ސަގާފީ ކުޅިވަރުތަކާއެކު ދ ހުޅުދެލިން ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒަށް ހޫނު މަރުޙަބާއެއް ދަންނަވައިފި އެވެ. 

ޑރ މުއިއްޒު ދ ހުޅުދެއްޔަށް ވަޑައިގަތީ ރިޔާސީ ކެމްޕޭނަށް ދ އަތޮޅަށް ކުރައްވާ ދަތުރުފުޅުގައެވެ. މިއީ މި ދަތުރުގެ ތިން ވަނަ މަންޒިލެވެ. 

އެރަށަށް އެމަނިކުފާނު ވަޑައިގަތުމާއެކު އެ ރަށުގެ ރައްޔިތުން ވަނީ ހޫނު މަރުހަބާއެއް ދަންނަވާފައެވެ. އެގޮތުން އެމަނިކުފާނަށް މަރުޙަބާ ދެންނެވުމަށް ހުޅުދެލީ ބަނދަރު ސަރަހައްދުގައި ގިނަ އަދަދެއްގެ ބަޔަކު ތިބިތަން ފެނިގެންދިޔައެވެ. އަދި ގިނަ ބަޔަކު ޑރ މުއިއްޒާއި ސަލާމްކުރުމަށް ސަފުހަދާލައިގެން ތިބިތަން ފެނިގެން ދިޔައެވެ. 

Advertisement

ޑރ މުއިއްޒުގެ އިސްތިގުބާލުގައި ތިބި ރައްޔިތުން ދިޔައީ މި އަހަރުގެ ރިޔާސީ އިންތިޚާބު އެއްބުރުން ޑރ މުއިއްޒަށް ހޯދާދެއްވާނެކަމުގެ ޔަގީންކަން ދެއްވާފަ އެވެ. އަދި އެކަމަށްޓަކައި ތައްޔާރަށް ތިބިކަމަށް ސަޕޯޓަރުން ވަނީ ބުނެފައެވެ. 

ޑރ މުއިއްޒުވަނީ އެމަނިކުފާނުގެ އިސްތިގުބާލުގައި ތިބި ހުރިހާ ރައްޔިތުންނާއި ސަލާމް ކުރައްވާފަ އެވެ. އަދި އެފަހުން އެމަނިކުފާނު ވަނީ ރަށުގެ ރައްޔިތުންނާއި ބައްދަލުކުރައްވާ ޕްރޮގްރެސިވް ކޮންގްރެސް ކޯލިޝަންގެ ވެރިކަމުގައި ހުޅުދެއްޔަށް ކޮށްދެއްވާނެ ކަންކަން އިއުލާނު ކުރައްވާފަ އެވެ. 

އޭގެ ތެރޭގައި އައިސް ލިބޭނެ އިންތިޒާމުތައް ހަމަޖައްދިނުމާއި ސިއްހީ ނިޒާމު ހަރުދަނާކޮށްދިނުމުގެ އިތުރުން ރަށަށް ދިމާވެފައިވާ ކުނީގެ މައްސަލައަށް ޙެއްލެއް ހޯއްދަވާދެއްވާނެކަމަށް ޑރ މުއިއްޒު ވިދާޅުވި އެވެ. 

ހުޅުދެއްޔަށް ވަޑައިގަތުމށްފަހު ދެން އެމަނިކުފާނު މިއަދު ވަޑައިގަންނަވަން ހަމަޖެހިފައިވަނީ ދ މީދުއަށެވެ. 

ޑރ މުއިއްޒުގެ މި ދަތުރުފުޅުގައި ދ އަތޮޅުގެ ރަށްތަކުގެ އިތުރުން މ، ފ އަދި ވ އަތޮޅުގެ ރަށްތަކަށް ވަޑައިގަތުމަށް ވެސް ވަނީ ހަމަޖެހިފައެވެ.