ނުހިއްކާ އޮތް ތަނުން ގޯތި ދިން މީހުނަށް މާލެ ސަރަހައްދުގެ ހިކިފަސްތަނަކުން ގޯތި ދޭން ޖެހޭކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިހެންވިދާޅުވީ އޭނާ ކުރެއްވެވި ޓްވީޓެއްގައެވެ.

"ނުހިއްކާ އޮތް ސަރަހައްދުތަކުން ގޯތި ލިބުނު ފަރާތްތަކަށް މާލެ ސަރަހައްދުގެ ހިކިފަސްތާކުން ބޯހިޔާވަހިކަން ހަމަޖައްސަން ޖެހޭ" ރައީސް ނަޝީދު ވިދާޅުވެފައިވެއެވެ.

Advertisement

ރައީސް ނަޝިދު އިތުރަށް ވިދާޅުވީ ގިރާވަރު ފަޅު ހިއްކާވާހަކައަކީ އަދި މާބޮޑު ޕްލޭނެއް ނެތް ވަރަށް ދުރު ވާހަކައެއް ކަމަށެވެ.

ރައީސް ނަޝީދު މިހެން ވިދާޅުވެފައި މިވަނީ ބިންވެރިޔާ ސްކީމްގެ ދަށުން މާލޭގެ ރައްޔިތުންނަށް ގޯތި ދޫކުރަމުންދާ ދަނޑިވަޅެއްގައެވެ. އެގޯތިތައް ދޫކުރަން ފަށައިފައިވަނީ މިހަފްތާގެ އަންގާރަ ދުވަހުއެވެ.

ބިންވެރިޔާ ސްކީމްގެ ދަށުން ގޯއްޗަށް އެދި ހުށައެޅުމަށް ހުޅުވާލުމުން 15،164 ފޯމު ހުށަހަޅާފައިވާއިރު އޭގެ ތެރޭގައި ވަކި ފަރުދުން އަދި އެކަކަށް ވުރެ ގިނަމީހުން ބައިވެރިވެރިވާ  ގޮތުގައި ޖުމްލަ 23،088 މީހުން ހިމެނެއެވެ. މީގެ ތެރެއިން 19،858 މީހުން ގޯއްޗަށް ޝަރުތު ހަމަވެއެވެ. ގޯތި ލިބޭ މީހުންގެ ވަގުތީ ލިސްޓުގައި 10،314 މީހުން ހިމެނެއެވެ.

ގޯތި ލިބޭ މީހުންގެ ދާއިމީ ލިސްޓުގައި 18,955 މީހުން ހިމެނޭއިރު ގޯތި ނުލިބޭ ލިސްޓުގައި 684 ފަރާތެއް ހިމެނެއެވެ. ގޯތި ގުރުގައި ގޯތި ލިބޭ ތަންތަނަށް ކަނޑައަޅަނީ ބަކެޓަކަށް ކަރުދާސްކޮޅު އަޅާ އޭގެ ތެރެއިން ނެގޭ ތަނަކުންނެވެ.  މީގެ ތެރޭގައި ހުޅުމާލެ އާއި ގުޅިފަޅުން އަދި ގިރާވަރު ފަޅުން ނެގޭ ގޯތިތައް ހިމެނެއެވެ.

އަދި ގުރުއަތު ކަރުދާސް ކޮޅާއެކު، ގޯތި ހުންނާނެ ތަންވެސް އެނގެއެވެ.

ޕްލޭނިންގެ މިނިސްޓްރީއިން އަކްރަމް ކަމާލުއްދީން ވިދާޅުވެފައިވަނީ ގޯތިތައް ދެނީ ރެޖިސްޓަރ ކުރުމަށްފަހު، އިންވެސް ވަކިކޮށްފައި ކަމުން، ސަރުކާރު ބަދަލުވި ކަމުގައިވިޔަސް، ޤާނޫނީ ހުރަހެއް ނޯންނާނެ ކަމަށެވެ.

ހުޅުމާލެ އިން 1،351 ގޯތި ދޫކުރަން ނިންމާފައިވާއިރު، ގުޅީފަޅުން 2،218 ގޯތި އަދި ގިރާވަރުފަޅުން 5،432 ގޯތި ދޫކުރަން ނިންމާފައި ވެއެވެ. މީގެ ތެރެއިން ހުޅުމާލެ އިން ދޫކުރާ ގޯތިތައް ދޫކުރާނީ ހުޅުމާލޭ ދެވަނަ ފިޔަވަހިންނެވެ.

ހިއްކައިފައި ނުވާ ސަރަހައްދުތަކުން ގޯތި ދީފައިވާތީ ގިނަ ބަޔަކު ދަނީ ސަރުކާރަށް ފާޑު ކިޔަމުންނެވެ.