އިންތިޚާބު މިއޮތީ އެއްބުރުން ނިމިފައި ކަމަށާއި، ވިސްނުން އިސްކުރައްވާ އެމްޑީޕީގެ ފަހަތައް އެރުމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް ޞާލިޙް މިހެން ވިދާޅުވީ އިއްޔެ ބ.ކެންދޫއަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވައި ވާހަކަ ދައްކަވަމުންނެވެ.

ރައީސް ވިދާޅުވީ ބ.އަތޮޅުގެ ބޮޑު އަޤްލަބިއްޔަތަކާއި އެކު ބ.އަތޮޅުން އެމްޑީޕީ ކޯލިޝަނަށް ތާއީދު އޮތީ ލިބިފައި ކަމަށެވެ.

Advertisement

ރައީސް ވިދާޅުވީ "ސީރިޔަސް" ކަމާއިއެކު މި އިންތިޚާބު ކާމިޔާބުކުރުމަށް މަސައްކަތް ކުރައްވާ ފެންނަނީ މަދު ބައެއް ކަމަށެވެ. ދެން ތިއްބެވި ބޭފުޅުން މަސައްކަތް ކުރަމުން ގެންދަވާތަން ފެންނަނީ އިންތިޚާބު ދެވަނަ ބުރަކަށް ގެންދިޔުމަށް ކަމަށާއި ދެވަނަބުރެއްގައި ކޯލިޝަން ހަދައިގެން ސަރުކާރުގެ މަޤާމްތައް ހޯދުމަށް ކަމަށް ވެސް ރައީސް ޞާލިޙް ވިދާޅުވިއެވެ.

"ޖަންގަލީގަ މަގުތައް ހުންނާނީ އެކި ގޮތްގޮތައް، އަންތަރީހަށް ނުމެ އަރާ ވިސްނުން އިސްކުރަންޖެހޭ ފުރަތަމަ، ދަންނަވަންތޯ މި އިންތިޚާބު މިއޮތީ ފުރަތަމަ ބުރުން ނިމިފަ، މިއަކު ޝައްކެއް ކުރާނެ ކަމެއް އަޅުގަނޑަކަށް މިއަދަކު ނުފެނޭ، ދެންވެސް ކުރަންވި ކަމަކީ ވިސްނުން އިސްކުރައްވާ އަޅުގަނޑުމެންނާއި އެއްކޮޅަށް އެހުރިހާ ބޭފުޅުން އަރައިވަޑައިގަންނަވަންވީ" ރައީސް ޞާލިޙް ވިދާޅުވިއެވެ.

ރައީސް ޞާލިޙް ވިދާޅުވީ ކެންޑިޑޭޓުންނަށާއި ޕާޓީތަކަށް ވެސް ފައިދާ ހުރި ގޮތަކީ އެއީ ކަމަށެވެ. ރައީސް ވިދާޅުވީ ދެވަނަ ބުރަކަށް މި އިންތިޚާބު ގެންގޮސްގެން ބައިނަގަން ނޫޅުއްވުމަށެވެ.

ރައީސް ޞާލިޙް ވިދާޅުވީ މީގެ ކުރިން ދެވަނަ ބުރަށް ގޮސްގެން ކޯލިޝަން ހަދައިގެން އައިސް ކޯލިޝަން މާ ގިނަދުވަހެއް ނުވެ ރޫޅުނު ކަމަށާއި، 2018 ގެ އިންތިޚާބަށް ފުރަތަމަ ބުރަށް ކޯލިޝަން އަކާއި އެކު ކުރިމަތިލީ އެތަޖުރިބާގެ އަލީގައި ކަމަށެވެ. ތަފާތު ސިޔާސީ ޚިޔާލު ތަކާއިއެކުވެސް ރައްޔިތުންނަސް ޚިދްމަތް ކުރުމަށް ދެމިއޮވެވުނީ މަޝްވަރާ ކުރެވި މައްސަލަތައް ހައްލުކުރެވިގެން ކަމަށެވެ.

ރައީސް ޞާލިޙް ކެމްޕޭނަށް ކުރައްވަމުން މިގެންދަވާ ދަތުރުފުޅުގައި ކޯލިޝަން ޕާޓީތަކުގެ އިސް ލީޑަރުން ދަނީ ބައިވެރިވަމުންނެވެ.