މިއަހަރުގެ ރިޔާސީ އިންތިހާބު ކާމިޔާބުވެ ވެރިކަމަށް ވަޑައިގަނެވިއްޖެ ނަމަ، ށ ފޭދުއަށް ދިމާވެފައިވާ ކުނި މެނޭޖް ކުރުމުގެ މައްސަލައާއި އެރަށަށް ދިމާވެފައިވާ ރަށްގިރުމުގެ މައްސަލައާއި ދެ މައްސަލައަކީވެސް އަސާސީ ކަމެއްގެ ގޮތުގައި ބަލައިގެން ހައްލުކޮށްދެއްވާނެ ކަމުގައި ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ. 

ރިޔާސީ އިންތިހާބުގެ ކެމްޕެއިންގައި މިއަދު ށ ފޭދުއަށް ވަޑައިގެން އެރަށުގެ ސަޕޯޓަރުންނާއި ބައްދަލުކުރައްވާ ދެއްކެވި ވާހަކަފުޅުގައި މުއިއްޒުވަނީ އެ މަނިކުފާނަށް ރިޔާސީ އިންތިހާބު ކާމިޔާބު ކުރެވި ވެރިކަމަށް އާދެވިއްޖެ ނަމަ ފޭދުއަށް ކޮށްދެއްވާނެ ގިނަ ކަންކަމެއްގެ ވައުދުތަކެއް ވެވަޑައިގެންފައެވެ. 

އޭގެ ތެރޭގައި އެރަށުގެ ޒުވާނުންނަށް ހާއްސަ ކުރެވިގެން ޔޫތް ސެންޓަރެއް ގާއިމްކޮށްދެއްވާނެ ކަމަށާއި، އެރަށު ސިއްހީ މަރުކަޒަށް ދިމާވެފައިވާ މައްސަލަތައް ހައްލުކޮށްދެއްވައި ސިއްހީ ނިޒާމު ހަރުދަނާ ކޮށްދެއްވުމުގެ އިތުރުން، އެރަށު ސްކޫލަށް ދިމާވެފައިވާ ޖާގައިގެ ދަތިކަން ހައްލުކޮށްދެއްވާނެ ކަމުގައި ޑރ މުއިއްޒު ވަނީ ފޭދޫގެ ރައްޔިތުންގެ އަރިހުގައި ވައުދުވެވަޑައިގެންފައެވެ. 

ހަމައެއާއެކު އެ ރަށުގެ މައި ބޮޑެތި މަގުތައްވެސް ރަށްރަށުގެ މަގުތައް ހެދުމުގެ މަޝްރޫއުގެ ދަށުން ތަރައްގީ ކޮށްދެއްވާނެ ކަމުގައި މުއިއްޒު ވިދާޅުވިއެވެ. 

މީގެ އިތުރުން މުއިއްޒު ވިދާޅުވީ 9 ސެޕްޓެމްބަރުގައި އޮންނަ ރިޔާސީ އިންތިހާބުގައި ފޭދޫގެ ރައްޔިތުންގެ ބޮޑު އަގުލަބިއްޔަތެއް އެ މަނިކުފާނަށް ލިބިވަޑައިގަންނަވާނެ ކަމުގައި ޔަގީން ކުރައްވާކަމުގައެވެ.