ޕީޕީއެމް، ޕީއެންސީ ކޯލިޝަންގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުގެ ވެރިކަމެއްގައި ސުކޫލު ބޮޑު ޗުއްޓީ ކުރިން އޮތް ގޮތަށް އަހަރުގެ ފަހުކޮޅަށް ބަދަލުކޮށްދެއްވާނެކަަމަށް ވައުދުވެވަޑައިގެންފިއެވެ.

މީގެ ކުރިން ނޮވެމްބަރު މަހާއި ޑިސެމްބަރު މަހު ބޮޑު ޗުއްޓީ އޮންނަ އޮތުން ބަދަލުކޮށް، އަހަރުގެ މެދުތެރެއަށް ބޮޑު ޗުއްޓީ ހަމަޖައްސައި ސުކޫލުތަކުގެ ދިރާސީ އަހަރު ފެށުން މީލާދީ އަހަރުގެ މެދުތެރެއަށް ބަދަލުކޮށްފައިވަނީ 2021 ވަނަ އަހަރުއެވެ. އެހެންނަމަވެސް އެގޮތަށް ބަދަލު ކުރުމުން، ބޮޑު ޗުއްޓީއަށް މޫސުން ގޯސްވުމާ ގުޅިގެން ބޮޑު ބަންދުގައި ވެސް އެއްވެސް ތަނަކަށް ދަތުރުނުކުރެވި އާއިލާތަކަށް އެއްކޮށް މަޖާކޮށްލުމުގެ ފުރުސަތު ނުލިބޭ ކަމުގެ ޝަކުވާ ބެލެނިވެރިން ކުރެއެވެ. 

ރިޔާސީ ކެމްޕެއިނަށް ދ. ކުޑަހުވަދުއަށް ވަޑައިގެން ރޭ އެރަށު ބޭއްވި ޖަލްސާގައި އެކަމަށް އަލިއަޅުވާލައި ވާހަކަ ދައްކަވަމުން މުއިއްޒު ވިދާޅުވީ، މި ސަރުކާރުން ކަންކަން ކުރަނީ އެއްވެސް ގޮތަކަށް ރައްޔިތުންގެ އިހުސާސްތަކަށް ނުވިސްނާކަމަށެވެ. އަދި ރައްޔިތުން ބޭނުންވާ ގޮތަށް ވެސް މި ސަރުކާރުން ނުބަލާ ކަން ފާހަގަކުރައްވައި މުޢިއްޒު ވިދާޅުވީ ސްކޫލްތަކުގެ ބޮޑުޗުއްޓީ އަހަރުގެ މެދުތެރެއަށް ބަދަލުކުރުމަކީ ވެސް އެ ގޮތަށް ކޮށްފައިވާ ކަމެއްކަމަށެވެ.

މުޢިއްޒު ވިދާޅުވީ އަހަރުގެ މެދުތެރެއަށް ޗުއްޓީ ބަދަލުކުރުމުގެ ވިސްނުމަކީ ފަތުރުވެރިކަމުގެ ދާއިރާގައި އުޅޭ ބައެއް މީހުންނަށް އަހަރުގެ ފަހުކޮޅު ސީޒަން ތެރެއާ ދިމާވާތީ ނިންމި ނިންމުމެއް ކަމަށެވެ. އެހެން ނަމަވެސް، މިހާރު އޮތް ގޮތުން އެ މީހުންނަށް ވެސް ދަތުރުނުކުރެވޭ ކަމަށް ވިދާޅުވިއެވެ.

"ބޮޑު ބަންދު އޮތީ ނުބައިކޮށޭ ބަަދަލުކޮށްފައި. އޭގައި އެބަ އޮތް އެއް ސަބަބު. ޓޫރިޒަމް ސެކްޓަރު މީހުންނަށް ޗުއްޓީ ނަގައިގެން ބޭރަށް ދާން ދަތިވާނެ. އެ ބޭފުޅުންނަށް ވެސް ބޭރަށް ދެވެނީ އެއް ނޫން. މި ބަދަލަކީ ރައްޔިތުން ބޭނުންވި ކަހަލަ ބަދަލެއް ނޫން," މުއިއްޒު ވިދާޅުވި އެވެ.

މިއާއެކު މުޢިއްޒު ވިދާޅުވީ ބޮޑުޗުއްޓީ ބަދަލުކުރުމަކީ އުނދަގޫވާނެކަމަކަށް ވާނެކަމަށާ އެހެންނަމަވެސް, ކަރިކިއުލަމްގެ އެ ނަގަން ޖެހޭ ފިލާވަޅުތައް ނަގައި ހަމަކޮށްގެން 2025ގެ ޖެނުއަރީން ފެށިގެން އަހަރުގެ ފަހުކޮޅަށް ބޮޑުޗުއްޓީ ބަދަލުކުރެވޭނެކަމަށެވެ.

"ޑިސެމްބަރަށް އަނބުރާ ގެންނަން ވަގުތު ބޭނުންވާނެ. ނަގަން ޖެހޭ ފިލާވަޅުތައް ނަގައިގެން އަނބުރާ ގެންދެވޭނީ 2025 ގެ ޖެނުއަރީގައި ފެށިގެން އަހަރު ކުރިން އޮތް ގޮތަށް ބަދަލު ކުރެވޭނީ. 2025 އިން ފެށިގެން ޖެނުއަރީން [ދިރާސާ] އަހަރު ބަދަލުކުރީމާ ރައްޔިތުންގެ ތެރެއިން ގިނަ ބަޔަކަށް ފައިދާވާނެ," ޑރ. މުއިއްޒު ވިދާޅުވިއެވެ.