މިއަހަރުގެ އޮކްޓޯބަރު މަހުގެ ނިޔަލަށް ގިރާވަރު ފަޅު ހިއްކައި ނިމޭނެ ކަމަށް ހައުސިންގ މިނިސްޓްރީގެ ނައިބު އަކްރަމް ކަމާލުއްދީން ވިދާޅުވެއްޖެއެވެ.

"ވޮއިސް" އަށް މަޢުލޫމާތު ދެއްވަމުން އަކްރަމް ވިދާޅުވީ އޮކްޓޫބަރުގެ ނިޔަލަށް ގިރާވަރުފަޅު ހިއްކައި ނިންމާނެ ކަމަށެވެ. އަދި ފަޅު ހިއްކުން ކުރިއަށް ދާ މިންވަރަކުން ގޯތި ކަނޑަމުން ދާނެ ކަމަށްވެސް އަކްރަމް ވިދާޅުވިއެވެ.

އަކްރަމް ވިދާޅުވީ ވަރަށް އަވަހަށް އެހެންތަންނުން ކަނޑައިފައިވާ ގޯތިތައް ދޫކުމުގެ މަސައްކަތް ފައްޓަވާނެ ކަމަށެވެ.

ބިންވެރިޔާ ސްކީމް ގެ ދަށުން ގޯތި ދޫކުރުމަށް ހަމަޖައްސައި ގޯތިދެމުން އަންނަނީ ހުޅުމާލޭ ދެވެނަ ފިޔަވަހި، ގުޅިފަޅު އަދި ގިރާވަރުފަޅުންނެވެ.

ބިންވެރިޔާ ސްކީމްގެ ދަށުން ޝަރުތު ހަމަވާ 19639 މީހުންނަށް 9000އަށްވުރެ ގިނަ ގޯތި ދޫކުރުމަށް ވަނީ ނިންމާފައެވެ. ގޯތި ލިބޭ މީހުންނަށް ގޯތި ލިބޭ ސަރަޙައްދު ކަނޑައެޅުމަށް ގުރުއަތު ނެގުން މިހާރު ދަނީ ކުރިއަށެވެ. މި ސްކީމްގެ ދަށުން އެންމެ ގިނަ ގޯތި ދިނުމަށް ނިންމާފައިވަނީ ގިރާވަރު ފަޅުންނެވެ.

އެގޮތުން އެސަރަޙައްދުން 5000 ގޯތި ދިނުމަށް ކަނޑައަޅާފައިވެއެވެ. މީގެއިތުރުން ގުޅިފަޅުން 2200އަށްވުރެ ގިނަ ގޯތި އަދި ހުޅުމާލެ ދެވަނަ ފިޔަވަހިން 1300އަށްވުރެ ގިނަ ގޯތި ދިނުމަށް ވަނީ ނިންމާފައެވެ.

ގޯތި ދިނުމަށްޓަކައި ބޭނުންވާ ބިން ކަނޑައެޅުމަށްޓަކައި ގިރާވަރު ފަޅު އަދި ގުޅިފަޅު ހިއްކުމުގެ މަޝްރޫޢު މިހާރު ދަނީ ކުރިއަށެވެ. ބިން ހިއްކުމުގެ މަސައްކަތް ކުރިއަށްގެންދަނީ ރާއްޖޭގައި އެފަދަ ބޮޑެތި މަޝްރޫޢުތައް ކުރިއަށްގެންގޮސްފައިވާ ނެދަލޭންޑްސްގެ ސީއެމްސީ-ބޮސްކާލިސް ޖޮއިންޓު ވެންޗާ ކުންފުނިންނެވެ.

.