ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި ދ. ކުޑަހުވަދޫގައި ސަރަހައްދީ ބަނދަރެއް އަޅުއްވާދެއްވުމަށް އެ ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ވައުދުވެވަޑައިގެންފި އެވެ.

މެދުރާއްޖެތެރެއަށް ޑރ މުއިއްޒު ކުރައްވާ ރިޔާސީ ކެމްޕޭނު ދަތުރުފުޅުގައި ދ ކުޑަހުވަދޫއަށް ވަޑައިގެން އެ ރަށުގެ ރައްޔިތުންނާއި މުޚާތަބުކުރައްވާ ވާހަކަދައްކަވަމުން ޑރ މުއިއްޒު ވިދާޅުވީ ގުދުރަތީގޮތުން ކުޑަހުވަދޫ ހެދިފައިވަނީ ވަރަށް ސްޓްރެޓެޖިކް ލޮކޭޝަނެއްގައި ކަމަށެވެ.

އެހެންކަމުން، އެ ރަށުގައި ހިންގާ ތަރައްގީގެ މަޝްރޫއުތަކުގެ ފައިދާ ކުޑަހުވަދޫގެ ރައްޔިތުންގެ އިތުރުން ސަރަހައްދުގެ އެތައް ރައްޔިތުންނަށް ކުރާނެކަމަށް ޑރ މުއިއްޒު ވިދާޅުވި އެވެ.

Advertisement

އެކަން ފާހަގަކުރައްވާ ޑރ މުއިއްޒު ވިދާޅުވީ ކުޑަހުވަދޫގައި ބަނދަރު ހެދުނު ނަމަވެސް، އެ ބަނދަރަކީ މިހާރު އެރަށުގެ ރައްޔިތުން ބޭނުންކުރުމަށް ވެސް އެންމެ އެކަށީގެންވާ ބަންދަރެއް ނޫން ކަމަށެވެ.

ޑރ މުއިއްޒު ވިދާޅުވީ ކުޑަހުވަދޫ ބަނދަރު އަޕްގްރޭޑުކުރެވި ސަރަހައްދީ ބަނދަރެއްގެ ގޮތުގައި ތަރައްގީކުރުމަކީ ރައްޔިތުންނާއި، ސަރަހައްދުގެ އެންމެނަށް ވެސް އެންމެ ފައިދާބޮޑުވާނެ ގޮތްކަމަށް ދެކިވަޑައިގަންނަވާ ކަމަށެވެ. އަދި ކުޑަހުވަދޫގައި ސަރަހައްދީ ބަނދަރެއް ތަރައްގީ ކުރުމުގެ ތަނީޖާއެއްގެ ގޮތުން ވިޔަފާރިތައް ފުޅާވެ، ރައްޔިތުންނަށް ލިބޭ އާމްދަނީ އިތުރުވެގެންދާނެ ކަމަށް ޑރ މުއިއްޒު ވިދާޅުވި އެވެ.

ސަރަހައްދީ ބަނދަރު އެޅުމުގެ އިތުރުން ވެސް ކުޑަހުވަދޫގެ ހިއްކާފައި އޮތް ސަރަހައްދުގައި ބޯހިޔާވަހިކަން ދޭނެ ފެސިލިޓީތައް ހަދައި، ފެނާއި ނަރުދަމާގެ ޚިދުމަތް ޤާއިމްކުރައްވާނެކަމަށް ޑރ މުއިއްޒު ވިދާޅުވި އެވެ.

އަދި ކުޑަހުވަދޫ ޒުވާނުންނަށް ޚާއްސަކޮށްގެން ސްޕޯޓްސް އެރީނާ ތަރައްގީކޮށް، އެތަނުގައި މިހާރު ކުޅޭ ކުޅިވަރުތަކުގެ އިތުރުން، އިތުރު ކުޅިވަރުތައް ކުޅެވޭނެ ފެސިލީޓައް އަޅުއްވާދެއްވާނެކަމުގެ ޔަގީންކަން ވެސް ޑރ މުއިއްޒު ދެއްވި އެވެ.