ނޯތު އަދި ސެންޓްރަލް އެމެރިކާ ލީގު ކަޕްގެ  ފައިނަލްގައި ނަޝްވީލް އެފްސީ ބަލިކޮށް މުބާރާތުގެ ޗެމްޕިއަންކަން އިންޓަ މިއާމީ އިން ފުރަތަަމަ ފަހަރަށް ހޯދައިފި އެވެ. މި ކާމިޔާބީއާއިއެކު އެޓީމުގެ ކެޕްޓަން ލަޔޮނަލް މެސީއަށް ވަނީ ތާރީޚީ ރެކޯޑެއް ލިބިފައެވެ.

މި ތައްޓާއެކު މެސީއަށް ވަނީ ކެރިއަރުގައި އެންމެ ގިނަ ތަށި ކާމިޔާބު ކުރި ކުޅުންތެރިޔާގެ ޝަރަފު ލިބިފައެވެ. އެއީ ޖުމުލަ 44 ތައްޓާއެކު ގައެވެ. އޭނާ ވަނީ ބާސެލޯނާ އާއެކު 35 ތަށި، ޕެރިސް ސެއިންޓް ޖާމަން (ޕީއެސްޖީ) އާއެކު ތިން ތަށި، އާޖެންޓީނާ އާއެކު ފަސް ތަށި އަދި މިއާމީ އާއެކު އެއް ތަށި ކާމިޔާބުކޮށްފަ އެވެ. މެސީގެ ފަހަތުން 43 ތައްޓާއެކު މިލިސްޓުގެ ދެވަނަގައި އޮތީ ބްރެޒިލްގެ ޑެނީ އަލްވޭސް އެވެ. މީގެ އިތުރުން މި މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާގެ މަގާމާއި އެންމެ މޮޅު ކުޅުންތެރިޔަގެ މަގާމު ވެސް ލިބުނު މެސީ އަށެވެ.

މިއަދު ހެނދުނު ކުޅުނު ފައިނަލް މެޗު އިންޓަ މިއާމީން ކާމިޔާބު ކުރީ ޕެނަލްޓީ ޖަހައިގެންނެވެ. މެޗުގެ ފުރިހަމަ ވަގުތު ހަމަވިއިރު ދެ ޓީމު 1-1 ގެ ނަތީޖާއަކުން އެއްވަރުވެ، ނަތީއްޖާނެރުމަށްޓަކައި ޖެހި ޕެނަލްޓީގައި އެޓީމު ކުރިހޯދީ 8-10 ގެ ނަތީޖާއަކުންނެވެ.

Advertisement

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ އިންޓަ މިއާމީ އިންނެވެ. މިލަނޑު ފުރަތަމަ ހާފުގެ 23 ވަނަ މިނެޓުގައި ކާމިޔާބުކޮށްދިނީ އެޓީމުގެ ކެޕްޓަން މެސީ އެވެ. މިއީ މިއާމީ އަށް ބަދަލުވެ މެސީ އެ ޓީމަށް ކުޅުނު ހަތް ވަނަ މެޗުގައި އޭނާ ކާމިޔާބުކުރި 10 ވަނަ ލަނޑެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން އިންޓަ މިއާމީ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ނަޝްވީލް އިން އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކުރިއިރު، އެޓީމުން މެޗުގެ ނަތީޖާ އެއްވަރުކުރި ލަނޑު ދެވަނަ ހާފުގެ 57 ވަނަ މިނެޓުގައި ކާމިޔާބުކޮށްދިނީ ހައިޓީގެ ފޯވާޑް ފަފާ ޕިކޯލްޓް އެވެ.

މިލަނޑާއެކު މެޗުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ. މިއާއެކު މެޗުގެ ނަތީޖާ ނެރުމަށް ޖެހި ޕެނަލްޓީ ގައި މިއާމީން ކުރި ހޯދީ 10-8 އިންނެވެ. މެޗުގެ ފުރަތަމަ ފަސް ޕެނަލްޓީގެ ތެރެއިން ކޮންމެ ޓީމަކަށް ވެސް ކާމިޔާބު ކުރެވުނީ ހަތަރު ޕެނަލްޓީ އެވެ. މިއާމީގެ ޕެނަލްޓީތައް ކާމިޔާބު ކުރީ މެސީ، ސާޖިއޯ ބުސްކެޓްސް، ކަމްޕަނާ އަދި މިލާ އެވެ. އެ ޓީމަށް ނާކާމިޔާބުވީ އުލޯގެ ޕެނަލްޓީ އެވެ. ނަޝްވީލް އިން ވަނީ މުޚްތާރް، ގޮޑޯއީ، ޒިމާމަން އަދި ސުރިޖުގެ ޕެނަލްޓީ އެވެ. ނާކާމިޔާބުވީ ލީލްގެ ޕެނަލްޓީ އެވެ. ފަސް ޕެނަލްޓީ އަށް ފަހު ދެން ޖެހި ހުރިހާ ޕެނަލްޓީއެއް މިއާމީން ކާމިޔާބު ކުރި އެވެ. ނަމަވެސް ނަޝްވީލްގެ އެއް ޕެނަލްޓީ ވަނީ ނާކާމިޔާބުވެފަ އެވެ.