ކަމަށެވެ.
ދަ ޑިމޮކްރެޓްސްގެ ބާނީ، ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ ބައެއް ޒުވާނުން ވަގުތީ ފައިދާގެ ދަޅައިގައި ވަރަށް އަވަހަށް ޖެހިދާ ކަމަށާއި ކުޅުދުއްފުށި ރައްޔިތުންނަކީ އެހާ އަވަހަށް ޟަމީރު ގުޑާ ބައެއް ކަމަށް ޤަބޫލު ކުރެއްވިފައި ނެތް ކަމަށެވެ.
ރައީސް ނަޝީދު މިފަދައިން ވާހަކަފުޅު ދައްކަވައިފައިވަނީ ކުޅުދުއްފުށީގައި އިއްޔެ ހަވީރު ބޭއްވި ބައްދަލުވުމެއްގައެވެ.
މެމްބަރު ޔާސިރާއި، ކައުންސިލްގެ ހަތް މެމްބަރުން ދަ ޑިމޮކްރެޓްސް އިން ވަކިވުމަށްފަހު އަލުން އެމްޑިޕީއަށް ބަދަލުވެ، އެމްޑީޕީގެ މެމްބަރޝިޕް ފޯމް ހަވާލު ކުރެއްވީ އެ ޕާޓީގެ ރިޔާސީ ކެންޑިޑޭޓު، ރައީސް އިބްރާހިމް މުޙައްމަދު ޞާލިހާއެވެ.
އެބޭފުޅުންގެ މެމްބަރޝިޕް ފޯމު ރައީސް ޞާލިޙާއި ހަވާލުކުރައްވާފައިވަނީ ސޯލްޓު ކެފޭ އިމާރާތުގައި ހުންނަ އެ ކެމްޕޭނު އޮފީހުގައި ބޭއްވި ބައްދަލުވުމެއްގަ އެވެ.
އިއްޔެގެ ބައްދަލުވުމުގައި ވާހަކަފުޅު ދައްކަވަމުން ވަކި ބޭފުޅެއްގެ ނަން ހަމަނުކުރައްވައި ރައީސް ނަޝީދު ވިދާޅުވީ ޒުވާނުން މައިދާނަށް ނެރުއްވުމަށް އިންތިހާއަށް މަސައްކަތްތައް ކުރައްވާ ކަމަށެވެ. އަދި އެފަދަ ފުރުސަތު ދެއްވި، އަދި ގާތްކަން ބެހެއްޓެވި އެކަކީ ކުޅުދުއްފުށީ ޒުވާނެއް ކަމަށެވެ.
"އޭގެ ތެރެއިން އެއް ކުއްޖަކު މަޖިލީހުގެ މުގައްރަރަކަށް ހަދައި މަޖިލީހުން ލިބެމުންދިޔަ ހުރިހާ ފުރުސަތެއް އަރުވަމުން ގެންދިޔައިން،، އަދި އެ ބޭފުޅާއާ އެކުގައި ހުސް ވަގުތާއި ވީހާވެސް ގިނައިން މަޝްވަރާކޮށް ވާހަކަ ދައްކާ ހަދަމުން ގެންދިޔައިން، އެހެން ނަމަވެސް ވަގުތީ ފައިދާގެ ދަޅައިގައި ޒުވާން އުމުރުގައި ބައެއް ބޭފުޅުން ޖެހިދޭ" ރައީސް ނަޝީދު ވިދާޅުވި އެވެ.
ޑިމޮކްރެޓްސް އުފެއްދެވުމަށް މަސަކަތްތަކެއް ކުރައްވަމުން ގެންދެވި ޔާސިރު އެޕާޓީ ދޫކުރައްވައި ވަޑައިގެންނެވި ސަބަބެއް ހާމަ ކުރައްވައި ފައިނުވާއިރު ރައްދު ޖަވާބެއްވެސް ޔާސިރު ދެއްވައިފައެއް ނުވެއެވެ. ނަމަވެސް ކުޅުދުއްފުށީ މޭޔަރު އެމްޑީޕީއާ އެނބުރި ގުޅެން ނިންމި ނިންމުން ދިފާޢު ކުރައްވާ ވިދާޅުވެފައިވަނީ ކުޅުދުއްފުށީ ރައްޔިތުންގެ ހައްގުގައި ނުކުރައްވާނެ ކަމެއް ނޯންނާނެ ކަމަށެވެ.
Advertisement
This content is created and paid for by advertisers and does not involve Voice Journalists
