ސައުދީ ޕްރޮފެޝަނަލް ލީގުގައި ކުޅުނު ދެވަނަ މެޗުން ވެސް ބަލިވެ، އަލް ނަސްރު ލީގު ތާވަލުގެ 15 ވަނައަށް ވެއްޓިއްޖެ އެވެ. ރޭ އަމިއްލަ ދަނޑުގައި އަލް ތާވޮން އާއި ދެކޮޅަށް ކުޅުނު މެޗުން އެޓީމު ބަލިވީ 2-0 ގެ ނަތީޖާއަކުންނެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި، ފުރަތަމަ ނުރައްކާތެރި ހަމަލާއެއް ފެނިގެންދިޔައީ އަލް ނަސްރުގެ ފަރާތުންނެވެ. އެގޮތުން މެޗުގެ 8 ވަނަ މިނެޓުގައި ތާވޮންގެ ޕެނަލްޓީ އޭރިއާ ބޭރުން ކްރިސްޓިއާނޯ ރޮނާލްޑޯ ފޮނުވާލި ބާރު ހަމަލާ އެޓިމުގެ ބްރެޒިލް ކީއްޕަރު މައިސަން ދިފާއުކުރިއިރު، މިހާފުގައި ތާވޮން އިން އުފެއްދި ނުރައްކާތެރި ފުރަތަމަ ހަމަލާގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ.

ފުރަތަމަ ހާފުގެ 20 ވަނަ މިނެޓުގައި އެޓީމަށް ލިބުނު ކޯނަރެއްގައި ބްރެޒިލްގެ މިޑްފީލްޑަރު މެތިއުސް ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން މިލަނޑު އެޓީމަށް ކާމިޔާބުކޮށްދިނީ ކެމަރޫންގެ ފޯވާޑް ލިއަންޑްރޭ ޓަވަމްބާ އެވެ.

ފުރަތަަމަ ހާފުގެ އިތުރު ވަގުތުގެ ތެރޭގައި ތާވޮންގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއަކު ފޮފާނާއަށް ކުރި ފައުލަކާއި ގުޅިގެން ރެފްރީ ވަނީ އަލް ނަސްރަށް ޕެނަލްޓީއެއް ދީފައެވެ. ނަމަވެސް ވީއޭއާރުން ބެލުމަށްފަހު ރެފްރީ ވަނީ އެނިންމުން ބަދަލުކޮށް އެއީ ޕެނަލްޓީއެއް ނޫންކަމަށް ނިންމާފައެވެ. މިއާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން އަލް ތާވޮން ކުރީގައި އޮވެގެންނެވެ.

މެޗުގެ ދެވަަނަ ހާފުގައި އަލް ނަސްރުން އެޓީމުގެ ކުޅުން ރަނގަޅުކޮށް ލަނޑުޖަހާނެ ގިނަ ފުރުސަތުތަކެއް ތަނަވަސްކުރި ނަމަވެސް މިހާފުގައި އެޓީމުގެ ބްރެޒިލް ފޯވާޑް އެންޑަސަން ޓަލިސްކާ އާއި ކްރޮއޭޝިއާގެ މިޑްފީލްޑަރު މާސެލޯ ބްރޮޒޮވިޗްގެ އިތުރުން ސެނަގާލްގެ ފޯވާޑް މާނޭއަށް ލިބުނު ހުސް ފުރުސަތުގެ ބޭނުން ވަނީ ނުކުރެވިފައެވެ.

މީގެއިތުރުންވެސް މެޗުގެ އިތުރު ވަގުތުގެ ތެރޭގައި މާނޭއަށް ލިބުނު ހުސް ފުރުސަތުގައި އޭނާ ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ. ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ.

މިމެޗުގައި އަލް ތާވޮން އިން ކާމިޔާބުކުރި ދެވަނަ ލަނޑު ދެވަނަ ހާފުގެ އިތުރު ވަގުތުގެ ތެރޭގައި ކާމިޔާބުކޮށްދިނީ އެޓީމުގެ މިޑްފިލްޑަރު އަހުމަދު ބަހިއުސަން އެވެ. މިލަނޑާއެކު މެޗުގެ ކުޅުން ނިމިގެންދިޔައީ 2-0 ގެ ނަތީޖާއަކުން އަލް ތާވޮން ކުރީގައި އޮވެގެންނެވެ.

މި މެޗުން ލިބުނު ތިން ޕޮއިންޓާއެކު ކުޅުނު ދެ މެޗުން ހަތަރު ޕޮއިންޓް ހަމަކޮށް އަލް ތާވޮން މިވަގުތު އޮތީ ލީގު ތާވަލްގެ ހަތަރުވަނައިގައެވެ. އަދި މި މެޗުން ބަލިވި އަލް ނަސްރު ލީގުގައި ކުޅުނު ދެވަނަ މެޗުން ވެސް ބަލިވެފައިވާ އިރު އެޓީމު މިވަގުތު އޮތީ ލީގު ތާވަލްގެ 15 ވަނައިގައެވެ.