ނުރަސްމީ ނުވަތަ އަމިއްލައަށް އާމްދަނީ ހޯދުމަށް މަސައްކަތް ކުރާ ފަރާތްތަކުން ވެސް އެ ލިބޭ އާމްދަނީން ޕެންޝަން ސްކީމުގައި ބައިވެރިކުރާނެ ކަމުގައި އަމިއްލަ ގޮތުން ރިޔާސީ އިންތިހާބުގައި ވާދަކުރައްވާ ފާރިސް މައުމޫނު ވިދާޅުވެއްޖެއެވެ. 

ރިޔާސީ އިންތިހާބުގެ ކެމްޕެއިންގައި މިރޭ މ.ވިކްޓްރީ ހައުސްގައި ފާރިޝްގެ ކެމްޕެއިން ޖަގަހައެއް ހުޅުވުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ފާރިޝް ވިދާޅުވީ، އެ މަނިކުފާނުގެ ސަރުކާރެއްގައި އެންމެ އާދައިގެން ދިރިއުޅެމެއް އުޅެމުން އަންނަ ރައްޔިތުންނަންވެސް ހާއްސަ ސަމާލުކަމެއް ދީގެން އެފަރާތްތަކަށް އަޅާލައްވާނެ ކަމުގައި ވިދާޅުވެފައެވެ. 

މިގޮތުން ފާރިޝް ވިދާޅުވީ، މިވަގުތު އިގްތިސާދީ ގާނޫނީ ހަމަތައް އެކުލަވާލެވިފައި އޮންނަ ގޮތުން އަމިއްލަ މަސައްކަތުން ގޭގައި ތިބެގެން އާމްދަނީ ހޯދަމުން އަންނަ ފަރާތްތަކަށް ބޭންކްތަކާއި ހަމައިން މާލީ އެހީތެރިކަން ލިބުމުގެ ފުރުސަތު ފަހިވެފައި ނެތްކަމުގައެވެ. 

Advertisement

އެހެންކަމުން އެފަދަ ފަރާތްތަކަށްވެސް އެ މަނިކުފާނުގެ ވެރިކަމެއްގައި ބޭންކް ތަކާއި ސަރުކާރު މެދުވެރިވެރިކޮށްވެސް މާލީ އެހީތެރިކަމާ ތަނަވަސް ކޮށްދީ، މަސައްކަތް ކުރިއެރުވުމުގައި އެހީތެރިކަން ފޯރުކޮށްދޭނެ ކަމުގައެވެ. 

މިގޮތުން މަސައްކަތް ކުރާ އުމުރު ފަހަނައަޅާއިރު އެފަދަ ފަރާތްތަަށްވެސް ޕެންޝަން ސްކީމުގައި ބައިވެރިވެ ފައިސާ ލިބިގެން ދާނެގޮތް ތަނަވަސް ކޮށްދިނުން އެއީ އެމަނިކުފާނުގެ ތަސައްވުރެއް ކަމުގައި ފާރިޝް ވިދާޅުވިއެވެ. 

މީގެ އިތުރުން ފާރިޝް ވަނީ ފްރީލާންސް މަސައްކަތް ކުރާ ފަރާތްތަކަށްވެސް ބޭންކް ތަކާއި ސަރުކާރު މެދުވެރިވެރިކޮށް މާލީ އެހީތެރިކަން ފަސޭހައިން ލިބޭނެ މަގު ތަނަވަސްކޮށްދެއްވާނެ ކަމުގައި ވިދާޅުވެފައެވެ.

ރިޔާސީ އިންތިޚާބުގެ ވަގުތު ކުޑަތަންވަމުން އަންނަ އިރު ފާރިޝް އާއި އެމަނިކުފާނުގެ ރަނިންމޭޓް އަބްދުއްސައްތާރު ވެސް އަންނަވަނީ އިންތިހާބުގެ ކެމްޕެއިން ހަރަކާތްތައް ކުރިއަށް ގެންދަވާ، އެ ބޭފުޅުންގެ މެނިފެސްޓޯ އިޢުލާން ކުރައްވަމުންނެވެ.