ރިޔާސީ އިންތިޚާބުގައި މިނިވަންކެނޑިޑޭޓެއްގެ ގޮތުގައި ވާދަކުރެއްވުމަށް ކުރިމަތިލައިފައިވާ ކެންޑިޑޭޓް ޢުމަރު ނަސީރަށް އިއްޔެ ހަވީރު ދިން ހަމަލާ އިލެކްޝަންސް ކޮމިޝަނުން ކުށްވެރިކޮށްފިއެވެ.

އީސީގެ ނައިބު ރައީސް އިސްމާއިލް ޙަބީބް ކުރައްވާފައިވާ ޓްވީޓެއްގައި ވިދާޅުވެފައިވަނީ އިންތިޚާބަށް ކުރިމަތިލި މީހުންގެ ނަންތައް އިލެކްޝަންސް ކޮމިޝަނުން ޢާންމުކޮށް އަންގައި އިޢުލާންކުރާ ދުވަހުން ފެށިގެން، އިންތިޚާބު ބާއްވައި، ރައީސުލްޖުމްހޫރިއްޔާކަމުގެ މަޤާމަށް އިންތިޚާބުވާ މީހާ އެމީހާގެ މަޤާމާ ޙަވާލުވަންދެން، ރިޔާސީ އިންތިޚާބަށް ކުރިމަތިލާފައިވާ އެންމެހައި ކެންޑިޑޭޓުންނަށާއި އެ ކެންޑިޑޭޓުންނާ އެކުގައި ރައީސުލްޖުމްހޫރިއްޔާގެ ނައިބުކަމަށް ހުންނަން، އެ ކެންޑިޑޭޓުން ހުށަހަޅާފައިވާ މީހުންނަށް، ދައުލަތުގެ ޚަރަދުގައި ސަލާމަތާއި ރައްކާތެރިކަމުގެ ޚިދުމަތް ދޭން ޤާނޫނު ލާޒިމްކުރާ ކަމަށެވެ.

ޙަބީބު އިތުރަށް ވިދާޅުވެފައިވަނީ އެއްވެސް ކެންޑިޑޭޓެއްގެ އަދި ރަނިންމޭޓެއްގެ ސަލާމަތާއި ރައްކާތެރިކަމަށް ހުރަސް އެޅިދާނެ އެއްވެސް ކަމެއް އެއްވެސް ފަރާތަކުން ކުރުމަކީ ކުށެއް ކަމަށެވެ. އަދި މިފަދަ ކަމެއް ހިނގާނަމަ، އެކަމެއް ހުއްޓުވަން ދައުލަތުގެ ސަލާމަތީ ބާރުތަކަށް އީސީގެ މެންބަރުންގެ ފަރާތުން ގޮވާލާ ކަމަށްވެސް ޙަބީބު ވަނީ ވިދާޅުވެފައެވެ.

އަދި މިފަދަ ނާތަހުޒީބު އަމަލުތަކުން ދުރުހެލިވުމަށް ހުރިހާ ފަރާތްތަކަށް އިލްތިމާސްކުރާ ކަމަށް ޙަބީބް ވިދާޅުވެފައިވެއެވެ.

ޙަބީބް ވިދާޅުވެފައިވަނީ އިއްޔެގެ ވަގުތެއްގައި ރިޔާސީ ކެންޑިޑޭޓް ޢުމަރު ނަސީރަށް މީހަކު ހަމަލާދީފައިވާތީ، މޯލްޑިވްސް ޕޮލިސް ސަރވިސް ހުށަހަޅާފައިވާ މައްސަލައިގެ ތަހުޤީޤު ހަލުވިކަމާއެކު ކުރިއަށްގޮސް، އެ ޢަމަލު ހިންގިކަމަށް ތުހުމަތުކުރެވޭ މީހުން އިންސާފުގެ ކުރިމައްޗަށް ގެނައުމަށް އީސީގެ ފަރާތުން ގޮވާލާ ކަމަށެވެ.

ހަމައެހެންމެ، އިއްޔެ ގުރައިދޫ ގައި ހިނގައިދިޔަ ކެމްޕޭން ހަރަކާތްތަކުގެ ހަމަނުޖެހުމަކީވެސް އީސީން ނުހަނު ކަންބޮޑުވާ ކަމެއް ކަމަށް ޙަބީބް ވިދާޅުވެފައިވެއެވެ. އަދި އެފަދަ މިފަދަ ޤާނޫނާއި ޚިލާފު ޢަމަލުތަކުން ދުރުހެލިވުމަށް  ހުރިހާ ފަރާތްތަކަށް އީސީއިން އިލްތިމާސް ކުރާކަމަށް ޙަބީބް ވިދާޅުވިއެވެ.