ޕާކިސްތާނުގެ ޕަންޖާބުގެ ޖަރަންވާލާ ޕްރޮވިންސްގައި ކްރިސްޓިއަނުން އަޅުކަންކުރާ ދެ ފައްޅިއެއްގައި ރޯކޮށްލައި ހަމަނުޖެހުން ތަކެއް ހިންގައިފިއެވެ.
މި ހަމަނުޖެހުންތައް ހިންގާފައިމިވަނީ ޕާކިސްތާނުގައި އުޅޭ ދެ ކްރިސްޓިއަނަކު އިސްލާމްދީނަށް ފުރައްސާރަކުރި ކަމަށް ބުނާ މައްސަލައަކާއި ގުޅިގެނެވެ. އިސްލާމްދީނަށް ފުރައްސާރަ ކުރުމަކީ ޕާކިސްތާނުގެ ޤާނޫނުގެ ދަށުން މަރުގެ ޙުކުމް އިއްވޭ ކުށެކެވެ.
ޕަންޖާބުގެ ފައިސަލްއާބާދުގައި މި ކަން ހިނގާފައިމިވަނީ އެސަރަހައްދުގައި ދިރިއުޅޭ ކްރިސްޓިއަނެއް ކަމަށްވާ ރާޖާ އާމިރް ނަމަކަށް ކިޔާ މީހަކާއި އޭނަގެ ރައްޓެއްސެއް ކީރިތި ޤުރުއާނުގެ ގަނޑުތަކެއް މުސްޙަފުން ވަކިކޮށް ބިންމައްޗަށް އުކައި ޤަދަރުކުޑަކޮށް ހެދުމާއި، މުސްޙަފްގެ ގަނޑުތަކުގައި އެއަށް ފުރައްސާރަކޮށް ބަސްތައް ލިޔުނު ކަމަށް އެސަރަހައްދުގައި ދިރިއުޅޭ މުސްލިމުންނަށް އެނގިގެނެވެ.
މިކަމާއި ގުޅިގެން ހިތްހަމަނުޖެހި ރުޅި ވެރިކަން ފާޅު ކުރަމުންދިޔަ މުސްލިމުންގެ ގްރޫޕަކުން ވަނީ ދެ ފައްޅިއެއްގައި ރޯކޮށްލައި އިތުރު ހަތަރު ފައްޅިއަކަށް ގެއްލުންދީފައިވާ ކަމަށް ޕާކިސްތާނު ޕޮލިހުން ވަނީ ބުނެފައެވެ.
އަދި އެގްރޫޕުން ވަނީ އެސަރަހައްދުގައި ދިރިއުޅޭ ކްރިސްޓިއަނުންގެ ގެތަކަށް ވެސް އެކި ވަރުގެ ގެއްލުންތައް ދީފައެވެ. ހިފައިގެންގުޅޭ ސާމާނާއި ފަރުނީޗަރު ފަދަ ތަކެތި އަންދައިލައި އެގެތަކަށް ބޮޑެތި ގެއްލުންތަކެއް ވަނީ ދީފައެވެ.
މިކަމުގެ ސަބަބުން ޖަރަންވާލާ ޕްރޮވިންސްގައި ދިރިއުޅޭ ބައެއް ކްރިސްޓިއަނުން ޕްރޮވިންސް ދޫކޮށް ފިލައިގެން ގޮސްފައިވާ ކަމަށްވެސް މީޑިއާ ތަކުން ބުނެއެވެ.
ޤުރުއާނަށް ފުރައްސާރަ ކުރުމުން ޕަންޖާބުގައި އުފެދުނު ހަމަނުޖެހުންތަކުގެ ތެރޭގައި ކްރސްޓިއަން ފައްޅިތަކަށް ގެއްލުންދިނުމުން ޕާކިސްތާނުގެ މައިނޯރިޓީ ކަމަށްވާ ކްރިސްޓިއަނުން ދަނީ ކަރާޗީގައި އެކަމާއި ދެކޮޅަށް އަޑު އުފުލަމުންނެވެ.
ޕާކިސްތާނުގެ ޤާނޫނުގެ ދަށުން މީހަކު އިސްލާމްދީނަށް ފުރައްސާރަ ކުރިކަމުގެ ކުށް ސާބިތު ވެއްޖެނަމަ އެމީހަކަށް މަރުގެ ޙުކުމް އިއްވައެވެ.
Advertisement
This content is created and paid for by advertisers and does not involve Voice Journalists
