އެމްޑަބްލިއުއެސްސީ ދިވެހި ޕްރެމިއާ ލީގުގައި މިއަދު ހަވީރު ކުޅެވުނު މެޗުގައި ސްޕަރ ޔުނައިޓެޑް ސްޕޯޓްސް ކުލަބު ބަލިކޮށް މާޒިޔާ އިން ލީގު ތާވަލުގައި ހަތަރު ޕޮއިންޓްގެ ލީޑެއް ނަގައިފިއެވެ. މިމެޗު މާޒިޔާ އިން ކާމިޔާބުކުރީ 3-0 ގެ ނަތީޖާއަކުން ނެވެ.

އަންނަމަހު ފެށުމަށް ހަމަޖެހިފައިވާ އޭއެފްސީ ކަޕް ފުޓްބޯޅަ މުބާރާތުގެ ގުރޫޕް ސްޓޭޖުގައި ވާދަކުރުމަށް ތައްޔާރުވުނުގެ ގޮތުން މާޒިޔާގެ ޓީމުގައި ބިދޭސީ ހަ ކުޅުންތެރިން ހިމަނާފައިވާއިރު، މިއަދުގެ މެޗުގެ ފުރަތަަމަ ހާފުގައި އެޓީމުގެ ފުރަތަމަ އެގާރައިގައި އޭގެތެރެއިން ފަސް ކުޅުންތެރިން ކުޅެފައިވެއެވެ.

މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅެ މާޒިޔާ އިން މެޗު ޑޮމިނޭޓުކުރިއިރު، މި މެޗުގައި އެޓީމުން ކާމިޔާބުކުރި ފުރަތަމަ ލަނޑު، 33 ވަނަ މިނެޓުގައި ކާމިޔާބުކޮށްދިނީ އެޓީމުގެ ޖޮސިކް ބްރަނިމިރު އެވެ. މިއީ އެޓީމަށް ލިބުނު ކޯނަރެއްގައި އެޓީމުގެ ގާނާގެ މިޑްފީލްޑަރު ރޭގަން އޮބެންގް ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މާޒިޔާ އިން ލީޑު ފުޅާކުރި ލަނޑު ފުރަތަމަ ހާފުގެ 40 ވަނަ މިނެޓުގައި ކާމިޔާބުކޮށްދިނީ ސާބިއާގެ ފޯވާޑް ވޮޖިސްލާވް ބަލަބަނޮވިޗް އެވެ. މިއީ އެޓީމުގެ ހަސަން ރާއިފް އަހުމަދު ތަނަވަސްކޮށްދިން ފުރުސަތެއްގައި ބޯޅައާއެކު ސަސްގެ ޕެނަލްޓީ އޭރިއާ ތެރެއަށް ވަދެ ތިރިތިރިން ފޮނުވާލި ބޯޅަ ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން މާޒިޔާ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް މާޒިޔާ އިން މެޗު ޑޮމިނޭޓުކުރި ނަމަވެސް މިހާފުގައި ސަސްގެ ފަރާތުން ވަނީ ރަގަޅު ޑިފެންސިވް ކުޅުމެއް ފެނިގެން ގޮސްފައެވެ.

މި މެޗުގައި މާޒިޔާ އިން ކާމިޔާބުކުރި ތިންވަނަ ލަނޑު ދެވަނަ ހާފުގެ 70 ވަނަ މިނެޓުގައި ކާމިޔާބުކޮށްދިނީ ސާބިއާގެ ފޯވާޑް ވޮޖިސްލާވް ބަލަބަނޮވިޗް އެވެ. މިއީ ވެސް އެޓީމުގެ ހަސަން ރާއިފް އަހުމަދު ތަނަވަސްކޮށްދިން ފުރުސަތެއްގައި ސަސްގެ ޕެނަލްޓީ އޭރިއާގެ ރޮނގުމަތީހުރެ ފޮނުވާލި ބާރު ހަމަލާ ގޯލްގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު މެޗުގެ ކުޅުން ނިމިގެންދިޔައީ 3-0 ގެ ނަތީޖާއަކުން މާޒިޔާ ކުރީގައި އޮވެގެންނެވެ. މި މެޗުގެ މޭން އޮފް ދަ މެޗަކަށް ހޮވުނީ މާޒިޔާގެ ސާބިއާގެ ފޯވާޑް ވޮޖިސްލާވް ބަލަބަނޮވިޗް އެވެ. އޭނާ ވަނީ މި މެޗުގައި އެޓީމަށް ދެ ލަނޑު ކާމިޔާބުކޮށްދީފައެވެ.

މި މެޗުން ލިބުނު ތިން ޕޮއިންޓާއެކު ކުޅުނު 8 މެޗުން 22 ޕޮއިންޓާއެކު ލީގު ތާވަލުގެ ކުރީގައި މާޒިޔާ އިން ވަނީ ހަތަރު ޕޮއިންޓްގެ ލީޑެއް ނަގާފައެވެ. މި މެޗުން ބަލިވި ސަސް ކުޅުން 9 މެޗުން ލިބުނު 18 ޕޮއިންޓާއެކު މިވަގުތު އޮތީ ލީގު ތާވަލްގެ ދެވަނައިގައެވެ.