ރާއްޖޭގައި ކަންބޮޑުވާ މިންވަރަށް އިތުރުވެފައިވާ ދަރިމައިނުވުމުގެ މައްސަލަތަކަށް ބޭނުންވާ ފަރުވާ އާސަންދައިގެ ދަށުން ދިނުމަށް ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުޢިއްޒު ވަޢުދުވެވަޑައިގެންފިއެވެ.
ރިޔާސީ ރޭހުގެ ކެމްޕޭނަށް ރޭ ދ ކުޑަހުވަދޫގައި ބޭއްވި ޖަލްސާގައި ވަހަކަދައްކަވަމުން ޑރ މުޢިއްޒު ވިދާޅުވީ ސިއްޚީ ޚިދްމަތްތައް ދޭ އާސަންދަ އިންޝިޔުރެސްގެ ނިޒާމަށް ބޮޑެތި ބަދަލުތަކެއް ގެންނަވާނެ ކަން އިޢުލާނު ކުރައްވައިފައެވެ.
އަދި އޭގެ ތެރޭގައި ރާއްޖެގެ ގިނަ ބަޔަކަށް ދިމާވެފައިވާ ދަރިމައިނުވުމުގެ މައްސަލަތަކަށް ހޯދަން ޖެހޭ ފަރުވާތައް އާސަންދައިގެ ދަށުން ލިބޭނެ ގޮތް ހައްދަވައި ދެއްވާނެކަމަށް ޑރ މުޢިއްޒު ވަނީ ވިދާޅުވެފައެވެ.
ރޭ ކުޑަހުވަދޫގައި ބޭއްވި ޖަލްސާގައި ވާހަކަ ދައްކަވަމުން މުޢިއްޒު އިތުރަށް ވިދާޅުވީ މިހާރު އެކަމަށް ކުރާ ޚަރަދުތައް ކުރަނީ އަމިއްލަ ޖީބުން ކަމަށެވެ. އަދި އައިވީއެފްގެ ޚިދުމަތް އާސަންދައިން މުޅިން ހިލޭ ދިނުމަށް ޑރ މުޢިއްޒު ވަޢުދުވެވަޑައިގެންނެވިއެވެ.
މިއާއި އެކު މުޢިއްޒު ވަނީ ސިއްޚީ ޚިދުމަތަށް އެހެންވެސް ބަދަލުތައް ގެންނަވާނެ ކަމަށް ވިދާޅުވެފައެވެ.އެގޮތުން ކުރީގެ ރައީސް ޔާމީންގެ ވެރިކަމުގައި ސީ އެމްބިއުލާންސްގެ ޚިދުމަތް ފެއްޓެވުމުން ބަލި މީހުންނަށް ބޮޑު ލުއިފަސޭހަތަކެއް ލިބިގެން ދިޔަކަމަށް އޭނާ ވިދާޅުވި އެވެ. މިއާއިއެކު ދެން އަންނަ ސަރުކާރެއްގައި އެއަރ އެމްބިއުލާންސްގެ ޚިދުމަތަށް ސީ ޕްލޭނެއް ތައްޔާރުކޮށް އެ ޚިދުމަތް ޓެސްޓު ކުރާނެ ކަމަށެވެ.
މި ޚިދުމަތް ކާމިޔާބުވެއްޖެނަމަ އެއަރ އެމްބިއުލާންސް ފްލީޓެއް ތަޢާރަފް ކޮށް ފުޅާ ދާއިރާއެއްގައި ޚިދުމަތް ދެމުން ގެންދާނެކަމަށް މުޢިއްޒު ވަޢުދުވެވަޑައިގަތެވެ. މުޢިއްޒު ވިދާޅުވީ މީގެ ސަބަބުން އެއް ރަށުން އަނެއް ރަށަށް ދަތުރުކުރާ ހާލު ބޮޑު ބަލި މީހުންނަށް ބޮޑެތި ލުއިތަކެއް ލިބޭނެ ކަމަށެވެ.
Advertisement
This content is created and paid for by advertisers and does not involve Voice Journalists
