ސެޕްޓެމްބަރު 9 ވަނަ ދުވަހު އޮންނަ ރިޔާސީ އިންތިޚާބުގައި ވޯޓުލާ މީހުންގެ ފައިނަލް ލިސްޓު މިއަދު ގެޒެޓްގައި އިޢްލާނު ކުރާނެ ކަމަށް އިލެކްޝަންސް ކޮމިޝަނުން ބުނެފިއެވެ.

އީސީ ނައިބް އިސްމާއިލް ޙަބީބް ކުރައްވާފައިވާ ޓްވީޓެއްގައި ވިދާޅުވެފައިވަނީ  ރިޔާސީ އިންތިހާބު ގައި، 2023 ސެޕްޓެމްބަރު 9 ވަނަ ދުވަހު، ވޯޓުދިނުމުގެ ޙައްޤު ލިބިފައިވާ މީހުންގެ، ފައިނަލް ލިސްޓު، މިއަދު ސަރުކާރުގެ ގެޒެޓާއި އިލެކްޝަންސް ކޮމިޝަންގެ ވެބްސައިޓުގައި ޢާންމު ކުރާނެކަމަށެވެ.

ޙަބީބް އިތުރަށް ވިދާޅުވީ ވޯޓުލާން އެބޭފުޅަކު ރަޖިސްޓަރީ ވެފައި އޮތީ ކޮންތާކުތޯ، ދުރާލައި ބެއްލެވުން އެދޭކަމަށެވެ. އަދި ދިވެހިރާއްޖޭގެ ޝަރުޢީ ކޯޓަކުން އަމުރު ކުރައްވައިގެން ނޫންގޮތަކަށް، ވޯޓުލާމީހުންގެ މި ފައިނަލް ލިސްޓަށް އެއްވެސް ބަދަލެއް ނާންނާނެ ކަމަށްވެސް އޭނާ ވިދާޅުވެފައިވެއެވެ.

Advertisement

"މި ފައިނަލް ލިސްޓަކީ، އިސީގެ ވެބްސައިޓުގައި ދުވަހުން ދުވަހަށް ޢާންމުކުރަމުން، ސިޔާސީ ޕާޓީތަކާ ލިސްޓު ޙިއްޞާ ކުރުމުގެ އިތުރުން، ޝަކުވާއަށް ހުޅުވައި، ޝަކުވާގެ މުއްދަތުގައި ލިބުނު ޝަކުވާތަކަށްވެސް ރިޢާޔަތްކޮށްގެން، ފައިނަލް ކުރެވިފައިވާ އެންމެފަހުގެ ލިސްޓު" ޙަބީބް ވިދާޅުވެފައިވެއެވެ.

ސެޕްޓެމްބަރ 9ގައި އިންތިޚާބު ބޭއްވުމަށް ހަމަޖެހިފައިވާއިރު 574 ވޯޓު ފޮއްޓެއް ރާއްޖެއާއި އާއި ރާއްޖެއިން ބޭރުގައި ބެހެއްޓުމަށް ވަނީ ހަމަޖެހިފައިވެއެވެ.

އޭގެ ތެރެއިން 8 ވޯޓު ފޮއްޓެއް ރާއްޖެއިން ބޭރުގައި ބެހެއްޓުމަށް ހަމަޖެހިފައިވެއެވެ. އެއީ އިންޑިޔާގެ ޓްރިވެންޑްރަމްގައި އެއް ފޮށި، އިނގިރޭސި ވިލާތުގެ ލަންޑަންގައި އެއް ފޮށި، ޔޫއޭއީގެ އަބޫދާބީގައި އެއް ފޮށި، މެލޭޝިޔާގެ ކުއަލަލަންޕޫރްގައި 3 ފޮށި އަދި ސްރީލަންކާގެ ކޮލަމްބޯގައި 2 ވޯޓު ފޮއްޓެވެ.