ރާއްޖޭގެ ސިޔާސީ އިސްލާހީ މަސައްކަތުގައި މުހިންމު ދައުރެއް އަދާކުރެއްވި އަހްމަދު އިބްރާހިމް ދީދީ (ސަންދާން އަހަންމައިދީ) އަވަހާރަ ވެއްޖެ އެވެ.

އުމުރުން 72 އަހަރުގައި، ސަންދާން އަހަންމައިދީ އަވަހާރަވީ އާލާސްކަންފުޅާ އުޅުއްވާތާ ދުވަސްތަކެއް ފަހުން ރޭ ފަތިހުގެ ވަގުތެއް ގައެވެ. 

އަހަންމައިދީގެ ޖަނާޒާ އޮތީ އަސުރު ނަމާދަށް ފަހު ހުޅުމާލެ ސަހަރާގައެވެ.

އައްޑޫ ސިޓީއަށް އުފަން ސަންދާނު އަހައްމައިދީއަކީ ރާއްޖޭގެ ސިޔާސީ މަޝްރަހުގައި އެކި ދުވަސްވަރުމަތިން އުފެދުނު ހަލަބޮލިކަމުގައި ޤައުމު ހަމަމަގަށް އެޅުވުމުގައި މީޑިއާތަކާއި، މިނިވަން މުއައްސަސާތަކާއި، އަދި ސިޔާސީ ފަރާތްތަކާއި ގުޅިގެން މަސައްކަތްކުރެއްވި ޖެހިލުން ކުޑަ ބޭފުޅެކެވެ.

އެގޮތުން ރައީސް މައުމޫންގެ ވެެރިކަމުގައި ރާއްޖެއަށް އިސްލާހީ ބަދަލުތައް ގެނައުމަށް ކުރެވުނު މަސައްކަތުގައި އަހަންމައިދީ ވަނީ ވަރަށް އިސް ދައުރެއް އަދާކުރައްވާފައެވެ. 

ރައީސް މައުމޫންގެ ވެރިކަމުގެ ތެރޭގައި އިންޓަރނެޓްގެ ޒަރީއާއިން ނެރެން ފެށި ސަންދާންގެ އިސްމޭސްތިރިއަކީވެސް އަހައްމައިދީއެވެ. އެމަޖައްލާ ނެރުއްވައި އޭރު ދައުލަތާއި، ރައީސް މައުމޫނަށް ފާޑުވިދާޅުވެ ލިޔުއްވި ބައެއް އާޓިކަލް ތަކާއި ގުޅިގެން 2002 ވަނަ އަހަރު އަހައްމައިދީ އުމުރަށް ޖަލަށް ލެއްވިއެވެ.

ނަމަވެސް އޭގެ ފަހުން 2006 ވަނައަހަރު އަހައްމައިދީއަށް ރައީސް މައުމޫން ވަނީ މަޢާފު ދެއްވާފައެވެ.

އަހައްމައިދީ ވަނީ 2008 ވަނަ އަހަރު ބޭއްވި ރިޔާސީ އިންތިޚާބުގައި ޤައުމީ ޕާޓީގެ ޑރ.ހަސަން ސައީދަށް ތާއީދު ކުރައްވައި އެޕާޓީގައި މުހިންމު ދައުރެއް އަދާކުރައްވާފައެވެ.

އަދި 2008 ވަނަ އަހަރު ކުރީގެ ރައީސް މުހައްމަދު ނަޝީދުގެ ވެރިކަން ގެނައުމަށްވެސް މަސައްކަތް ކުރެއްވިއެވެ. އެފަހުން، ނަޝީދުގެ ސަރުކާރުގެ ތެރެއިން ހިނގަމުންދިޔަ ނޭދެވޭ ކަންކަމާއި ދެކޮޅަށް އިދިކޮޅު ފަރާތްތަކާއިއެކު މަސައްކަތް ކުރެއްވިއެވެ. އެ މަސައްކަތުގެ ތެރެއިން ތަކުރާރުކޮށް ހައްޔަރު ކުރެވި ޖަލުގައި ވެސް ބަންދު ކުރެވިފައި ވެއެވެ. 

ނަޝީދުގެ އިތުރުން ކުރީގެ ރައީސް ޔާމީން އަބްދުލްގައްޔޫމްގެ ވެރިކަމުގައި ހިންގަމުން ދިޔަ ނުރަނގަޅު ކަންކަމާއި ދެކޮޅަށް ވެސް އަޑުއުފުއްލެވި އެވެ.

ސަންދާނު އަހައްމައިދީ އަކީ އޭނާގެ މިޒާޖުގައި ވަރަށް މަޑުމައިތިރި، ހިތްހެޔޮ އެންމެނާވެސް ވަރަށް ގުޅޭ ބޭފުޅެކެވެ. ހަތުރުންނާއި މިތުރުންނަށް ވަރަށް ގާތް ގުޅުމެއް ބޭއްވެވިއެވެ. ދީނީ ކަންކަމަށް ނުހަނު ފަރުވާތެރިވެވަޑައިގެންނެވި އެވެ.