އިދިކޮޅު ލީޑަރުގެ ގޮތުގައި ހުންނެވި ކުރީގެ ރައީސް އަބްދުالله ޔާމީން އަބްދުލްގައްޔޫމު ގެއަށް ބަދަލު ކުރުމަށް ޓަކައި ޔޫރަޕިއަން ޔޫނިއަން (އީޔޫ)ގެ އެހީއަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު އެދިވަޑައިގެންނެވުމުން، އީޔޫ އިން ދެއްވި ޖަވާބު އެ ޖަމިއްޔާއިން ހާމަކޮށްފިއެވެ. 

ރިޔާސީ އިންތިޚާބުގެ މަސައްކަތް އޮބްޒާވްކުރުމަށް ޓަަކައި އީޔޫއިން ފޮނުވާ ވަފުދުގެ ޗީފް އޮބްޒާވަރުގެ ގޮތުގައި ހަމަޖައްސައިފައިވާ ޔޫރަޕިއަން ޕާލަމެންޓުގެ މެންބަރު ނާޗޯ ސަންޗެޒް އަމޯއާއެކު ރައީސް ނަޝީދު ވަނީ ދާދިފަހުން ބައްދަލުވުމެއް ބާއްވާފައެވެ. 

އެ ބައްދަލުވުމުގައި އިންތިޚާބުގެ މިނިވަންކަން ޔަގީންކުރަން ރައީސް ޔާމީން ގެއަށް ބަދަލުކުރުން މުހިންމުކަމަށް ނަޝީދު ވިދާޅުވިކަމަށް މަޖިލީހުގެ އިދާރާއިން ވަނީ ބުނެފައެވެ. 

މި ބައްދަލުވުން ކުރިއަށް ދިޔައިރު ރައީސް ނަޝީދުގެ އަރިހުގައި ޕީއެންސީގެ ޕީޖީ ލީޑަރު އާދަމް ޝަރީފް އުމަރާއި، ޑިމޮކްރެޓްސްއަށް ނިސްބަތްވާ މެދު ހެންވޭރު ދާއިރާގެ މެމްބަރު އަލީ އާޒިމް ބައިވެރިވެލެއްވިއެވެ.

ރައީސް ނަޝީދާއި ޔޫރަޕިއަން ޕާލަމެންޓުގެ މެންބަރު ނާޗޯ ސަންޗެޒް އަމޯ ބައްދަލުކުރެއްވުން -- ފޮޓޯ/ މަޖިލިސް

ނަޝީދުގެ އެ އެދިލެއްވުމަށް ދެއްވީ ކޮށް ޖަވާބެއްތޯ މިއަދު އީޔޫ އޮބްޒާވަރުން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ ސުވާލު ކޮށްފައެވެ. 

އެ ސުވާލަށް ޖަވާބު ދެއްވަމުން ޔޫރަޕިއަން ޕާލަމެންޓުގެ މެންބަރު ނާޗޯ ސަންޗެޒް އަމޯ ވިދާޅުވީ، ރައީސް ނަޝީދު އެފަދައިން އެދި ލެއްވުމުން، އެމަނިކުފާނާއި ދެން ތިއްބެވި މެންބަރުންގެ އަރިހުގައިވެސް ދެންނެވީ، ރައީސް ޔާމީންގެ މައްސަލައިގެ ތެރެއަށް ނުވަންނާނެ ކަމަށެވެ. އަދި އޭގެ ސަަބަބެއް ކަމަށް އޭނާ ވިދާޅުވީ، އެ ވަފުދު އައިސް ތިބީ އިންތިހާބު ކުރިއަށްދާ ގޮތް ބެއްލެވުމަށް ކަމަށާ، އެހެން ކަމުން، އެކަމުގެ ބޭރުން، ރާއްޖޭގެ ދާޚިލީ ކަމެއްގެ ތެރެއަށް ވަދެ ޝަރީއަތުގެ ތެރެއަށް ނުވަންނާނެ ކަމަށްވެސް އޭނާ ދެންނެވި ކަމަށެވެ.

މިއަދުގެ ނޫސްވެރިންގެ ބައްދަލުވުމުގެ ތެރެއިން

"އަހަރެމެންގެ މިޝަން އަކީ އިންތިހާބު އޮބްޒާވް ކުރުން. އެހެންވީމާ ރައީސް ނަޝީދާއިދެން ތިއްބެވި ބޭފުޅުންވެސް، ރައީސް ޔާމީން ގޭބަންދަށް ބަދަލު ކުރާ ވާހަކަ ދެއްކެވީމާ އެހެން ދަންނަވާފައިވާނީ. އަދި އެއިން ބޭރުގައި އެއްވެސް ކަމެއް އަހަރެމެންނަކަށް ނުކުރެވޭނެ. ރައީސް ޔާމީންގެ ޝަރީއަތުގެ މަރުހަލާގެ ތެރެއަށް ވަދެ، އެކަމާއި ގުޅޭ ގޮތުން އެއްވެސް ކޮމެންޓެއް، އަހަރެމެންނަށް ނުދެވޭނެ. އެހެންވީމާ، ރައީސް ނަޝީދަށްވެސް ދެންނެވިން، އަހަރެމެންނަކީ އިންތިހާބު އޮބްޒާވް ކުރަން އައިސް ތިބި ބައެކޭ. އެހެންވީމާ، ރާއްޖޭގެ ދާޚިލީ އެފަދަ ކަމެއްގެ ތެރެއަށް ނުވަދެވޭނެ ކަމަށް ދެންނެވިން." ޔޫރަޕިއަން ޕާލަމެންޓުގެ މެންބަރު ނާޗޯ ސަންޗެޒް އަމޯ ވިދާޅުވި އެވެ.