ހެޔޮވެރިކަމެއް ކުރެވޭނީ ރައްޔިތުންގެ އަޑު އަހައިގެން ރައްޔިތުންގެ މުހުތާދު ތައް ފުއްދައިދީގެން ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް ޞާލިޙް މިހެން ވިދާޅުވީ ކެމްޕޭނަށް ކުރައްވަމުންގެންދަވާ ދަތުރު ފުޅުގައި ރ.ކިނަޅޮހަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވައި ވާހަކަ ދައްކަވަމުންނެވެ.

"އަޅުގަނޑު ހިތުން ވެރިކަމެއްގެ އެންމެ މުހިންމު ސިފައަކީ، ރައްޔިތުން އިންތިޚާބު ކުރާ ވެރިކަމެއްގައި ހުންނަންޖެހޭނެ އެންމެ މުހިންމު ސިފައަކީ ހެޔޮވެރިކަމެއް، ހެޔޮވެރިކަމެއް ކުރުމަށްޓަކައި ކުރަން ޖެހޭ ކަމަކީ ތިމާއަށް ހަމައެކަނި ފެންނަ ގޮތް އެއީ ހަމައެކަނި ގޮތްކަމަށް ނުބަލައި ރައްޔިތުންގެ އަޑު އަހައިގެން ރައްޔިތުންގެ މުހުތާދުތައް ދެނެގަނެގެން ރައްޔިތުން ބޭނުންވާ ގޮތައް ވެރިކަން ކުރުން" ރައީސް ޞާލިޙް ވިދާޅުވިއެވެ.

Advertisement

ރައީސް ޞާލިޙް އިތުރަށް ވިދާޅުވީ މީގެ ކުރީގެ ހަތަރު ވެރިކަމެއް ފެނިގެން ހިނގައްޖެ ކަމަށާއި، މީގެ ކުރީގެ އިންތިޚާބުތައް ކައިރިވެގެން ދާއިރު އެންމެން އެއް އަޑަކުން ގޮވަނީ ވެރިކަން ބަދަލު ކުރަން ކަމަށެވެ.

އަދި އެއީ ރައްޔިތުން އެދުނު ފަދަ ހެޔޮ ވެރިކަމެއް ރައްޔިތުން އިންތިޚާބު ކުރި ފަރާތައް ނުކުރެވުމުން ކަމަށް ރައީސް ވިދާޅުވިއެވެ. މިއަދު އެކަންތަފާތު ކަމަށާއި ވެރިކަމަށް އައުމުގެ ކުރިން ވީ ވަޢުދުތައް ފުއްދަމުންދާތަން ރައްޔިތުން އެބަ ދެކޭ ކަމަށް ރައީސް ޞާލިޙް ވިދާޅުވިއެވެ.

ރައީސް ވިދާޅުވީ މިހާރު މިވަމުންދާ ވަޢުދުތައް ފުއްދާނެ ކަމުގެ ޔަޤީންކަން ރަށްރަށުގެ ރައްޔިތުންނަށް މިހާރު އެބައޮތް ކަމަށެވެ.

"އަޅުގަނޑުމެންނަށް ބިންގަލެއް އެޅިއްޖެ، އަސާސީ ޚިދްމަތްތައް އަދި ކިރިޔާ ރައްޔިތުންނަށް ފޯރުކޮށްދީ މިނިމެނީ، އެއަށްފަހުގައި އަދި މީހެއްގެ ދިރިއުޅުމުގެ މަސައްކަތް ފަށައިގަނެވޭނީ، ކުރިއަށް އޮތް ތަނުގައި އަޅުގަނޑުމެންގެ މެނިފެސްޓޯ އެކުލެވިފައިމިއޮތީ އެކަމުގެ މައްޗަށް" ރައީސް ވިދާޅުވިއެވެ.

ލާމަރުކަޒީކޮށް ރައްޔިތުންނާއި ވީހާ ގާތުން މަސައްކަތް ކުރެވޭނެ ގޮތެއް އޮތުމަކީ ހެޔޮވެރިކަމެއް ކުރުމަށް ކޮންމެހެން ބޭނުންވާ ކަމެއް ކަމަށާއި، މުޅި ރާއްޖެއަށް މިގެނެވޭ ތަރައްޤީގެ އެއް ސަބަބަކީ ލާމަރުކަޒީކޮށް ބާރުތައް ދޫކޮށްލުން ކަމަށް ރައީސް ޞާލިޙް ވިދާޅުވިއެވެ.

ރ.އަތޮޅަށް މިއަދު ފެއްޓެވި ދަތުރުފުޅުގައި ރައީސް ޞާލިޙް ކިނަޅޮހަށް ވަޑައިގަތުމުން އެމަނިކުފާނަށް ގިނަ ބަޔަކު ވަނީ މަރުޙަބާ ކިޔައިފައެވެ.